Tural İsmayılov: “Ermənistan müxalifətinin narahatlığı həm də ondan qaynaqlanır ki, beynəlxalq platformalarda Azərbaycanın siyasi çəkisi və etibarlı tərəfdaş imici gücləndikcə...”
Azərbaycan Prezidenti İlham Əliyevin Avropa Siyasi Birliyinin (ASB) İrəvanda keçirilən sammitinə videobağlantı formatında qoşulmasına görə Ermənistan müxalifəti bu ölkənin Baş naziri Nikol Paşinyanı sərt şəkildə tənqid edib.
Müxalifət Avropa sammitində Prezident İlham Əliyevə onlayn da olsa çıxış platforması verdiyi üçün Paşinyanı qınayır...Yəni revanşist qüvvələr düşünürlər ki, Paşinyan Əliyevin çıxışına izn verməməli idi.
Əliyevin sözügedən sammitdə çıxışı müxalifəti niyə belə narahat edib? Onlar niyə bundan narahat olublar?
Politoloq Tural İsmayılov baki-xeber.com-a bildirdi ki, Ermənistan müxalifətinin əsas narahatlığı İlham Əliyevin Avropa Siyasi Birliyi platformasında çıxış etməsi deyil, həmin çıxışın Avropa siyasi auditoriyası qarşısında Azərbaycanın formalaşdırdığı yeni regional reallıqları bir daha legitimləşdirməsidir: “Çünki rəsmi Bakı artıq uzun illər olduğu kimi müdafiə olunan tərəf yox, regional gündəliyi müəyyən edən əsas siyasi aktor kimi çıxış edir. Bu isə Ermənistan daxilindəki radikal dairələri ciddi şəkildə narahat edir.
Paşinyana qarşı irəli sürülən ittihamların mahiyyəti də bundan ibarətdir. Müxalifət düşünür ki, Avropa platformalarında İlham Əliyevin çıxış imkanları genişləndikcə Azərbaycanın diplomatik arqumentləri daha çox qəbul edilir və Ermənistanın illərlə qurmağa çalışdığı “təcrid olunmuş Azərbaycan” narrativi tamamilə dağılır. Əslində isə Ermənistan müxalifəti emosional və köhnəlmiş siyasi yanaşmanın girovuna çevrilib”.
T.İsmayılov vurğuladı ki, İlham Əliyevin çıxışlarında əsas diqqət regional sabitlik, kommunikasiya xətlərinin açılması, enerji təhlükəsizliyi və beynəlxalq hüquq prinsiplərinə yönəlir: “Avropa isə hazırkı geosiyasi şəraitdə məhz praqmatik və nəticəyönümlü siyasətə üstünlük verir. Bu baxımdan Azərbaycan Prezidentinin mesajları Avropa siyasi dairələrində daha rasional və realist qəbul olunur.
Ermənistan müxalifətinin narahatlığı həm də ondan qaynaqlanır ki, beynəlxalq platformalarda Azərbaycanın siyasi çəkisi və etibarlı tərəfdaş imici gücləndikcə, İrəvanın daxili siyasi manipulyasiya imkanları zəifləyir. Onlar anlayırlar ki, regional proseslər artıq köhnə stereotiplərlə deyil, yeni geosiyasi maraqlar üzərindən idarə olunur.
Digər mühüm məqam isə odur ki, Ermənistan daxilində müəyyən qüvvələr hələ də informasiya və diplomatiya müharibəsinin köhnə metodlarla aparıldığını düşünür. Halbuki, beynəlxalq siyasətdə platformadan kiminsə uzaqlaşdırılması deyil, kimin daha güclü siyasi arqumentlər təqdim etməsi həlledici faktor hesab olunur. İlham Əliyevin çıxışları da məhz bu baxımdan Ermənistan daxilində ciddi siyasi müzakirə yaradır”.
İradə SARIYEVA
