Artıq bəllidir ki, bu gün Ukraynada Rusiya və Qərb arasında savaş gedir. Bu savaşda tərəflərdən heç biri geri çəkilmək niyyətində olmadığından, müharibənin daha qanlı xarakter alması proqnozlaşdırılır.
Hazırda Qərb üçün maraq doğuran əsas məsələ Ukraynanın barəsində müəyyən müddətdir anons edilən əks hücumu ilə bağlıdır. Bu fonda Ukraynanın cəbhə xəttinin Zaporojye bölgəsi və Donetsk vilayətinin bir neçə istiqamətində kəskin döyüşlər gedir və bu, Ukraynanın çoxdan gözlənilən hücumunun başlaya biləcəyinə işarədir. Ukraynanın xarici işlər naziri Dmitri Kuleba Kiyevdə verdiyi müsahibə zamanı Ukraynanın Rusiyaya qarşı çoxdan gözlənilən əks-hücuma hazır olduğunu desə də, hücumun artıq başlayıb-başlamaması, və ya nə vaxt başlayacağı ilə bağlı sualı cavabsız qoyub. Kuleba Ukraynanın Rusiyaya qarşı planlaşdırdığı hücumun müharibənin gedişatını dəyişdirəcəyinə və Ukraynaya öz ərazilərini Rusiyadan geri almağa imkan verəcəyinə əmin olduğunu bildirib. Onun sözlərinə görə, belə bir qələbə Ukraynanın NATO-ya daxil olmasına səbəb olacaq. İndilikdə Ukrayna qüvvələri Zaporojye və Donetsk vilayətləri sərhədində Rusiyaya qarşı hücum əməliyyatlarını artırıb. Lakin Kiyev əks-hücumun başladığı və Rusiya ordusunun Donetsk bölgəsində Ukraynanın genişmiqyaslı hücumunun qarşısını aldığı barədə xəbərləri təkzib edib. Ukraynanın Milli Təhlükəsizlik və Müdafiə Şurasının katibi Oleksiy Danilov isə qeyd edir ki, Rusiya Ukrayna Silahlı Qüvvələrinin əks-hücumunu heç bir vasitə ilə gecikdirə bilməyəcək: “Hücuma gəlincə, bu bizim planımız üzrə olacaq. Ali Baş Komandanın qərargahında müəyyənləşəndə həyata keçiriləcək. Kaxovka bəndinin partladılması bizim hücuma mane olmayacaq”. Xatırladaq ki, iyunun 6-da gecə saatlarında baş verən partlayış nəticəsində Kaxovka su elektrik stansiyasındakı bəndin 28 dirəyindən 11-i dağılıb. Kiyev Kaxovka su elektrik stansiyasındakı bəndin rusiyalı hərbçilər tərəfindən partladıldığını bildirib. Rusiya Kaxovka su elektrik stansiyasının partladılmasında Ukrayna tərəfini təqsirləndirib. Rusiya prezidentinin mətbuat katibi Dmitri Peskov jurnalistlərə müsahibəsində su elektrik stansiyasının Ukrayna tərəfindən partladıldığını deyib: “Birmənalı şəkildə deyə bilərik ki, bu, Ukrayna tərəfinin təxribatıdır. Bu təxribat regionun on minlərlə sakini, ekologiya üçün, eləcə də hələ məlum olmayan digər ağır nəticələrə gətirib çıxara bilər”. Bu fonda müharibənin sonrakı gedişinin necə olacağı xüsusi maraq doğurur.
Kiyev bəyan edir ki, bəndin dağıdılması əks-hücum əməliyyatına mane olmayacaq. ABŞ-ın Birləşmiş Qərargah Rəisləri Komitəsinin rəhbəri general Mark Milli də məsələyə eyni prizmadan yanaşır: “Ukrayna ərazisində son vaxtlar döyüşlər daha da şiddətlənib. Ukrayna Silahlı Qüvvələri əks-hücum üçün yaxşı hazırlaşıb, lakin müharibə hələ uzun müddət davam edəcək”. Mark Milli Ukraynada hərbi əməliyyatların intensivliyinin artdığını qeyd edib. O inanır ki, döyüş asan olmayacaq və müəyyən vaxt aparacaq: “Normandiya döyüşü və ya hər hansı digər böyük döyüş kimi, müharibə də bir qiymətdir. Çox aktivlik görəcəyiniz günlər də olacaq, çox az aktivliyin olacağı günlər də. Hücumedici və müdafiə hərəkətləri. Ona görə də bu, uzun müddət ikitərəfli mübarizə olacaq”. O hesab edir ki, Ukrayna silahlı qüvvələri Rusiyanın genişmiqyaslı işğalından sonra ölkəni yaxşı müdafiə edib. Sonradan müttəfiqlər tərəfindən verilən təlim və silahlar Ukrayna ordusunu əks-hücumlara yaxşı hazırlayıb: “Bunun üçün çox hazırlıq görülüb, çoxlu təchizat, silah-sursat digər ölkələr, o cümlədən ABŞ tərəfindən təmin edilib. Düşünürəm ki, onlar, növündən asılı olmayaraq, öz uyğun gördükləri işə hazırdırlar”. Bu fonda Rusiya Müdafiə Nazirliyi Ukraynanın məqsədinin cəbhə xəttində ən zəif hesab etdiyi Donetskdə ərazini yarmaq olduğunu, lakin bunun uğurla nəticələnmədiyini bildirib. Rusiyanın dediyinə görə, Ukrayna hücumu zamanı altı mexanikləşdirilmiş batalyon və iki tank batalyonundan istifadə edib. Ukrayna bu iddiaları dezinformasiya adlandıraraq rədd edib. Qərbdə isə fikirlər səslənir ki, Ukrayna əks-hücumu effektiv olmasa, məsələyə NATO müdaxilə edə bilər. NATO-nun keçmiş Baş katibi Anders Rasmussen bu xüsusda bildirir: “Alyansın Vilnüsdə keçiriləcək yay sammitində Kiyevə real təhlükəsizlik zəmanəti verilməsə, bəzi NATO ölkələri Ukraynaya qoşun yeritmək istəyə bilər”. O, sammit öncəsi ölkələrin münasibətini öyrənmək üçün Avropa və ABŞ-a işgüzar səfər etdiyini bildirib. Onun fikrincə, əgər NATO Ukraynaya təşkilata daxil olmaq üçün aydın imkan yarada bilməsə, o zaman bəzi ölkələr ayrı-ayrılıqda hərəkətə keçə bilər: “Biz bilirik ki, Polşa Ukraynaya konkret yardım göstərməklə fəal məşğuldur. Və mən Polşanın bu kontekstdə milli əsasda daha da güclü hərəkət edəcəyini istisna etməzdim”.Rasmussen əlavə edib ki, Ukraynanın hərbi yardımla bağlı müraciəti tamamilə qanunidir. O, həmçinin vurğulayıb ki, təhlükəsizlik zəmanətləri yazılı şəkildə və daha yaxşı olar ki, sammitdən əvvəl verilsin: “Təhlükəsizlik təminatları kəşfiyyat məlumatlarının mübadiləsini, Ukrayna ilə birgə təlimləri, silah-sursat istehsalının artırılmasını, NATO-ya uyğunluğu və Rusiyanın gələcək hücumlarından çəkindirmək üçün kifayət qədər silah təchizatını əhatə etməlidir”.
Nahid SALAYEV
