Bakı şəhərinin Səbail rayonunda yerləşən 162 saylı məktəbin VIII sinif şagirdi Elina Hacıyevanın intihar görüntüləri yayılıb. Videodan da görünür ki, məktəblini kimsə itələməyib və yaxud təsadüfən yıxılmayıb.
Xatırladaq ki, Elina Hacıyeva aprelin 4-də məktəbin pəncərəsindən özünü aşağı ataraq, intihar edib. Çox sayda ağır xəsarətlər alan qız iki gün sonra xəstəxanada vəfat edib. Məktəbin direktoru Sevinc Abbasova ona müraciət edənlərə Elinanın pozğun və uğursuz ailənin övladı olduğunu, anasının ikinci dəfə ailə qurduğu, ikinci nikahdan kiçik uşaqları olduğuna görə Elina ilə maraqlanmadığını yazmağı xahiş edib.
E.Hacıyevanın intihar videosunun sosial şəbəkədə yayılması ölkə ictimaiyyəti tərəfindən qınaqla qarşılanır. Vəzifəsindən asılı olmayaraq, hər kəs intihar videosunun yayılmasının düzgün olmadığını və bu tip paylaşımların uşaqların psixologiyasına mənfi təsir etdiyini anlamalıdır.
Kamilə Əliyeva: “Bu cür videoların yayılması hər yaş qrupunda olan insana mənfi təsir göstərir”
Milli Məclisin deputatı Kamilə Əliyeva “Bakı-Xəbər”ə açıqlamasında qeyd etdi ki, kriminal videogörüntülərin yayılmasının əleyhinədir: “Bir deputat, vətəndaş olaraq bu cür halların yayılmasının əleyhinəyəm. Bu cür informasiyalar insanların psixikasına mənfi təsir edir. Çünki istər saytlar, istərsə də televiziyalar olsun, azyaşlı uşaqlardan tutmuş, normal və psixoloji durumu yerində olmayan insanlar da baxır. Bu cür videoların yayılması hər yaş qrupunda olan insana mənfi təsir göstərir. Düşünürəm ki, bu cür halların qarşısını almalıyıq. Saytlarda, sosial şəbəkələrdə bu cür halları işıqlandırırıqsa, bunun məqsədi olmalıdır. Bunları işıqlandırmaqla qarşısını alırıqmı?! Halbuki, bu, maarifləndirici iş deyil. Bunun yayılmasında nə məqsəd güdürlər? Ona görə də tam olaraq yayılmasının əleyhinəyəm”.
Müşfiq Ələsgərli: “İntihar, terror halları ilə bağlı detalların...”
Media eksperti Müşfiq Ələsgərli qeyd etdi ki, bu kimi hallar jurnalistlərin peşə davranış qaydalarında da öz əksini tapıb: “İntihar, terror halları ilə bağlı detalların, xüsusilə də gənclərdə meyil yaradacaq nüansların yayımı qəti qadağandır. Bu yolverilməzdir. Səbəbləri isə kifayət qədər izah olunub. Hazırda sosial şəbəkə istifadəçiləri arasında yetkinlik yaşına çatanlar da, çatmayanlar da var. Bu, ciddi problem yarada bilər. Belə hallar Azərbaycan jurnalistlərinin peşə davranış qaydalarının III prinsipi ilə məhdudlaşdırılaraq, qadağan edilib. Bu kimi hallar dəfələrlə olub və bəzi kütləvi informasiya vasitələrinə xəbərdarlıq edilib. Onlara belə görüntülərin yayımının yolverilməzliyi bildirilib. Bu, qəti şəkildə pislənməlidir”.
Aynur Musayeva: “İntihar görüntülərinin yayımlanması mütləq dayandırılmalıdır”
Yeniyetmələri isə video bu istiqamətə yönəldə bilər. Çünki onlar valideynləri, ətraf şəxslərin basqısına məruz qalır, problem yaşayırlar. Bu, həmin yeniyetmələrə çıxış yolu kimi görünə bilər. Bu tip videolar intihar və ölümü uşaqlar üçün adiləşdirəcək. Buna ən asan çıxış yolu kimi baxacaqlar. Ona görə də hərəkətə keçib bunun qarşısını almalıdırlar.
Aqressiya və şiddətə meyllilik uşaqların fərdi xarakterik xüsusiyyətləri ilə bağlıdır. Onları cəmləyib ümumi bir nəticə çıxarmaq düzgün deyil. Amma video da bu aqressiyanı kəskinləşdirə bilər. Qısası, o görüntülər bütün uşaqlar üçün psixoloji travmadır və qarşısı alınmalıdır”.
Həmsöhbətimiz hesab edir ki, artıq videonu izləyən şagirdlərin həyatının təhlükədə olduğunu əsas gətirərək, onlar üçün xüsusi tədbir görülməlidir: “Valideyn və müəllimlər bu videonu izləmiş məktəblilərlə xüsusilə maraqlanmalıdırlar. Çünki onlar artıq bu reaksiyanı veriblər və şüuraltına intihar yeridilib. Həmin uşaqlar mütləq araşdırılmalıdır”.
Günel CƏLİLOVA
