Rusiya gecə səhərə qədər son aylarda Ukraynaya qarşı ən böyük hücumlardan birini həyata keçirib.
Ukrayna Hərbi Hava Qüvvələrinin məlumatlarına görə, hücumda yüzlərlə Geran tipli kamikadze dronları, eləcə də Xəzər dənizindəki gəmilərdən atılan Kalibr qanadlı raketləri, Tu-95MS və Tu-160 strateji bombardmançı təyyarələrindən atılan qanadlı raketlər və ballistik raketlərdən istifadə edilib. Ukrayna hakimiyyəti hipersəsli "Kinzhal" raketlərinin istifadə oluna biləcəyini bildirib. Hücumlar dalğa şəklində həyata keçirilib və əsasən Kiyev, Xarkov, Dnepr, Zaporojye və Sumı olmaqla çox sayda şəhərədə hədəflərə zərbələr endirilib. Qeyd edilir ki, Rusiya gecə ərzində ölkə daxilindəki hədəflərə qarşı 450-dən çox dron və təxminən 40 qanadlı raketdən istifadə edərək genişmiqyaslı hücuma başlayıb.
Kiyev meri Vitali Kliçko paytaxtda dörd nəfərin öldüyünü və 51 nəfərin yaralandığını açıqlayıb. Dnepr də hücumlarda ağır ziyan çəkib. Dnepropetrovsk Regional Hərbi Administrasiyasının rəhbəri Aleksandr Hanja şəhərdə ölənlərin sayının beşə çatdığını, 25 nəfərin yaralandığını açıqlayıb.
Rusiyayönlü Telegram kanalı "Voenkorı Russkoy Vesnı"nın məlumatına görə, Rusiya hərbi gəmiləri ən azı 16 Kalibr raketi atıb, Tu-95 və Tu-160 strateji bombardmançı təyyarələri də səmaya qalxıb. Eyni mənbələr hücumda çoxsaylı Geran dronlarının cənubdan, şərqdən və şimaldan irəlilədiyini, bəzi dronların Kiyevi keçərək qərbi Ukraynaya doğru hərəkət etdiyini bildiriblər.
Son hücumlar Prezident Putinin Starobelsk və Genişeskdəki pedaqoji kollecə dron hücumlarının Ukraynadakı xüsusi hərbi əməliyyatın mahiyyətini dəyişdirə biləcəyini söyləməsindən sonra baş verib.
“Görünür, Kiyev administrasiyası Starobelskdəki pedaqoji kollecdə uşaqlara və gənclərə qarşı qəsdən çox ciddi bir cinayət törətdikdən sonra, indi də Genişeskdə eyni yolu gedərək cinayətlər zəncirində yeni bir fəsil açmağa və münaqişəyə tamamilə yeni bir xarakter vermək qərarına gəlib” – deyən Putin, bunun “onların seçimi” olduğunu qeyd edərək, hücumda məsul olanların cəzalandırılacağını vurğulamışdı.
Tahir TAĞIYEV
