Kreml sözçüsü Dmitri Peskov Rusiya prezidenti Vladimir Putinin Kremldə Yevgeni Priqojin və “Vaqner” özəl hərbi şirkətinin (ÖHŞ) komandirləri ilə görüş keçirdiyini təsdiqləyib.
Onun sözlərinə görə, iyunun 29-da baş tutan və təxminən üç saat davam edən görüşdə prezident şirkətin Ukrayna cəbhəsində gördüyü işlərə, həmçinin 24 iyun hadisələrinə qiymət verib:
“Putin komandirlərin izahatlarını dinləyib, onlara işlə təmin olunmaq və gələcək döyüşlərdə istifadə üçün əlavə seçimlər təklif edib. Komandirlər baş verənlərlə bağlı öz versiyalarını açıqlayıblar, dövlət başçısının sadiq tərəfdarları, əsgərləri olduqlarını vurğulayıblar, bundan sonra da vətən uğrunda döyüşməyə hazır olduqlarını bildiriblər. Bu görüş haqqında deyə biləcəyimiz yalnız budur”.
Kreml sözçüsü görüşdə 35 nəfərin iştirak etdiyini vurğulayıb.
Göründüyü kimi, Putinin hərbi qiyamdan sonra Priqojin və onun dəstəsinin komandirləri ilə Kremldə görüşdüyünü Peskov təsdiqlədi. Putin Priqojinin qiyamı hadisəsini xəyanət kimi qiymətləndirmişdi. Ardınca Priqojini Kremldə qəbul etməsi hansı mənanı verir? Rusiyanın Priqojinlə hesablaşdığı və onun əlində aciz olduğu qənaətinə gəlmək olarmı?
Politoloq Amid Əliyev “Bakı-Xəbər”ə açıqlamasında bildirdi ki, Rusiyada Priqojin üsyanı bir neçə məsələ ilə bağlı gizli qalan məqamlara aydınlıq gətirdi:
“Birincisi, Rusiyada siyasi sferada çatlar o qədər dərinləşib ki, həm şaquli, həm də üfüqi olaraq dövlət idarəetməsində ciddi böhranlar yaranıb.
İkincisi, orduya rəhbərlik və eləcə də təminat məsələləri yarıtmaz vəziyyətdədir.
Üçüncüsü, Rusiyada müharibə əleyhinə olan gizli və ya aşkar narazı təbəqə formalaşıb. Pruqojin üsyanını birmənalı qiymətlənditmək olmaz. Burada bir neçə versiya ola bilər. Belə ki, bunun məhz Putin tərəfindən düşünülmüş bir oyun olması və bütün uğursuzluqların məhz “Vaqner”in üzərinə qoyulması versiyası səsləndirilir. Eyni zamanda bu, Qərbin dəstəyi ilə Putinin zəif tərəflərinin müəyyən edilməsi cəhdi kimi də qiymətləndirilə bilər. Lakin diqqəti çəkan məqam ondan ibarətdir ki, Putin dəfələrlə “Vaqner” hərbi birliyinin RF-yə aid olmadığını və dövlət tərəfindən dəstəklənmədiyini söyləyib. Ancaq Ukrayna müharibəsi fonunda bu birliyin hərbi əməliyyatlarda iştirakı və təminatı yixarıdakı fikirləri tam şəkildə təkzib etdi. Hətta RF MN ilə olan narazılıq üsyan səviyyəsinə qədər çatdı. Gözlənilirdi ki, RF-də 90-cı illərdə baş vermiş QKÇP hadisəsi təkrarlansın. Son anda Putinin güzəştə getmək istəyi və Lukaşenkonun vasitəçiliyi buna mane oldu. Hesab etmək olar ki, bu, sonun başlanğıcıdır. Çünki Putin kimi bir siyasi lider bir masada ona və dövlətə üsyana qalxmış şəxslə danışıqlar aparıb müəyyən razılıqlar əldə edibsə, deməli RF gücü və imkanları haqqında gecə-gündüz işləyən təbliğat maşını boş yerə baş ağrıdırmış. Rusiyanın hazırki vəziyyəyi onu deməyə əsas verir ki, daxildəki narazılıqlardan yarana biləcək və real olaraq RF gələcəyinə təsir edə biləcək qüvvələr, qruplar, şəxslər və xalq xarici qüvvələrdən daha güclüdür. Buna görə də Putin Priqojinlə görüşərək bu real qüvvəni RF-dən uzaqlaşdırmağı üstün tutdu. Lakin bu hələ son deyil. Müharibə uzandıqca, təminat və itkilərdə rəqəmlər artıqca narazı kütlənin sayı artacaq. Bu dəfə isə üsyan siyasi cəbhədə baş verəcək. Bu da Rusiya üçün tarixən ən ağrılı məqam hesab olunub. Çünki siyasi böhrandan çıxmaq Rusiya üçün hər zaman ağır qurbanlarla müşahidə olunub.
Rusiyanın hazırki siyasi hakimiyyəyi müharibə siyasətində ciddi dəyişikliklər etməsə, rus xalqını oyatmaqda davamlı olan Qərb ideologiyası belə fürsəti əldən buraxmayacaq”.
Məhəmmədəli QƏRİBLİ
