“Ən qəzalı, həyat üçün təhlükəli şəraitdə yaşayan məcburi köçkün ailələri ilk növbədə yeni mənzillərlə təmin edilirlər”
Məlumdur ki, dövlət tərəfindən yurd-yuvalarından didərgin düşmüş məcburi köçkünlərə xüsusi qayğı və diqqət göstərilir. Onlar dövlət tərəfindən mənzillə təmin olunur, sosial müavinəti artırılır, problemlərinin həll olunması istiqamətində lazımi işlər görülür.
Bəllidir ki, məcburi köçkünlər üçün şəhərciklər salınır. Prezidentin müvafiq sərəncamı ilə məcburi köçkün ailələri hissə-hissə mənzillə təmin olunurlar. Bu istiqamətdə hələ də işlər görülür. Məcburi köçkünlərin həyat şəraitinin yaxşılaşdırılması üçün dövlət tərəfindən müəyyən layihələr həyata keçirilir. Görülən işlərə baxmayaraq, bir qisim məcburi köçkün hələ də yataqxana, məktəblərdə yaşayır.
Bu günlərdə köhnə Suraxanı kənd 1 saylı texniki peşə məktəbində məskunlaşmış məcburi köçkünlər mənzillə təmin edilmək tələbi ilə etiraz aksiyası keçiriblər. Sakinlər bildirirlər ki, bir neçə ay əvvəl Qaçqınların və Məcburi Köçkünlərin İşləri üzrə Dövlət Komitəsinin (QMKİDK) sədri Rövşən Rzayev onlarla görüşən zaman məcburi köçkünlərin Kürdəxanı qəsəbəsində mənzillə təmin ediləcəklərini bildirib. Məcburi köçkünlər hətta gedib mənzillərin yerləşdiyi əraziyə də baxıblar. Sonradan nə olubsa, mənzil bölgüsü zamanı onlara mənzil verilməyib. Sakinlərə "sizə mənzil Qobu qəsəbəsində veriləcək" deyə məlumat veriblər.
Ancaq sakinlər Qobu qəsəbəsində yaşamaq istəmirlər. Onlar qeyd edirlər ki, "bizə ev veriləcəksə, Kürdəxanı, Məhəmmədi ərazilərində verilsin".
Suraxanı kənd 1 saylı texniki peşə məktəbində məskunlaşmış məcburi köçkünlərin mənzillə təminatı və onların köçürülməsi istiqamətində nə kimi işlərin görüləcəyini öyrənmək məqsədilə Qaçqınların və Məcburi Köçkünlərin İşləri üzrə Dövlət Komitəsinin mətbuat katibi İbrahim Mirzəyevə müraciət etdik.
O, “Bakı-Xəbər”ə açıqlamasında qeyd etdi ki, məcburi köçkünlərin yeni mənzillə təminatı hər zaman Prezident İlham Əliyevin və Birinci vitse-prezident Mehriban Əliyevanın diqqət mərkəzindədir: “Yeni tikilən mənzillər Azərbaycan Respublikası Prezidentinin müvafiq fərman və sərəncamlarına əsasən, Dövlət Proqramı və ona edilmiş əlavələrdə göstərilən konkret köçürülmə obyektləri üzrə həyata keçirilir. Bundan başqa, ən qəzalı, həyat üçün təhlükəli şəraitdə yaşayan məcburi köçkün ailələri ilk növbədə yeni mənzillərlə təmin edilirlər. Bu obyektlər Dövlət Komitəsində yaradılmış işçi qrupu və komissiyanın hərtərəfli və şəffaf araşdırması nəticəsində müəyyən olunur. Mənzillə əlaqədar müraciətlər işçi qrupu tərəfindən araşdırılır, nəticələr komissiyaya təqdim edilir. Komissiyanın rəyi Dövlət Komitəsinin sədrinə təqdim edilir və müvəqqəti məskunlaşma obyektlərinin köçürülməsi barədə qərar qəbul olunur. Qeyd etdiyiniz ünvanda yaşayan məcburi köçkünlər də mərhələli şəkildə yeni mənzillə təmin ediləcəklər”.
Günel CƏLİLOVA
