Azər Allahverənov: “Belə hallarla bir neçə dəfə rastlaşmışıq və bizə bununla bağlı müraciətlər də olub” “Məhdud istifadə üçün nəzərdə tutulan kartlardan 20 qəpik silinirsə, bu, xoşagələn hal deyil və müvafiq qurumlar buna aydınlıq gətirməlidirlər”
Məlum olduğu kimi, son illər Bakının nəqliyyat infrastrukturunun modernləşdirilməsi ilə bağlı bir sıra işlər görülüb. Marşrutlar yenilənib, avtobuslarda kart sisteminə keçilib. Bir sıra avtobuslar kart sistemi ilə işləyir. Həmçinin, köhnə və istifadəyə yararsız avtobuslar yeniləri ilə əvəzlənib.
Ancaq bütün bunlara baxmayaraq, bu sahədə bir sıra problemlər var. Bu arada paytaxt nəqliyyatında sakinləri narahat edən məsələlərdən biri də kart sistemi ilə bağlıdır. Məsələ ondadır ki, sərnişinlərin istifadəsi üçün 2 cür kart var. Bunlardan biri daimidir. Hansı ki, sərnişin 2 manat verib kart alır və karta istədiyi həcmdə gedişhaqqı yükləyir. İkinci kart isə kağızdan olur və məhdud istifadə üçün nəzərdə tutulur. Adətən rayondan Bakıya gələnlər müvəqqəti olaraq belə kartlardan istifadə edirlər. Bu məhdud kartların qiyməti 20 qəpik təşkil edir.
Ancaq məlumata görə, sözügedən kartlardan pul oğurlanır. Problem ondadır ki, vətəndaş 1 manatlıq əskinası terminala daxil edib məhdud kart aldıqda, bunun yalnız 60 qəpiyindən istifadə edə bilir. 20 qəpik kartın qiymətinə çıxıldıqda isə kartda qalan digər 20 qəpik itir. Yəni sərnişin heç bir halda bu 20 qəpiyi geri ala və yaxud karta yükləyə bilmir. Çünki məhdud istifadə üçün nəzərdə tutulan kartlara sonradan ödəniş etmək mümkün deyil. Ona görə ki, sözügedən aparatların qalıq vermək funksiyası yoxdur. Nəticədə 1 manatla ödəniş etdikdə bu kartlar 20 deyil, 40 qəpiyə başa gəlir. O baxımdan, yaranan belə vəziyyət bir sıra sərnişinlərin narazılığına səbəb olub.
Sözügedən problemlə əlaqədar Bakı Nəqliyyat Agentliyi ilə bir neçə dəfə əlaqə saxlamağa çalışsaq da, təəssüflər olsun ki, edilən zənglərə qurumdan cavab verən olmadı.
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, bu problemin özü kifayət qədər aktualdır: “İlk baxışdan 20 qəpik az məbləğ kimi görünə bilər, amma bunu sərnişinlərin sayına vuranda böyük rəqəm alınır. Vaxtilə gedişhaqqı 20 qəpik olanda bu kartlar dövriyyəyə buraxılmışdı. O vaxt hesab belə götürülmüşdü ki, 1 manat yükləməklə vətəndaş 4 gediş edə bilər. Yerdə qalan 20 qəpik isə kartın qiymətinə çıxılacaq. İndi isə gedişhaqqı dəyişib. Kartla işləyən avtobuslarda gedişhaqqı 30-35 qəpikdir. Məhdud istifadə üçün nəzərdə tutulan kartlardan 20 qəpik silinirsə, bu, xoşagələn hal deyil və müvafiq qurumlar buna aydınlıq gətirməlidirlər. Digər tərəfdən, ödənişi qəpiklərlə aparmaq mümkün olsa, bu varianta keçmək lazımdır. Yəni ödəniş birbaşa olaraq qəpiklərlə aparılsın. Onu da qeyd edim ki, belə hallarla bir neçə dəfə rastlaşmışıq və bizə bununla bağlı müraciətlər də olub. Hesab edirəm ki, belə hallarla rastlaşanlar aktiv olmalıdırlar. Belə halla üzləşdikdə aidiyyəti qurumlara müraciət etməlidirlər. Fikrimcə, bununla bağlı müraciətlər çox olsa, aidiyyəti qurumlar hərəkətə keçəcəklər. Adətən belə kartlardan müvəqqəti olaraq Bakıya gələnlər istifadə edir. Ola bilsin ki, bundan sonra həmin şəxslər belə kartlardan istifadə etməsinlər. Bu isə yanlış yanaşmadır. Fikrimcə, sözügedən məsələ geniş işıqlandırılsa, müvafiq qurumlar tədbir görəcəklər”.
Mövzunu davam etdirəcəyik.
Vidadi ORDAHALLI
