Əliməmməd Nuriyev: “Bəzi hallarda məhkəmə iclasında deyilən sözlər dəyişdirilir, əksini sübut etmək də mümkün olmur”
Xəbər verildiyi kimi, Prezident İlham Əliyev “Məhkəmə-hüquq sistemində islahatların dərinləşdirilməsi haqqında” Fərman imzalayıb. Fərmanın imzalanmasında məqsəd məhkəmə-hüquq sisteminin inkişafında yeni mərhələnin başlanması və bu sahədə islahatların dərinləşdirilməsidir.
Fərmanda qeyd olunur ki, məhkəmələrdə fasiləsiz audioyazı aparılacaq. Ekspertlər məhkəmələrdə audioyazının aparılmasını müsbət dəyərləndirirlər. Onların fikrincə, məhkəmələrdə fasiləsiz audioyazının aparılması xoşagəlməz halların qarşısını alacaq.
Konstitusiya Araşdırmaları Fondunun rəhbəri, hüquqşünas Əliməmməd Nuriyev “Bakı-Xəbər”ə açıqlamasında qeyd etdi ki, məhkəmələrdə audioyazının aparılması proses zamanı yaşanan mübahisələrin qarşısını alacaq: “Məlumdur ki, məhkəmələrdə tərəflərin tam şəkildə nə dediyi yazılmırdı. Məhkəmələrdə nə zərərçəkənin, nə ittiham olunanın, nə də şahidin dedikləri tam şəkildə qeydə alınmırdı. Tərəflərin dediklərini necə istəyirdilər, elə də yazırdılar. Sən də sübut edə bilmirdin ki, mən bunu belə yox, belə demişəm. Təbii ki, bu kimi amillər sübutların obyektiv qiymətləndirilməsinə mane olur. Hesab edirəm ki, bundan sonra, sərəncamın tətbiqi başladıqda bu sahədə biabırçılıqlara son qoyula bilər”.
Həmsöhbətimizin sözlərinə görə, məhkəmələrdə fasiləsiz audioyazının aparılması ilə protokol tərtib olunacaq. Bu qayda gələcəkdə həm hakimlərə imkan verəcək ki, sübutları daha obyektiv qiymətləndirsinlər, eyni zamanda, məhkəmə katibləri də qeydləri doğru-düzgün yazacaqlar: “Audioyazının tətbiqi ilə məhkəmədə hər hansı bir mübahisə predmeti olmayacaq.
Onu da bildirim ki, audioyazının tətbiqi hakimlərin qiymətləndirilməsinə də müsbət təsir edəcək. Belə ki, hakimlərin protokola nə dərəcədə düzgün yanaşıb-yanaşmadığı audioyazı əsasında müəyyən olunacaq. Bəzi hallarda məhkəmə sədrləri baxılacaq işləri hakimlər arasında bölür. Burada “yaxşı” və “pis” iş bölgüsü olur. Prezidentin fərmanında bu cür halların aradan qaldırılması üçün mexanizmin hazırlanması nəzərdə tutulur”.
Ə.Nuriyev bildirdi ki, əvvəllər hakimin razılığı olmadan məhkəmədə audioyazı aparıla bilməzdi. Ancaq indi qanunvericiliyin tələbinə uyğun olaraq, məhkəmələrdə fasiləsiz audioyazı aparılacaq.
Günel CƏLİLOVA
