Qara dənizdə Rusiyanın "kölgə donanmasına" bağlı üç tankerə dronlar hücum edib. Reuters agentliyinin 28 may tarixində Tribeca gəmiçilik şirkətinə istinadən verdiyi məlumata görə, Palau bayrağı altında üzən James II tankerinə Qara dənizdə Türkelidən 80 kilometr şimalda hücum edilib. Syerra-Leone bayrağı altında üzən Altura və Velora tankerlərinə də zərbə endirilib. Məlumata görə, onlara yükü bir gəmidən digərinə keçirərkən hücum edilib. Türkiyə Sahil Mühafizəsi kömək göstərmək üçün hadisə yerinə qayıqlar göndərib. Hücumlarda xəsarət alan olmayıb. Hər üç gəmi Böyük Britaniya və bir neçə başqa ölkə tərəfindən Rusiyanın "kölgə donanmasına" mənsub olduqları üçün sanksiya siyahısına salınıb. Britaniya hökumətinin veb saytına görə, onlar "Rusiyadan üçüncü ölkəyə Rusiya mənşəli neft və ya neft məhsullarının daşınması ilə məşğuldurlar" və beləliklə, Ukraynanın sabitliyini pozmağa və ərazi bütövlüyünü və suverenliyini sarsıtmağa yönəlmiş fəaliyyətlərdə iştirak edirlər. Ukrayna Müdafiə Nazirliyinin Baş Kəşfiyyat İdarəsinin, eləcə də gəmi izləmə xidmətlərinin məlumatına görə, bu tankerlər Primorsk, Ust-Luqa və Novorossiysk də daxil olmaqla Rusiya limanlarına daxil olublar. Nə Ukrayna, nə də Rusiya tankerlərə edilən hücumlarla bağlı rəsmi olaraq şərh verməyib. Qeyd olunur ki, Rusiyanın "Kölgə Donanması" təxminən 1500 tankerdən ibarətdir, onlar çox vaxt köhnəlmiş modellərdəndir və Qərb sanksiyalarından yayınmaq üçün saxta bayraqlardan istifadə edirlər. Bunlardan təxminən 600-ü artıq Rusiyanın Ukraynaya qarşı genişmiqyaslı müharibəsinin başlanğıcından bəri tətbiq edilən AB, Böyük Britaniya və ABŞ sanksiyalarına məruz qalır. Bu gəmilər həmçinin Rusiya hökuməti adından Qərb ölkələrinə qarşı hibrid hücumlarda, məsələn, Baltik dənizində sualtı kabellərə zərər verməkdə iştirakda şübhəli bilinir.
SAMİRƏ
