ABŞ mediası iddia edir ki, prezident Donald Tramp İranla nüvə danışıqları ilə bağlı diqqət çəkən bir addım atıb. CNN International-ın ABŞ rəsmilərinə istinadən verdiyi məlumata görə, Tramp Tehran administrasiyasının son təklifində dəyişikliklər edərək mətni İran tərəfinə geri göndərib.
İddialara görə, bu addım tərəflər arasında danışıqlar prosesini təxminən bir həftə uzadıb. Lakin Trampın mətnə etdiyi dəyişikliklərin məzmunu ilə bağlı heç bir dəqiq məlumat paylaşılmayıb. ABŞ prezidentinin İranın nüvə proqramı ilə bağlı daha sərt ifadələr işlətdiyini deyən rəsmilər iddia edir ki, o, Hörmüz boğazının yenidən açılması ilə bağlı ifadələrində də dəyişikliklər edib.
Ağ Ev məsələ ilə bağlı rəsmi açıqlama verməyib və məsələ ilə bağlı qeyri-müəyyənlik davam edir.
Qeyd olunur ki, Tramp əvvəllər razılaşma ilə bağlı "böyük dərəcədə razılaşma əldə edildiyini" bildirmişdi, lakin sonradan prosesin tamamlanmadığını vurğulayaraq ziddiyyətli mesajlar vermişdi.
ABŞ prezidenti İranın yeraltı obyektlərdə saxlanan zənginləşdirilmiş uranın ABŞ tərəfindən çıxarılaraq məhv etməsini istədiyini bildirmişdi. Lakin İran tərəfi prioritetlərinin münaqişəyə son qoymaq olduğunu bildirərək, nüvə başlıqları məsələsinin daha sonra müzakirə edilə biləcəyini bildirib.
Tahir TAĞIYEV
