“Düşünürəm ki, bütün hallarda müxtəlif nəqliyyat növlərinin qiymətlərinin endirilməsi məsələsi nəzərdə saxlanmalıdır”
“Digər nəqliyyat növlərinin də qiymətlərinin endirilməsi məsələsinə baxıla bilər”
Məlum olduğu kimi, Bakı-Gəncə-Bakı sürətli sərnişin qatarında gediş haqqı endirilib.
“Azərbaycan Dəmir Yolları” Qapalı Səhmdar Cəmiyyətindən bildirilənə görə, Bakı-Gəncə-Bakı sürətli sərnişin qatarının biznes yerlərinə Bakıdan-Gəncə-Bakı istiqamətində gediş haqqı 08.04.2019-cu il tarixdən etibarən 50 manatdan 25 manata endirilir.
Bakı-Gəncə-Bakı sürətli sərnişin qatarının qiymətlərinin yarıya endirilməsi nəqliyyat sahəsində atılan müsbət addım kimi dəyərləndirilir. Ekspertlər qeyd edirlər ki, bu ölkə daxilində digər nəqliyyat növlərinin qiymətlərinin də endirilməsi aktuallaşdırılır.
Ölkə daxilində müxtəlif istiqamətlərə işləyən qatarların, təyyarələrin, eləcə də paytaxt daxilində fəaliyyət göstərən metro, avtobus kimi digər nəqliyyat növlərinin qiymətləri hansı həddə qədər endirilməlidir ki, ölkəyə iqtisadi cəhətdən ziyan dəyməsin və bunun əhaliyə də faydası olsun?
Bakı-Gəncə-Bakı sürət qatarının qiyməti optimallaşdırıldı, digər nəqliyyat növlərinin də qiymətinə baxılacaqmı?
İqtisadçı Ruslan Atakiyev baki-xeber.com-a bildirdi ki, bütün nəqliyyat növlərinin qiymətləri dövlət tərəfindən tənzimlənmir. R.Atakişiyevin sözlərinə görə, xüsusən də təyyarə və qatarların qiymətləri formalaşdırılan zaman tələb və təklifin öyrənilməsinə çox böyük ehtiyac var. “Yəni ki, nə qədər sərnişin mövcud qiymətdə getmək istəyir. Qiymətlərdə azalma baş verirsə və həmin istiqamətdə sərnişin sayı çoxalırsa, təbii ki, qiymətlərin endirilməsinə ehtiyac var. Lakin hər hansı bir nəqliyyat növünün həcminə uyğun olaraq sərnişinlər həmin nəqliyyat növü ilə gedirsə burada qiymətlərin endirilməsinə ehtiyac yoxdur. Ona görə də bu sahədə qiymətlərin endirilməsi, yaxud tənzimlənməsi bazarın tələbinə uyğun şəkildə həyata keçirilməlidir. Bəli, bu gün bizim elə bölgələrimiz, şəhərlərimiz var ki, orada nəqliyyat növünün qiyməti sərnişinləri qane etmədiyinə görə onlar ondan istifadə etmir. Ancaq bəzi hallarda qiymətlərin endirilməsi də bu sahələrdə xidmət göstərənlərə sərf etmir. Həmin xidməti göstərənlərin də xərcləri, maya dəyəri var. Əgər qiymətlər maya dəyərinə yaxın, yaxud ondan aşağı olursa onda sahibkar, yaxud müəssisə həmin xidməti göstərmək istəmir. Belə olduğu halda da qiyməti endirməkdənsə həmin xidməti göstərməməyə daha çox üstünlük verirlər”.
R.Atakişiyev həmçinin qeyd etdi ki, digər nəqliyyat növlərinin də qiymətlərinə baxılmalıdır. Onun sözlərinə görə, bu məsələ bazarın tələb və təkliflərini öyrənməklə mümkün ola bilər:”Bakı-Gəncə-Bakı sürət qatarının gediş haqqının endirilməsi onu deməyə əsas verir ki, digər nəqliyyat növlərinin də qiymətlərinin endirilməsi məsələsinə baxıla bilər. Bu da, dediyim kimi, konkret olaraq hər bir nəqliyyat növü üzrə bazarın tələb və təkliflərini öyrənmək nəticəsində baş verə bilər. Düşünürəm ki, bütün hallarda müxtəlif nəqliyyat növlərinin qiymətlərinin endirilməsi məsələsi nəzərdə saxlanmalıdır. İqtisadi cəhətdən müəyyən qədər çətinlik törətsə də, sosial-siyasi baxımdan qiymətlərin endirilməsi əhəmiyyətlidir”.
İradə SARIYEVA
