Azər Allahverənov: “Bir sıra hallarda market açanlar, nədənsə, avtomobillərin park edilməsi məsələsini nəzərə almırlar”
Bakının bəzi ərazilərində təəssüflər olsun ki, tıxac problemi həllini tapmır. Görülən bir sıra tədbirlərə baxmayaraq, sözügedən məsələ çözülmür. Ötən müddət ərzində müasir standartlara cavab verən çoxsaylı yol çəkilib. Hətta elə yerlər var ki, maşınların müxtəlif istiqamətlərdə hərəkətinə imkan verən körpülər də inşa olunub. Ancaq yeni tikilməsinə baxmayaraq, görürsən ki, yolun hansısa hissəsində müəyyən məsələlərin nəzərə alınmaması tıxacın yaranmasına səbəb olur. Bu da, öz növbəsində, yolda hərəkət intervalının pozulmasına gətirib çıxarır.
Bir neçə il əvvəl Sabunçu-Zabrat yolu əsaslı təmir edildi. Həmçinin, Sabunçu-Zabrat yolunun Heydər Əliyev prospekti ilə kəsişməsində nəqliyyat şəraitinin yaxşılaşdırılması ilə bağlı bir sıra işlər görüldü. Eyni zamanda, sözügedən ərazidə piyadalar üçün yerüstü keçid tikildi. Nəticədə sözügedən yolun həmin hissəsində tıxac azaldı. Ancaq bütün bunlar son nəticədə Bakı kəndlərinə hərəkət edən avtomobillərin tıxac probleminin həllinə gətirib çıxarmadı. Problem ondadır ki, Zabrat qəsəbəsində yolun sağ hissəsində fəaliyyət göstərən “Ayxan” market pik saatlarda, faktiki olaraq, hərəkəti iflic edir. Çünki adıçəkilən ticarət mərkəzi yola məsafəcə çox yaxındır. Ən başlıcası isə avtomobillər üçün nəzərdə tutulan parkovka yeri çox balacadır. Nəticədə marketə gələnlər avtomobillərini səkilərin kənarında parkovka edirlər. Hər gün saat 18-dən sonra “Ayxan” marketin qarşısında tıxac yaranır. Bu da avtomobillərin hərəkət intervalını pozur. Sürücü və sərnişinlər saatlarla tıxacda qalmalı olurlar. Bəzən elə olur ki, Sabunçu dairəsindən “Ayxan” marketə qədər tıxac olur. Yəni o dərəcədə uzun tıxac yaranır. Səbəbi də sözügedən marketlə bağlıdır.
Bakının bir sıra kənd və qəsəbələrinə gedən avtobuslar Zabrat qəsəbəsindən keçirlər. Belə ki, Kürdəxanıya, Məhəmmədiyə, Maştağaya, Buzovnaya, Nardarana, Pirşağıya, Bilgəhə, Daş karxanasına, Savalana gedən avtobus və digər avtomobillər Zabratdan keçirlər. Nəzərə alsaq ki, Buzovna ilə Nardaran məsafəcə daha uzaqda yerləşirlər, o zaman bunun vaxt baxımından sözügedən qəsəbə sakinləri üçün nə demək olduğunu təsəvvür etmək çətin deyil.
Adətən hansısa avtomobil nəzərdə tutulmayan yerdə saxlandıqda görürsən ki, buna görə avtomobil sahibini cərimələyirlər. Maraqlıdır, müvafiq qurumlar “Ayxan” marketin yaratdığı böyük tıxac barədə məlumatlıdırlarmı? Bununla bağlı hansısa tədbirlərin görülməsi nəzərdən keçirilirmi?
Sözügedən məsələ ilə əlaqədar ilk əvvəl Azərbaycan Avtomobil Yolları Dövlət Agentliyi ilə əlaqə saxladıq. Qurumun mətbuat katibi Anar Nəcəfli bildirdi ki, sözügedən yolda yaranan vəziyyətə onların qurumu baxmır. Yənin onların bu məsələyə hər hansı aidiyyəti yoxdur.
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, “Ayxan” marketin qarşısında park edilən avtomobillər yolu əhəmiyyətli dərəcədə daraldırlar: “Nəticədə həmin ərazidə böyük tıxac yaranır. Sözügedən marketin qabağında avtomobillər nəinki birinci zolağı, hətta ikinci zolağı belə zəbt edirlər. Bəzi hallarda da elə olur ki, marketə müxtəlif ərzaq məhsulları gətirən ekspeditorlar gəlirlər. Bu zaman sıxlıq daha kritik səviyyədə olur. Görürsən ki, bir istiqamətdə dördzolaqlı yol az qala birzolaqlı yola çevrilir. Bu da həmin istiqamətdə hərəkəti iflic edir. Saatlarla tıxaclara səbəb olur. Bu onu göstərir ki, “Ayxan” marketin yerləşdiyi əraziyə nəzarət, demək olar ki, yox səviyyəsindədir. Bakının müxtəlif yollarında müşahidə kameraları var. Hansısa tıxac yarananda müvafiq qurumlar vəziyyəti nəzarətdə saxlayırlar. Ancaq Zabrat qəsəbəsində yerləşən sözügedən marketin yaxınlığında belə müşahidə kameraları yoxdur. Hesab edirəm ki, belə vasitələr olsa, parkovka zamanı yaranan problemə tez müdaxilə etmək olar. Məsələn, avtomobil zolaqdan kənar saxlandıqda dərhal müdaxilə etmək olar. Avtomobil sahibləri cərimələnsə, növbəti dəfə maşını orada saxlamazlar. Çox təəssüflər olsun ki, Zabrat qəsəbəsində yolboyu çoxsaylı market fəaliyyət göstərir. Bu da nəqliyyatın normal hərəkətinə mane olur. Bir sıra hallarda market açanlar, nədənsə, avtomobillərin park edilməsi məsələsini nəzərə almırlar. Nəticədə belə xoşagəlməz vəziyyət yaranır. Xüsusən də pik saatlarda yaranan tıxaclar dözülməz dərəcədə yorucu olur. Zabrat qəsəbəsində digər problem isə işıqforların intervalı ilə əlaqədardır. Görürsən ki, elə yer var orada avtomobillərin axını çoxdur, amma işıqforun vaxt intervalı çox azdır. Bu da tıxacın yaranmasında müəyyən rol oynayır. Hesab edirəm ki, işıqforlarda vaxt intervalı artırılmalıdır. Bütün bunlar kompleks şəkildə həll edilsə, orada tıxac olmaz”.
Vidadi ORDAHALLI
