Sahib Məmmədov: “İxtisaslaşmış məhkəmənin yaradılması daha ədalətli qərarların çıxarılmasına səbəb olacaq”
Məlum olduğu kimi, Prezident İlham Əliyev "Məhkəmə-hüquq sistemində islahatların dərinləşdirilməsi haqqında" Fərman imzalayıb. Fərmanda məhkəmə-hüquq sisteminin təkmilləşdirilməsi ilə bağlı bir sıra məqamlar yer alıb. Onlardan biri də Azərbaycanda iş adamları üçün ayrıca məhkəmənin yaradılmasıdır.
Fərmanda qeyd edilir ki, sahibkarların məhkəməyə müraciət imkanlarının asanlaşdırılması və sahibkarlıqla bağlı mübahisələrə müvafiq sahədə daha dərin hüquqi bilik və təcrübəsi olan hakimlər tərəfindən baxılmasını təmin etmək məqsədilə vergi və gömrük ödənişləri, məcburi dövlət sosial sığorta haqlarının ödənilməsi ilə əlaqədar yaranan mübahisələrə, habelə sahibkarlıq fəaliyyətinə aid digər məsələlərə dair işlər üzrə ixtisaslaşmış məhkəmə yaradılmalıdır.
Azərbaycanda iş adamları üçün ayrıca məhkəmə yaradılmasının əhəmiyyəti barəsində danışan hüquq müdafiəçisi Sahib Məmmədov “Bakı-Xəbər”ə açıqlamasında qeyd etdi ki, ixtisaslaşmış məhkəmənin yaradılması vacibdir: “Gömrük, vergi, sosial ödənişlərin həyata keçirilməsi ilə bağlı ixtisaslaşmış məhkəmənin yaradılması əhəmiyyətlidir. Sahibkarlar üçün ayrıca məhkəminin yaradılması barədə qanunvericiliyə əlavə dəyişiklik olunacaq. Nəzərə almaq lazımdır ki, ölkədə inzibati-iqtisadi məhkəmələr var. Bu kimi məsələlərlə bağlı işlərə hazırda adıçəkilən məhkəmələr baxır. Sahibkarlarla bağlı hər hansı bir problem, mübahisələr yarananda inzibati-iqtisadi məhkəmələr baxırdı. Ancaq indi bu sahədə dairə genişlənəcək”.
Həmsöhbətimiz onu da vurğuladı ki, sahibkarlar üçün ayrıca məhkəmənin yaradılması dünya təcrübəsində mövcuddur: “Sahibkarlar üçün yaradılacaq məhkəmə mübahisələrin baxılmasında operativliyi artıracaq. Məlumdur ki, əvvəllər Vergilər Məcəlləsinə edilən dəyişikliklə Vergilər Nazirliyində Apelyasiya Şurasına şikayət verəndə vergi orqanının qəbul etdiyi qərar üzrə icraat dərhal dayanırdı. Ancaq bundan əvvəl isə icraat dayanmırdı. Sahibkarlar üçün məhkəmənin yaradılması məhkəmə-hüquq sistemində bir yenilikdir. Yaradılacaq yeni məhkəmə tək vergi və gömrük orqanlarını deyil, eyni zamanda, sahibkarlarla bağlı yaşanan problemləri də əhatə edəcək”.
Hüquq müdafiəçisi hesab edir ki, ixtisaslaşmış məhkəmənin yaradılması daha operativ məhkəmə baxışlarına və ədalətli qərarların çıxarılmasına səbəb olacaq.
Günel CƏLİLOVA
