İsrailin İrana qarşı hücumlarda istifadə etmək üçün İraqın səhra bölgəsində qurduğu daha bir gizli baza aşkarlanıb. “New York Times” qəzetinin adı açıqlanmayan regional və İraq rəsmilərinə istinadən verdiyi məlumata görə, İsrail İraq səhra bölgəsində qurduğu iki hərbi bazanı aylarla gizli saxlayıb.
Təhlükəsizlik mənbələrinə görə, bu baza İsrail tərəfindən hava dəstəyi, yanacaq doldurma və tibbi müalicə üçün istifadə olunub. Bazanın İsrail təyyarələrinin İranı vurmaq üçün qət etməli olduğu məsafəni qısaltmaq məqsədilə qurulduğu və 2025-ci ilin iyun ayında İrana hücumda istifadə edildiyi bildirilir.
Dəhşətli qalmaqal 3 martda İraqın qərb səhrasında bədəvi düşərgəsində yaşayan 29 yaşlı çoban Əvəd əl-Şəmmarinin ərzaq alış-verişinə çıxması ilə ortaya çıxmışdı. O, yerli hakimiyyət orqanlarının "Nuhaib Bazası" adlandırdığı strateji bir yerə təsadüfən rast gəlib və orada səhranın ortasında eniş zolağı, hərbi helikopterlər, çadırlar və formalı əsgərlər görüb.
Gördüklərini dərhal telefonla regional hərbi komandanlığa bildirən çoban bu təhlükəli sirrin qurbanı olub. “New York Times”a danışan şahidlərin sözlərinə görə, xəbərdən qısa müddət sonra hərbi vertolyot çobanın yük maşınını səhrada təqib etməyə başlayıb və ona dəfələrlə atəş açıb. İki gün sonra əl-Şammarinin pikapı qohumları tərəfindən bombalanmış vəziyyətdə tapılıb və onun cəsədinin isə yandırıldığı məlum olub.
Çobanın qətli və onun məxfi məlumatlarından sonra İraq Regional Komandanlığı dərhal hadisə yerinə kəşfiyyat bölməsi göndərib. Lakin İraq Birgə Əməliyyatlar Komandanlığının rəsmi məlumatlarına görə, İraq əsgərləri bazaya yaxınlaşarkən ərazidəki "xarici qüvvələr"in şiddətli hücumuna məruz qalıb. Baş verən toqquşmada bir İraq əsgəri həlak olub, ikisi yaralanıb və orduya məxsus iki hərbi maşın bombalanaraq məhv edilib.
Qalmaqalın ardından, İraq Parlamenti hərbi liderləri 8 martda gizli brifinq verməyə məcbur edib. Görüşdə iştirak edən parlament üzvü Həsən Fədaam "New York Times" qəzetinə açıqlamasında Nuhaib bazasının aysberqin yalnız görünən hissəsi olduğunu deyib. İraqın yüksək vəzifəli təhlükəsizlik rəsmiləri də qəzet müxbirlərinə İraqın qərb səhra bölgəsində ikinci gizli İsrail bazasının mövcudluğunu rəsmi olaraq təsdiqləyiblər.
Ən təhlükəli iddialardan biri isə ABŞ-ın rolu ilə bağlı olub. Təhlükəsizlik mənbələri bildirib ki, Vaşinqton bu gizli bazadan 2025-ci ilin iyun ayından bəri xəbərdar olub.
Bundan əlavə, İraq rəsmiləri, həm keçən ilki müharibə zamanı, həm də hazırkı gərginlik dövründə ABŞ-ın öz təyyarələrini qorumaq bəhanəsi ilə İraqa radarlarını bağlatdırdığı və bununla da ölkənin hava məkanında düşmən fəaliyyətini aşkar etməsinin qarşısını aldığını bildiriblər.
Qeyd edilir ki, ifşa olunmuş əl-Nuhaibdəki İsrail bazası boşaldılıb və əməliyyatları dayandırılıb, lakin səhranın dərinliyindəki ikinci gizli bazanın taleyi hələ də sirr olaraq qalır.
Tahir TAĞIYEV
