12/11/2019 22:08
728 x 90

Azərbaycanda siyahıyaalmanın daha təkmil nəticələnməsi üçün zəruri dəyişiklik qərarı verildi

Vüqar Rəhimzadə: “Əhalini siyahıyaalmanın vaxtının uzadılması daha səhih məlumatlar əldə edilməsinə böyük təkan verəcək”

img

Azərbaycanda hər on ildən bir əhalini siyahıyaalma prosesi həyata keçirilir. Bu il oktyabrın 1-dən başlanan əhalini siyahıyaalma prosesinin ilkin mərhələsi başa çatsa da, işlər hələ tam olaraq yekunlaşmayıb. Məlumatlara görə, ölkə vətəndaşlarını siyahıyaalma prosesinin oktyabrın 10-da başa çatması nəzərdə tutulsa da, bir sıra səbəblərdən tədbirin vaxtı oktyabrın 15-ə qədər uzadılıb.

Dövlət Statistika Komitəsinin məlumatına görə, buna səbəb sayıcıların vətəndaşların ünvanlarına getmələrinə baxmayaraq, ev təsərrüfatının başçısı və ya üzvləri ilə görüşə bilməməsidir.

Dövlət Statistika Komitəsinin mətbuat katibi Elməddin Quliyevin verdiyi məlumata görə, belə olan halda, siyahıyaalmanın aparılması qaydalarına uyğun olaraq, əvvəlcədən müəyyənləşdirildiyi kimi, sayıcılar tərəfindən həmin şəxslər üçün "Evdə çətin tapılan şəxslərə məktub" adlı sənəd tərtib edilir və ev təsərrüfatının yaşadığı ünvan üzrə giriş qapısına bərkidilir. Həmin bildirişdə qeyd olunan ünvanda sorğunun keçirilməsi üçün münasib vaxtın təyin edilməsi və sayıcı ilə əlaqə saxlanıb bu barədə məlumat verilməsi xahiş edilir.

O vurğulayıb ki, əhalinin bir hissəsi, hətta işsiz təbəqə, gününü evdə keçirən təqaüdçülər belə onların qapılarının döyülmədiyini, siyahıya alınmadıqlarını bildirirlər. Əhalinin işlək təbəqəsi isə evdə olmadıqlarına görə onların qapılarına heç bir bildiriş kağızının qoyulmadığını bildiriblər.

Bəzi sakinlər isə onlara mobil və stasionar telefonla zəng edildiyini, sadəcə olaraq ad, soyad, ata adı və təvəllüdlə bağlı sualların verildiyini söyləyiblər.

Qeyd edək ki, bir sıra vətəndaşlar sayıcıların onların ünvanına baş çəkmədiklərini, ümumiyyətlə, heç bir vasitə ilə əlaqə saxlamadıqlarını bildirirlər. Bu məsələyə də E.Quliyev aydınlıq gətirib. O, mətbuata açıqlamasında “Bütün bunlar iddiadır. Kiminsə konkret faktı varsa, desin, bizim "Qaynar xətt"ə (510 07 89; 539 54 44; 539 80 44) müraciət etsinlər, biz də bunu araşdıraq. Sayıcılar həmin ünvana gələrək siyahıyaalmanı həyata keçirsinlər” - deyə bildirib.

Telefonla siyahıyaalmanın düzgün olub-olmamasına gəlincə, E.Quliyev bildirib ki, belə bir addımın atılması əhalini siyahıyaalma ilə bağlı qaydalara ziddir: “Bununla bağlı konkret fakt varsa, bu zaman yenə də bizim "Qaynar xətt"ə zəng edib məlumat versinlər”.

Qeyd edək ki, siyahıyaalma üçün oktyabrın 10-u son gün olsa da, bu günlərin sayı bir qədər də artırılıb. Oktyabrın 15-dək evdə tapılmayan şəxslərin ünvanlarına bir daha baş çəkiləcək.

  • “...daha üstün nəticələr əldə edilməsinə faydası böyükdür”

 “İki Sahil” qəzetinin baş redaktoru Vüqar Rəhimzadə “Bakı-Xəbər”ə bildirdi ki, vətəndaşları siyahıyaalma prosesinin vaxtının bir neçə gün uzadılması müsbət haldır. O hesab edir ki, siyahıyaalmanın vaxtının bir neçə gün uzadılması ölkə əhalisinin tam olaraq siyahıya alınmasına və bu prosesdən heç bir vətəndaşın kənarda qalmamasına səbəb olacaq. “Ölkəmizdə siyahıyaalma prosesi hər on ildən bir keçirilir. Bunun nəticəsində də ölkə əhalisinin sayı, cinsi, sosial vəziyyəti, digər göstəriciləri rəsmi şəkildə müəyyən edilir. Hesab edirəm ki, bu, ölkədə əhali sayının, bütövlükdə, ölkənin dinamik inkişafını ifadə edən bir prosesdir. Şəxsən bizim evə gəldilər və bütün ailə üzvlərimiz siyahıya alındı. Əhalini siyahıyaalmanın vaxtının uzadılması təbiidir. Fikrimcə, əvvəlcə müəyyən edilmiş 10 gün ərzində bütün vətəndaşları siyahıyaalma ona görə mümkün olmayıb ki, kimsə evdə olmayıb, başqa birisi məzuniyyətdə olub və s. Əhalini siyahıyaalmanın vaxtının uzadılması dəqiqləşdirməyə, daha səhih məlumatlar əldə edilməsinə böyük təkan verəcək. Bu prosesin uzadılmasının əhalini siyahıyaalmada daha üstün nəticələr əldə edilməsinə faydası böyükdür” - deyə V.Rəhimzadə qeyd etdi.

İradə SARIYEVA

Son xəbərlər