ABŞ-ın maliyyə qalası olan “Fort Knox”, tarixin ən böyük auditlərindən birinin keçirildiyi məkan ola bilər. Vəzifəyə başladığı gündən bəri federal xərclərdəki qanun pozuntularına qarşı mübarizə aparan Tramp indi Kentukki ştatındakı nəhəng qızıl anbarına göz dikib.
Tramp dünyanın ən ciddi mühafizə olunan hərbi obyektlərindən biri olan “Fort Knox”un qapılarını açmağa hazırlaşır.
Televiziya proqramında çıxış edən 79 yaşlı prezident “Fort Knox”un qalın qapılarını döymək və içəridə nə olduğunu görmək ideyasını ciddi şəkildə düşündüyünü deyib.
“Fort Knox”. Çox qalın bir darvazası var. Orada qızıl olub-olmadığını yoxlamaq istəyirik. Görəsən, çoxlu soyğunçuluq etdikləri üçün qızılı “Fort Knox”damı saxlayıblar? Nə vaxtsa ora gedib qızılın hələ də orada olub-olmadığını görmək istəyirəm", - deyə Tramp bildirib.
Trampın bu sözlərinə ən güclü dəstək isə Elon Maskdan gəlib. Mask sosial media paylaşımlarında qızılın mövcudluğunu şübhə altına alıb: "Orada olduğunu deyirlər, bu doğrudurmu? Yoxsa kimsə qurğuşunu rəngləyib qızıl kimi təqdim edir?"
Maskın canlı yayımda yoxlama təklifi "şəffaflığın olmaması"na görə tənqid edilən obyektə təzyiqi daha da artırıb.
ABŞ Zərbxanasının (United States Mint) məlumatına görə, “Fort Knox”da 147,3 milyon unsiya təmiz qızıl var. Cari bazar dəyərlərinə əsasən, bu ehtiyatların dəyəri təxminən 435 milyard dollar 700 milyard dollar arasında dəyişir. 20 ton ağırlığında zərbəyə davamlı qapıları və 750 ton möhkəmləndirilmiş polad konstruksiyası ilə tanınan bu müəssisədə yalnız qızıl saxlanılmır. Həmçinin Magna Cartadan Müstəqillik Bəyannaməsinə qədər dünya tarixinin ən dəyərli sənədlərini də müharibə dövründə qoruyub saxlayıb.
Tramp və Maskın şübhələrini artıran ən böyük amil, obyektin 1953-cü ildən bəri hərtərəfli fiziki yoxlamadan keçməməsidir. ABŞ Maliyyə Naziri Skott Bessent hər il müntəzəm yoxlamaların aparıldığını və bütün qızılların yerində olduğunu iddia etsə də, ictimaiyyət arasında “qızılın gizli şəkildə satıldığı” və ya “saxtaları ilə dəyişdirildiyi” barədə iddialar gündəmdən düşmür. Bü günə qədər obyektə daxil olan yeganə ABŞ prezidenti 1943-cü ildə Franklin D. Ruzvelt olub.
Tramp əvvəllər də bunu gündəmə gətirmişdi. Yoxlama tələbinin sadəcə maraq məsələsi deyil, zərurət olduğunu bildirmişdi: "İndiyə qədər yüz milyardlarla dollar dəyərində fırıldaqçılığı aşkar etmişik və bu, yalnız başlanğıcdır. “Fort Knox”a gedib yoxlayacağıq, çünki bəlkə kimsə artıq bütün bu tonlarla qızılı oğurlayıb. Oraya gedirsən və yer boşdur."
Tahir TAĞIYEV
