Fikrət Yusifov: “Bu məsələdə hər şey İtaliyadan asılı deyil, gərək digər aparıcı üzvlər də buna maraq göstərsin”
Prezident İlham Əliyev İtaliya Nazirlər Şurasının sədri Ciorcia Meloni ilə mətbuata bəyanatında bildirib ki, qaz ixracını artırmaq üçün Trans Adriatik Boru Kəməri (TAP) genişləndirilməlidir:
“Keçən il Azərbaycan 25 milyard kubmetr təbii qaz ixrac edib, onun 9,5 milyardı İtaliya bazarına ixrac olunmuşdur. Bu gün söhbətlər və danışıqlar əsnasında biz bu həcmi artırmaq üçün müzakirələr aparmışıq. Bunun üçün təbii ki, Cənub Qaz Dəhlizinin tərkib hissəsi olan TAP layihəsinin genişləndirilməsi lazımdır. Artıq müəyyən dərəcədə genişləndirilib, amma bu proses davam etdirilməlidir”.
Prezident Əliyev Avropaya əlavə qazın ixracı ilə bağlı Cənub Qaz Dəhlizinin genişləndirilməsinə dəfələrlə çağırış edib, amma Avropa İttifaqı buna tələsmir. İtaliya kimi aparıcı dövlət bu məsələdə dönüşün əldə edilməsində nə kimi rol oynaya bilər?
Sözügedən məsələyə münasibət bildirən sabiq maliyyə naziri, professor Fikrət Yusifov baki-xeber.com-a açıqlamasında buna bir neçə prizmadan yanaşdı: “Azərbaycan bu gün Avropa İttifaqının on üzv dövlətinə qaz ixrac edir. Bütövlükdə qaz ixrac etdiyimiz ölkələrin sayı artıq 16-ya çatıb. Bu sahədə qarşıda dayanan əsas hədəfimiz, ixrac coğrafiyasını daha da genişləndirmək və ixrac olunan qazın həcmini artırmaqdır. Hesab edirəm ki, Azərbaycan bu məqsədlə öz daxili qaz ehtiyatları ilə yanaşı, yaxın gələcəkdə digər qonşu ölkələrin də qazının ölkəmiz üzərindən daşınması variantlarını nəzərdən keçirir. Məsələn, Xəzərin şərqində, qonşu Türkmənistanda dünyanın ən böyük qaz yataqlarından biri mövcuddur. Nədən həmin qazın Azərbaycan üzərindən Avropaya daşınması baş tutmasın? Bu həm Türkmənistanın, həm Azərbaycanın və həm də Avropa ölkələrinin maraqlarına tam uyğun bir layihə ola bilər. Bu istiqamətdə görüləcək əsas işlərdən biri də Azərbaycandan başlayaraq artıq Avropanın mərkəzlərinə qədər gedib çatmış Cənub Qaz Dəhlizinin TAP xəttinin imkanlarını genişləndirməkdir. Bunun üçün Avropa ölkələri öz sözünü deməli və bu xəttin genişləndirilməsi üçün səylərini əsirgəməməlidirlər. Çünki, Avropa İttifaqı ölkələrinin qaza olan tələbatı bu gün daha böyükdür. Onlar əvvəllər Rusiyadan aldıqları qazdan artıq məhrum olublar. Belə bir durumda alternativ qaz mənbələrinin yaradılması olduqca vacibdir.. Hesab edirəm ki, İtaliya Avropa İttifaqında olan nüfuzundan istifadə edərək səylərini artıracaq. Ancaq qurumun Cənub Qaz Dəhlizinin genişləndirilməsinə vəsait ayırması məsələsində hər şey İtaliyadan asılı deyil. Gərək digər aparıcı üzvlər də buna maraq göstərsin”.
Vidadi ORDAHALLI
