Fevral ayında ABŞ və İsrailin hava hücumları ilə başlayan və minlərlə insanın həyatına son qoyan İranla müharibə tarixi diplomatik dönüş nöqtəsinə çatıb. “Al-Arabiya” və ABŞ mediasında yayımlanan son xəbərlərə görə, Vaşinqton və Tehran arasında tezliklə imzalanacaq gözlənilən ilkin sülh sazişi rəsmi olaraq "İslamabad Bəyannaməsi" adlandırılır.
ABŞ prezidenti Donald Tramp "Hazırda razılaşma barədə danışa bilmərəm, bu proses tamamilə məndən asılıdır və əgər hər hansı bir xəbər olarsa, bu, yalnız yaxşı xəbər olacaq. Mən pis razılaşmalar imzalamaram" deyib.
Tramp, Barak Obama administrasiyası dövründə imzalanmış nüvə sazişi ilə onun səlahiyyət müddəti ərzində aparılan danışıqları müqayisə edib: "Ölkəmizin indiyə qədər bağladığı ən pis sövdələşmələrdən biri Barak Hüseyn Obama və Obama administrasiyasındakı bacarıqsız həvəskarlar tərəfindən düşünülmüş və imzalanmış İran Nüvə Sazişi idi. Bu saziş İran üçün nüvə silahı inkişaf etdirmək üçün birbaşa yol idi. Tramp administrasiyasının hazırda İranla danışıqlar apardığı proses bunun tam əksidir.
Danışıqlar nizamlı və konstruktiv şəkildə davam edir. Lakin nümayəndələrimə razılaşmaya tələsməməyi, prosesi tələsdirməməyi tapşırdım, çünki zaman bizim tərəfimizdədir. Bunu aydınlaşdırmaq istəyirəm: dəniz blokadası yekun razılaşma əldə edilənə, təsdiqlənənə və imzalanana qədər tam güc və maksimum təsirlə davam edəcək. Hər iki tərəf vaxt ayırmalı və bunu düzgün etməlidir. Heç bir səhv edilməməlidir".
ABŞ prezidenti İran prezidenti Pezeşkianın "Dünyanı nüvə silahı əldə etməyə çalışmadığımıza əmin etməyə hazırıq" ifadəsinə də dolayı yolla cavab verib: "İranla münasibətlərimiz daha peşəkar və məhsuldar hala gəlir. Lakin onlar çox yaxşı başa düşməlidirlər ki, heç bir şəkildə nüvə silahı və ya bombası inkişaf etdirə, istehsal edə və ya əldə edə bilməzlər. Bu, bizim ən böyük qırmızı xəttimizdir.
İndiyə qədər göstərdikləri dəstəyə və əməkdaşlığa görə Yaxın Şərqdəki bütün ölkələrə təşəkkür etmək istəyirəm. Bu əməkdaşlıq gələcəkdə tarixi İbrahim Sazişlərində iştirakları ilə daha da güclənəcək. Və kim bilir, bəlkə də İran İslam Respublikası bir gün bu sülh dairəsinə qoşulmaq istəyə bilər".
Tahir TAĞIYEV
