ABŞ Prezidenti Donald Tramp Çinə səfəri çərçivəsində Pekində Çin Prezidenti Si Cinpinlə ikitərəfli və nümayəndə heyətləri səviyyəsində danışıqlar aparıb.
Tarixi görüşdən sonra Ağ Evdən görüşün yaxşı keçdiyi bildirilib. İki liderin iqtisadi əməkdaşlığın gücləndirilməsi yollarını, Amerika şirkətlərinin Çin bazarına çıxışının genişləndirilməsi və investisiyaların artırılması məsələlərini müzakirə etdiyi bildirilib.
Açıqlamada həmçinin İran və Hörmüz boğazı məsələlərinə də toxunulub. Tərəflərin Hörmüz boğazının açıq qalması barədə razılığa gəldiyi vurğulanıb. "Hər iki tərəf enerjinin sərbəst axınını təmin etmək üçün Hörmüz boğazının açıq qalması barədə razılığa gəlib. Prezident Si boğazın militarizasiyasına və istifadəsinə rüsum/tarif tətbiq edilməsinə qarşı olduğunu açıq şəkildə bildirib və Çinin boğazdan asılılığını azaltmaq üçün gələcəkdə daha çox ABŞ nefti almaqda maraqlı olduğunu bildirib. Hər iki ölkə İranın heç vaxt nüvə silahına sahib olmayacağı barədə razılığa gəlib" – deyə Ağ Evin açıqlamasında bildirilib.
Bildirilib ki, ABŞ və Çin İranın heç vaxt nüvə silahına sahib olmaması barədə razılığa gəliblər.
Ancaq maraqlıdır ki, Ağ Evin açıqlamasında Tayvandan bəhs edilməyib.
Çin lideri Trampla ikitərəfli görüşdə Tayvan məsələsinin Çin-ABŞ münasibətləri üçün ən vacib məsələ olduğunu bildirib. Si bildirib ki, bu məsələ düzgün həll olunarsa, ikitərəfli münasibətlərdə sabit irəliləyiş əldə edilə bilər, əks halda iki ölkə arasında problemlər yaranacaq və ikitərəfli münasibətlər təhlükə altında qalacaq.
Görüşdən sonra Si ilə birlikdə Cənnət Məbədini ziyarət edən Tramp, jurnalistlərin Tayvan məsələsinin müzakirə olunub-olunmadığı sualını cavabsız qoyub.
Tahir TAĞIYEV
