Məlum olur ki, Fransa nəinki Qarabağ məsələsində, Ukrayna məsələsində də vasitəçi olmaq hüququnu itirib. Prezident Emmanuel Makronun apardığı bərbad siyasət üzündən Fransanın beynəlxalq nufuzu getdikcə zəifləyir.
Bu arada Rusiya Prezidentinin mətbuat katibi Dmitri Peskov bəyan edib ki, Ukraynadakı müharibənin nizamlanmasında Fransa vasitəçi olmamalıdır. Kremlin sözçüsü Çin lideri Si Cinpinin Makronla danışıqlardan sonra səsləndirdiyi Parisin öz sülh planını yaratmaq təklifini belə şərh edib: “Paris Kiyev və Moskva arasında danışıqlarda vasitəçi olduğunu iddia edə bilməz, çünki o, münaqişənin iştirakçılarından birinin tərəfini tutur. Fransa dolayısı ilə və birbaşa olaraq Ukrayna tərəfində münaqişədə iştirak edir. Ona görə də Fransanın vasitəçilik səylərini təsəvvür etmək çətindir”.
Görünən odur ki, Fransa Cənibi Qafqazdan sonra Ukrayna məsələsində də vasitəçi olmaq şansını itirdi.
“Separatizmi himayə edən dövlət Rusiya ilə Ukrayna arasında vasitəçi ola bilməz”
Məsələyə münasibət bildirən İdarəçilik Akademiyasının müəllimi, sosioloq Hüseyn İbrahimovun fikrincə, Fransa tərəfkeşlik mövqeyindən çıxış etdiyi üçün vasitəçi ola bilməz: “Peskovun Fransa ilə bağlı səsləndirdiyi fikirlər reallığı əks etdirir. Bəlkə də Rusiya-Ukrayna müharibəsinin ilk dövrlərində Paris tərəflər arasında vasitəçi ola bilərdi. Ancaq çox keçmədi ki, Makronun ikibaşlı oyun oynadığı ortaya çıxdı. Məlum oldu ki, Fransa prezidenti Zelenskini təslim olmağa çağırıb. Yəni, Kiyevi müəyyən ərazilərin Rusiyaya verilməsinə razı salmağa çağırıb. Sonra ABŞ başda olmaqla bir sıra ölkələrin Makrona təzyiq etməsindən sonra Paris mövqeyini dəyişdi. Belə baxanda Makronun riyakarlığı bizim üçün təəccüblü deyil. Bu, həmin Makrondur ki, 44 günlük Vətən müharibəsi zamanı Ermənistanın yanında durdu. Müharibə bitəndən sonra daha həyasız formada erməni separatçılarını himayə etmək yolunu tutdu. Təzad doğuran məqam odur ki, Fransa illərdir separatizm təhdidləri ilə üz-üzədir. Ancaq buna baxmayaraq, erməni separatizmini dəstəkləyir. Əlbəttə ki, belə bir dövlət tərəflər arasında vasitəçi ola bilməz. Fransa “Ramştayn” çərçivəsində Ukraynanın silahlanmasında iştirak edir. O zaman Paris Kiyevlə Moskva arasında necə vasitəçi ola bilər? Gedən proseslər onu göstərir ki, yeni dünya düzəninin formalaşmasında Fransanın iştirakı getdikcə zəifləyir. Baxmayaraq ki, Fransa Avropa İttifaqının əsas ölkələrindən biridir. Tarixən Fransa ilə Rusiya arasında xüsusi münasibətlər olsa da, son illər iki ölkə arasında etimatsızlıq mühiti güclənir. Məhz bunun nəticəsidir ki, Moskva Fransanın vasitəçilik təşəbbüsünü rədd etdi. Böyük dövlətlərin güclənməsinə yön verən faktorlardan biri də şəxsiyyət amilidir. Fransanın müasir siyasi tarixini müqaisəli təhlil etsək görərik ki, Jak Şirakdan sonra Fransa prezidentləri xarizma böhranı yaşayır. Makron ümumiyyətlə, bütün bunlardan məhrum siyasi personadır. Daha çox qeyri-ciddi siyasi imicə malikdir. Bunu Fransa daxilində yaşanan sosial gərginlik də sübut edir. Ona görə də Rusiya Fransaya etmad göstərmir. Makron hakimiyyətinin nüfuzdan düşməsi Azərbaycanın maraqlarına cavab verir. Çünki Qarabağ məsələsində olduğu kimi, Ukrayna məsələsində də Fransa tərəfkeş mövqedən çıxış edir”.
Vidadi ORDAHALLI
