12/11/2019 22:08
728 x 90

“Nutrilak” uşaq qidasından nə çıxdı?

img

Uşağını ana südü ilə qidalandıran analarla yanaşı, bunun əksini edənlər də var. Bəzən isə analar körpələrinə ana südü ilə yanaşı, uşaq qidalarından da verirlər. Bu gün satışda müxtəlif növ və qiymətə uşaq qidaları mövcuddur.

Bu qidalar barədə zaman-zaman müxtəlif fikirlər səsləndirilir, onların uşaqlar üçün zərərli olduğu deyilir. Hətta bir sıra uşaq qidaları da var ki, onların tərkibində soya olduğu, bunun isə GMO komponentinə aidliyi deyilir ki, bu da körpə uşağın orqanizmi üçün təhlükəli hesab edilir.

Satışda olan uşaq qidaları arasında “Nutrilak” adlı qida məhsulu var. Bu günlərdə sosial şəbəkədə adıçəkilən uşaq qidasından qurd çıxması haqqında məlumat yayıldı.

Şikayətçi Asəf Abbasov qeyd edir ki, o, 9 oktyabr tarixində Biləcəridə yerləşən “Şəfa” aptekindən uşaq yeməyi olan “Nutrilak” alıb. Bir neçə dəfə uşağa həmin qidadan verildikdən sonra, qutunun içərisində qurd olduğu müəyyən olunub. Ata hətta bu səbəbdən övladının dərisinin səpdiyini də iddia edib: “Məhsulun istifadə müddəti də bitməyib. Aptekə müraciət etmişəm, dedilər ki, onlarlıq deyil. Mən də Səhiyyə Nazirliyinə müraciət edirəm ki, apteklərdə satılan bu kimi məhsulların mənşəyini araşdırsın”.

  • Azərbaycan Qida Təhlükəsizliyi Agentliyi: “Nutrilak” uşaq qidasından qurd çıxması haqqında məlumat qeydə alındıqdan dərhal sonra AQTA-da aidiyyəti üzrə araşdırmalara başlanıb”

Məsələ ilə bağlı Azərbaycan Qida Təhlükəsizliyi Agentliyinə  (AQTA) müraciət etdik. Agentlikdən bildirildi ki, araşdırmaların nəticəsi barədə ictimaiyyətə məlumat veriləcək: "Qeyd etdiyiniz məsələ ilə bağlı vətəndaş Qida Təhlükəsizliyi Agentliyinin 1003 “Çağrı Mərkəzi”nə məlumat verib. Məlumat qeydə alındıqdan dərhal sonra Qida Təhlükəsizliyi Agentliyində aidiyyəti üzrə araşdırmalara başlanıb. Araşdırmaların nəticəsində qanunvericiliyin tələbləri çərşivəsində tədbirlər görüləcək. Nəticələr barədə ictimaiyyətə məlumat veriləcək. Agentlik vətəndaşlardan xahiş edir ki, qida məhsullarının, xüsusilə uşaq qidalarının təhlükəsizliyi və keyfiyyəti ilə bağlı şübhələri olarsa, bu sahədə neqativ hallarla rastlaşsalar, müəssisənin və məhsulun adı, ünvanı, istehsal tarixi və s. konkret məlumatları qeyd etməklə agentliyin 1003 “qaynar xətt”inə zəng edərək məlumat versinlər".

  • Eyyub Hüseynov: “Körpə qidaları ilə bağlı Azərbaycanda problem çoxdur”

Azad İstehlakçılar Birliyinin sədri Eyyub Hüseynov bildirdi ki, körpə qidaları ilə bağlı Azərbaycanda problem çoxdur: "Ümumdünya Səhiyyə Təşkilatının uşaq qidaları ilə bağlı konvensiyası var. Qanuna görə, körpə qidaları çox reklam olunmamalı, satışı konkret yerlərdə, saxlanma rejimi 20 dərəcədən aşağı temperaturda olmalıdır. Azərbaycanda isə bu qanunlara əməl edilmir. Azərbaycanda uşaq qidalarının distribütorları birbaşa pediatrlarla iş qurur. Bu da qanunsuzdur. Bizə analar şikayət edirlər ki, süni uşaq qidalarının distribütorları onlara zəng edib satdıqları uşaq qidalarını təklif edirlər. Eyni zamanda, uşaq dünyaya gələn kimi uşaqlara xəstəxanalarda artıq süni qida verilir. Bu barədə çox sayda şikayət alırıq".

Günel CƏLİLOVA

Son xəbərlər