ABŞ prezidenti Tramp 8,5 ildən sonra Çinə tarixi bir səfər edib. ABŞ və Çin arasında dünən Pekində keçirilən görüşdə razılaşdırılmış ən vacib məsələ Hörmüz boğazı idi. Ağ Evin açıqlamasına görə, iki ölkə boğazı açıq saxlamaq barədə razılığa gəliblər.
Belə bir vaxtda “Axios” xəbər platformasına danışan adı açıqlanmayan İsrail rəsmisi bildirib ki, Tramp İrana hücumları bərpa etmək qərarına gələrsə, bu, İsrail ordusu ilə əlaqələndirilərək həyata keçiriləcək. İsrail rəsmisi Trampın bu qərarı həftəsonu verə biləcəyini və İsrail hökuməti və ordusunun yüksək hazırlıq vəziyyətində olacağını bildirib.
İsrail dövlət televiziyası KAN-ın adı açıqlanmayan İsrail rəsmilərinə istinadən verdiyi məlumata görə, ötən həftə ABŞ Mərkəzi Komandanlığı (CENTCOM) ilə görüşən yüksək vəzifəli İsrail hərbi rəsmiləri Təl-Əvivin İrana hücumların bərpa olunmasını istədiyi mesajını çatdırıblar. Bildirilir ki, İrana, xüsusən də onun yanacaq və enerji obyektlərinə hücum ehtimalı danışıqlar zamanı İranı nüvə proqramına son qoymağa razı salmağa məcbur etmək məqsədi ilə də müzakirə olunub. İsraildə bütün ssenarilərə, xüsusən də İranın mümkün qisas hücumlarını yenidən başlatmasına qarşı hazırlıqların getdiyi bildirilir.
Çinə səfərindən sonra İranla bağlı qərar verməsi gözlənilən Trampın iki variantının olduğu irəli sürülür - ya İranı yenidən bombalamaq, ya da Hörmüz boğazında qalmış ticarət gəmilərini çıxarmaq üçün "Azadlıq Əməliyyatı"nı yenidən başlatmaq.
"Haaretz" qəzetinə danışan İsrail rəsmiləri isə, Təl-Əvivdə fövqəladə vəziyyət olmasa da, yaxın günlərdə hücumların yenidən başlanma ehtimalının olduğunu iddia ediblər.
Bu arada, məlum olub ki, İsrail prezidenti İsxak Hersoq ABŞ-a gözlənilən səfərini ləğv edib. O, Nyu-Yorkda bir seminarda çıxış etməli idi. Səfər Hersoqun planlaşdırılmış çıxışı ilə bağlı Fələstinyönümlü fəalların tənqidləri və etirazları fonunda ləğv edilib. Ancaq prezidentin mətbuat xidmətindən bildirilib ki, qərar ona qarşı mümkün aksiyalarla əlaqəli deyil, səfərin ləğvi mövcud şəraitlə bağlıdır.
Tahir TAĞIYEV
