Vüqar Bayramov: “Siyahı tam hazır olandan sonra qeyd edilən sayt üzrə vətəndaşlara nə qədər kompensasiya veriləcəyi tam şəkildə bəlli olacaq”
Məlum olduğu kimi, Prezident İlham Əliyev bu il fevralın 28-də problemli kreditlərlə bağlı məsələyə son qoydu. Prezidentin imzaladığı fərmana əsasən, fiziki şəxslərin banklara 10 min ABŞ dollarınadək xarici valyutada olan əsas kredit borclarının devalvasiya ilə bağlı manatla artmış hissəsi aşağıdakı qaydada qiymətləndirilməklə, bu fərman qüvvəyə mindiyi günə Mərkəzi Bankının elan etdiyi məzənnəyə uyğun olaraq, dövlət büdcəsinin vəsaiti hesabına üç aydan gec olmayaraq manatla ödəniləcək.
Problemli kreditlərlə bağlı vətəndaşların banklara ödədikləri artıq məbləğin geri qaytarılması üçün banklarda xüsusi komissiya yaradılıb. Kompensasiyanın hesablanıb ictimaiyyətə açıqlanması üçün Maliyyə Bazarlarına Nəzarət Palatası “Kompensasiya məbləğinin sorğulanması” xidmətinə başlayıb. Xidmətdən Palatanın saytına daxil olaraq istifadə etmək olar.
Palatanın saytının “Problemli kreditlərin həllinə dair məlumat” hissəsində “Kompensasiya məbləğinin sorğulanması” pəncərəsi yaradılıb. Belə ki, bank müştərisi adını və parolunu daxil etməklə alacağı kompensasiya məbləğini öyrənə bilər.
https://pk.fimsa.az/az/kompensasiya?fbclid=IwAR3j5LCDp7uLMZ_lV3y-kM4QV2s2yzfxBkjOpwv8UQFQpTsyVHCVE_Tte74 linkinə daxil olmaqla adını və soyadını yazıb ona nə qədər kompensasiya ödənilməsini öyrənməsi mümkündür. Lakin istifadəçilərin əksəriyyəti qeyd olunan sayta daxil olmaqda çətinlik çəkir. Şikayətçilər bildirirlər ki, sayta giriş çox olduğu üçün, yüklənmə yaranır və vətəndaşlar onlara nə qədər kompensasiya ödənilməsini öyrənə bilmirlər.
İqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, kompensasiyanın ödənilməsi ilə bağlı mexanizm martın 15-nə qədər hazırlanmalı idi. Artıq sistem, demək olar ki, hazırdır: “Vətəndaşlara kompensasiyanın ödənilməsi sistemi isə aprelin 15-dən sonra həyata keçiriləcək. Çünki aprelin 15-nə kimi kompensasiya ödəniləcək vətəndaşların siyahısı tam şəkildə hazır olacaq. Aprelin 15-dək dövlət başçısının "Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında" Fərmanının əhatə dairəsinə düşən vətəndaşların siyahısı tam hazır olacaq. Siyahı tam hazır olandan sonra qeyd edilən sayt üzrə vətəndaşlara nə qədər kompensasiya veriləcəyi tam şəkildə bəlli olacaq”.
Həmsöhbətimiz onu da bildirdi ki, hazırda banklar vətəndaşlara kompensasiyanın nə qədər ödənilməsi ilə bağlı tam məlumat verə bilmirlər. O üzdən, Maliyyə Bazarlarına Nəzarət Palatası tərəfindən xüsusi sayt yaradılıb. Saytın yaradılmasında məqsəd vətəndaşların məlumatlandırılmasıdır. Hazırda saytda yüklənmə gedir. Nəzərə almaq lazımdır ki, sayta daxil olan vətəndaşların sayı çox olduğu üçün, yüklənmə baş verir”.
Günel CƏLİLOVA
