“Bu gün bazarlara baxsaq görərik ki, geni dəyişdirilmiş məhsullar çox geniş yayılıb”
Azərbaycanda kənd təsərrüfatı məhsullarının istehsalına və emalına dair "Strateji Yol Xəritəsi"ndə nəzərdə tutulmuş tədbirlərin həyata keçirilməsini təmin etmək, qida təhlükəsizliyinə nəzarət sistemini təkmilləşdirmək, bu sahədə şəffaflığı daha da artırmaq məqsədilə 2017-ci ildə Qida Təhlükəsizliyi Agentliyi yaradıldı. QTA 2018-ci ilin yanvarın 1-də fəaliyyətə başladı. Qurumun yaradılmasında məqsəd illərdir bu sahədə mövcud olan problemləri aradan qaldırmaq idi. Çünki zaman-zaman qida təhlükəsizliyi ilə bağlı problemlər gündəmə gəlir. Bu sahədə neqativ halların olduğu ortaya çıxır.
QTA sədri Qoşqar Təhməzli başda olmaqla, qurumun rəhbərliyi 2018-ci ilin martında Azərbaycan Mətbuat Şurasının iştirakı ilə "Media və təhlükəsiz qida" mövzusunda görüş keçirdi. Keçirilən görüşdə Mətbuat Şurasının sədri Əflatun Amaşov, Agentliyin vəzifəli şəxsləri və media nümayəndələri iştirak edirdi. O zaman QTA sədri Qoşqar Təhməzli keçirilən geniş tərkibli görüşdə qida təhlükəsizliyi ilə bağlı, xüsusilə də Bakıda qanunsuz ət kəsiminin qarşısının alınması ilə bağlı odlu-alovlu vədlər verdi. Bəyan etdi ki, vahid dövlət siyasətinin aparılması üçün sahibkarlıq obyektlərində dövlət nəzarəti həyata keçirilməlidir: “Bu sahəyə birbaşa bizim agentlik tərəfindən beynəlxalq normalar əsasında hazırlnmış qurum nəzarət edəcək. Ölkədə çoxsaylı qida müəssisələri, anbarlar, eyni zamanda qida satışını həyata keçirən fərqli satış müəssisələri var. Bu müəssisələrin hər birinin standartları mövcuddur. Bizim işimiz əhalinin sağlamlığını qorumaq məqsədilə bu qidaların əhaliyə təklif edilənə qədərki mərhələsinə nəzarət etməkdir. Bütün bunlar sahələrə bölünəcək - təsərrüfat sahəsi, istehsal müəssisələri, satış müəssisləri və sair. Təklif edirəm ki, ilk növbədə qeyri-qanuni ət kəsimlərinə qarşı tədbirlər görülsün. Heyvanların kəsildiyi yerlərdə ətrafa axıdılan qan düşündüyünüzdən də böyük təhlükə yarada bilər”.
QTA sədri o zaman bu sahədə mövcud olan nöqsanların aradan qaldırılacağını demişdi.
Bu arada QTA-nın şöbə müdiri, respublikanın baş dövlət baytarlıq müfəttişi Qalib Əbdüləliyev qanunsuz heyvan kəsimi fəaliyyəti ilə bağlı həyata keçirilən tədbirlər və mövcud vəziyyət barədə məlumat verib. Onun sözlərinə görə, Bakının Yasamal, Nizami, Binəqədi, Xətai, Nəsimi rayonlarında qanunsuz heyvan kəsiminə daha çox rast gəlinir. Onun açıqlamasından belə məlum olur ki, digər adı çəkilməyən rayonlarda qanunsuz ət kəsiminə az rast gəlinir. Ancaq müşahidələr göstərir ki, Sabunçu rayonunda bununla bağlı çoxsaylı problemlər var. Rayonun Zabrat qəsəbəsində, Zabrat-Sabunçu yolu boyunca, Bakıxanov qəsəbəsinin bir sıra yerlərində standartlara uyğun olmayan ət kəsimi məntəqələri var. Ancaq nədənsə, bunlar qeyd olunmur.
Bütün bunlarla yanaşı, bir il əvvəl QTA-nin MŞ ilə keçirilən görüşündə qurum sədri qanunsuz ət kəsiminə qarşı ciddi mübarizə aparacağını vəd etmişdi. Maraqlıdır, o vaxtdan keçən müddət ərzində verilən vədlərin, yəni Bakıda qanunsuz ət kəsiminin aradan qaldırılması ilə bağlı QTA-nın hər hansı fəaliyyəti hiss olunurmu? Bununla bağlı ortada nəticə varmı?
Məsələyə münasibət bildirən Mətbuat Şurasının sədr müavini Müşfiq Ələsgərlinin sözlərinə görə, o zaman görüş keçiriləndə QTA təzə yaranmışdı: “Yeni yaranmış bir qurum olduğu üçün özünü ictimaiyyətə tanıtmaq istəyirdi. Bununla yanaşı, ciddi şəkildə vədlər verirdi. İstəyirdi ki, media ilə münasibətlər qursun, gördüyü işlər barədə məlumatlar versin. Yeni yaranmış qurum olduğuna görə də MŞ onlarla birgə tədbir keçirdu. Ancaq ötən dövrdə sözügedən qurumun bu yöndə fəaliyyətinin nə dərəcədə səmərəli olduğunu, verdikləri vədi nə dərəcədə yerinə yetirdiklərini demək çətindir. O vaxt jurnalistlər qurumla əlaqələr qurdular. Hesab edirəm ki, onlar bu barədə daha çox yaza bilərlər. Bütövlükdə, qanunsuz ət kəsiminə qarşı mübarizə ilə bağlı ciddi bir dəyişiklik müşahidə etməmişəm. Digər tərəfdən, qida təhlükəsizliyi deyəndə burada söhbətin yalnız qanunsuz ət kəsimindən getməsi doğru yanaşma deyil. Fikrimcə, qida təhlükəsizliyi daha geniş anlayışdır. Bu gün bazarlara baxsaq görərik ki, geni dəyişdirilmiş məhsullar çox geniş yayılıb. Gözlə baxanda görürsən ki, bizim milli, ənənəvi məhsullar o qədər də gözə dəymir. Bu barədə düşünmək lazımdır. QTA tez-tez açıqlamalar verir. Ancaq bu açıqlamalar yalnız qanunsuz ət kəsimi ilə bağlı olur. Halbuki, qida təhlükəsizliyi ilə bağlı digər problemlər də var. Yaxşı olardı ki, Agentlik bunlara da diqqət etsin”.
Vidadi ORDAHALLI
