Azərbaycan Avtomobil Yolları Dövlət Agentliyi: “Əraziyə baxış keçiriləcək və qısa müddət ərzində problem aradan qaldırılacaq” Azər Allahverənov: “Aidiyyəti qurumlar yolda baş vermiş çökmənin səbəblərini…”
Son üç il ərzində Azərbaycanda yollarda kifayət qədər çökmə və sürüşmə prosesi baş verib. Bayılda iki ev, bir küçə divarı, Zığ prospektində yamac, Badamdarda isə torpaq sürüşməsi qeydə alınıb. Daha da dəqiq desək, 2017-ci ildə Mirəli Seyidov küçəsində, 2018-ci ildə Həsən Əliyev və Cəlil Məmmədquluzadə küçələrində, Tbilisi, Qara Qarayev, Səməd Vurğun prospektlərində, Xırdalanda, Sumqayıtda, 2019-cu ildə isə Nobel prospektində və Sumqayıtda yol çöküb.
Yol çökməsi ilə bağlı hadisələrdə adətən qurumlar məsuliyyəti bir-birinin üzərinə atır. Açıqlama verən rəsmilər əksər hallarda səbəb kimi qrunt sularının torpağı yumasını göstərirlər. Hətta kanalizasiya xətlərinin çürüyərək istifadəyə yararsız hala düşməsi barədə fikirlər də səsləndirilir.
Onu da bildirək ki, Azərbaycan Prezidentinin sərəncamları əsasında dövlət büdcəsindən 2018-ci ildə Azərbaycanda avtomobil yollarının tikintisi və təmirinə 672,05 mln. manat ayrılıb. Ölkədə respublika və yerli təyinatlı 1,887 min km avtomobil yolu tikilib və əsaslı təmir olunub. Bu sahədə görülən işlərə baxmayaraq, təəssüf ki, yolların çökməsi faktı hələ də yaşanır.
Növbəti yol çökməsi bu günlərdə Babək prospektində qeydə alınıb. Yeni təmirdən çıxmış Babək prospektində yenidən çökmə olub. Yolun bir hissəsində yaranan çökəklik bu yoldan istifadə edənlərə çətinliklər yaradır. Sürücülər məcbur olaraq ya avtomobili çökəkliyə salmalı olur, ya da ani manevr etməklə qəza şəraiti yaradırlar. Həmin yoldan istifadə edən sürücülər deyirlər ki, yolda yaranan maneədən yayınmaq üçün avtomobili ani olaraq sağa-sola çəkməli olurlar. Nəticədə digər sürücülər üçün real qəza şəraiti yaranır. Xüsusilə də qaranlıq saatlarında çuxuru görmək daha çətin olur.
Qeyd edək ki, Babək prospektində yol bu yaxınlarda təmir olunaraq sürücülərin istifadəsinə verilmişdi. Təmirdən qısa müddət keçən kimi yol yenidən çökür.
Baş vermiş hadisəyə münasibət bildirən Azərbaycan Avtomobil Yolları Dövlət Agentliyindən isə qeyd olundu ki, əraziyə baxış keçiriləcək və qısa müddət ərzində problem aradan qaldırılacaq.
Nəqliyyat məsələləri üzrə ekspert Azər Allahverənov “Bakı-Xəbər”ə açıqlamasında qeyd etdi ki, aidiyyəti qurumlar yolda baş vermiş çökmənin səbəblərini araşdırmalı, yaradılmış komissiya hadisə ilə bağlı rəy verməlidir: “Çökmə müxtəlif səbəblərdən baş verə bilər. Ola bilər ki, həmin yolun altından su axır. Çox güman ki, yollarda baş verən çökmələrin səbəbləri yer altından axan nəzarətsiz sular və kanalizasiya xətləridir. Su axını yerin altını yuyur və müəyyən boşluqlar (çökəklik) yaradır. Bir müddət sonra da həmin ərazilərdə çökmə baş verir. Aidiyyəti qurumlar bu kimi məsələləri araşdırıb zəruri tədbirlər həyata keçirməlidirlər”.
Günel CƏLİLOVA
