Rusiya-Ukrayna müharibəsində bütün bölgəyə təsir edəcək qorxunc hadisə baş verib. Dövlət Nüvə Enerjisi Korporasiyası “Rosatom”un baş direktoru Aleksey Lixaçev Ukrayna pilotsuz təyyarəsinin Zaporojye Atom Elektrik Stansiyasının enerji blokuna zərbə endirdiyini açıqlayıb.
Lixaçev hücumdan sonra stansiyada partlayış baş verdiyini bildirib: "Kamikaze dronu stansiyanın enerji blokunun turbin binasına dəyib. Partlayış nəticəsində əsas avadanlıq zədələnməyib, lakin turbin otağının divarında dəlik açılıb".
Lixaçev hücumun "qəsdən törədildiyini" iddia edib: "Bu gün Rusiya və Ukraynanın sərhədlərindən çox kənarda yaşayan və özlərini tamamilə təhlükəsiz hesab edənlərə də böyük təsir edəcək hadisəyə bir addım daha yaxınlaşdıq".
Qeyd edək ki, Zaporojye Atom Elektrik Stansiyası Avropanın ən böyük nüvə elektrik stansiyasıdır. Rusiya ordusu Ukraynada müharibənin başlamasından sonra, 2022-ci ilin mart ayında stansiyaya nəzarəti ələ keçirib.
Tahir TAĞIYEV
