ABŞ prezidenti Donald Trampın həm Pentaqona, həm də müttəfiqləri qarşısında aciz olduğunu iddia edən İran İnqilab Keşikçiləri Korpusu (SEPAH), Trampa yeni Hörmüz planı ilə bağlı xəbərdarlıq edib.
Hörmüz boğazı ilə bağlı yeni planın açıqlanmasından sonra İran İnqilab Keşikçiləri Korpusu, Trampın İran siyasəti ilə bağlı küncə sıxışdırıldığını iddia edib.
Sosial media vasitəsilə yaydığı açıqlamada SEPAH, ABŞ-a yeni planla bağlı xəbərdarlıq edib: "İranın blokada ilə bağlı Pentaqona ultimatumu... Çin, Rusiya və Avropanın Vaşinqtona qarşı tonunu dəyişdirməsi... Trampın Konqresə göndərdiyi passiv məktubu və İranın şərtlərini qəbul etməsi hamısı bir şeyi ifadə edir. Tramp mümkünsüz əməliyyatla İranla pis bir razılaşma arasında seçim etməlidir".
Bundan əvvəl açıqlama verən ABŞ prezidenti Tramp İranın ABŞ-a göndərdiyi yeni sülh planını tezliklə nəzərdən keçirəcəyini, lakin planın "məqbul" olacağını düşünmədiyini bildirib.
O, İranın son 47 ildə bəşəriyyətə və dünyaya etdiklərinə görə hələ də kifayət qədər böyük bədəl ödəmədiyini iddia edib. "Bütün bunları nəzərə alsaq, bu planın məqbul olacağını düşünmürəm" – deyə Tramp bildirib.
İran xarici işlər nazirinin müavini Kazem Qaribabadi müharibəyə son qoymaqla bağlı təklifin ABŞ-a Pakistan vasitəsilə çatdırıldığını bildirib: "Top artıq münaqişəni davam etdirmək, yoxsa diplomatiya aparmaq barədə qərar qəbul edəcək ABŞ-ın meydançasındadır. İran milli maraqlarını və təhlükəsizliyini təmin etmək üçün hər iki yola da hazırdır və hər halda, ABŞ-a və diplomatik prosesdəki səmimiyyətinə qarşı pessimizmini və inamsızlığını həmişə qoruyacaq".
İran Parlamentinin sədr müavini Əli Nikzad da Hörmüz boğazının idarə olunması ilə bağlı 12 maddəlik planın hazırlandığını bildirib. Onun sözlərinə görə, plana əsasən, İsrailə məxsus gəmilərin Hörmüz boğazından keçməsinə heç vaxt icazə verilməyəcək: “Düşmən ölkələrə məxsus gəmilərə də müharibə təzminatı ödəmədikləri təqdirdə keçid icazəsi verilməyəcək. Digər gəmilər isə parlament tərəfindən qəbul ediləcək qanuna uyğun olaraq və İranın icazəsi ilə Hörmüz boğazından keçə biləcəklər".
Yeni qaydaların beynəlxalq hüquqa və qonşu ölkələrin hüquqlarına hörmətlə hazırlanacağını vurğulayan Nikzad, Hörmüz boğazında gəmilərin hərəkətinin müharibədən əvvəlki kimi olmayacağını bildirib: "Hörmüz boğazındakı hüquqlarımızdan imtina etməyəcəyik və boğazda gəmilərin hərəkəti müharibədən əvvəlki kimi olmayacaq. İranın Hörmüz boğazında yeni qaydaları neft sənayesinin milliləşdirilməsi qədər vacibdir".
Parlamentin İctimai İşlər Komissiyasının rəhbəri Məhəmməd Rza Rzai isə Hörmüz boğazının idarə olunmasının strateji əhəmiyyətinə diqqət çəkib: "Hörmüz boğazının idarə olunması planına əsasən, boğazdan keçid etmək istəyən bütün gəmilər icazə istəyərkən "Fars körfəzi" adından istifadə etməlidirlər. Tezliklə qanuna çevriləcək bu plana əsasən, gəmilərdən toplanan rüsumların 30%-i hərbi infrastrukturun gücləndirilməsinə, 70%-i isə iqtisadi inkişafa və xalqın dolanışığına sərf olunacaq. Hörmüz boğazının idarə olunması nüvə silahlarından daha vacibdir".
Tahir TAĞIYEV
