İran ABŞ-la hərtərəfli razılaşmanın yenidən işlənmiş layihəsini Pakistan vasitəsilə Vaşinqtona təqdim edib. "Al Jazeera"yə danışan yüksək vəzifəli İran rəsmisi İslamabad vasitəsilə aparılan danışıqlar nəticəsində layihə mətni üzrə tam razılığa gəlindiyini və indi Ağ Evdən gələcək cavabı gözlədiklərini açıqlayıb.
Gərginliyin hərbi və iqtisadi ölçülərinə tədricən son qoymağı hədəfləyən tarixi təklifin əsas məqamları bunlardır:
regionda bütün hərbi əməliyyatların dərhal dayandırılması və müharibə vəziyyətinə son qoyulması.
İranı iqtisadi cəhətdən iflic edən dəniz blokadasının qaldırılması müqabilində Tehranın Hörmüz boğazını qlobal dəniz ticarəti və naviqasiya azadlığı üçün yenidən açması.
Böhranın ən vacib və həlli imkansız görünən "nüvə ehtiyatları" məsələsi isə hələlik sazişdən çıxarılıb. Layihəyə əsasən, nüvə məsələsi yalnız sülh razılaşması əldə edildikdən 30 gün sonra danışıqlar masasına gətirilə bilər. Layihə mətninin mediaya sızmasından sonra İran Xarici İşlər Nazirliyinin sözçüsü İsmayıl Bekayi razılaşmaya həm çox yaxın, həm də çox uzaq olduqlarını deyib: “Tərəflərin fikirləri əhəmiyyətli dərəcədə üst-üstə düşüb, lakin bu, hələ tam razılaşma və imzalanma demək deyil. Hər iki tərəf üçün məqbul olan bir həll yoluna çata biləcəyimiz rasional ortaq nöqtədəyik. Bu həftə fikir ayrılıqlarını azaltmaq üçün bəzi işlər görülüb, lakin bəzi məsələlər hələ də müzakirə olunmalıdır. Müharibəyə son qoymağa diqqət yetiririk və nüvə dosyası haqqında 30 və ya 60 gün ərzində danışmaq ayrı bir məsələdir. Razılaşmanın yekunlaşdırılması üçün vaxt məhdudiyyəti yoxdur, lakin bu müddət yekun razılaşma əldə olunana qədər başlamayacaq. Çərçivə mətninin son mərhələsindəyik".
ABŞ dövlət katibi Rubio isə bəzi irəliləyişlərin əldə edildiyini deyib: "Boğazlar güzəştə getmədən açıq qalmalıdır. Zənginləşdirilmiş uranı təhvil verməlidirlər. Bəzi irəliləyişlər əldə edilib, bəzi addımlar atıldı. Hətta sizinlə indi danışdığım müddətdə də müəyyən işlər görülür. Bu gün, sabah və ya bir neçə gün ərzində nəsə demək imkanı var, bu məsələ həll edilməlidir, Prezidentin dediyi kimi, bu və ya digər şəkildə həll edilməlidir...”
Bu arada, Pakistanın Ordu Qərargah rəisi Asim Munir diplomatik təmaslardan sonra İranı tərk edib. Tehranda keçirilən danışıqlardan sonra Munir ABŞ və İran arasında "yekun razılaşma" istiqamətində "ümidverici irəliləyiş" əldə edildiyini təsdiqləyib.
