Elman Nəsirov: “Aprel şəhidlərinin xatirəsinə abidə ucaldılması vacibdir” Nəzakət Məmmədova: “Aprel şəhidlərinin xatirəsinə böyük bir abidə ucaldılmalı və bu abidə qəhrəmanlıq simvolu olaraq xalqımızın ziyarət yerinə çevrilməlidir”
Azərbaycan xalqına böyük zəfər yaşadan aprel döyüşlərindən 3 il keçir. Bildiyimiz kimi, 2016-cı il aprelin 1-dən 2-nə keçən gecədən başlayaraq Azərbaycan Ordusu işğal altında olan ərazilərimizin Ermənistan silahlı qüvvələrindən təmizlənməsi məqsədilə hərəkətə keçdi.
Azərbaycanın yeni tarixinin mühüm səhifəsinə çevrilən aprel döyüşləri 1994-cü ildə atəşkəs haqqında saziş imzalandıqdan bəri Azərbaycan Silahlı Qüvvələrinin qələbəsi ilə nəticələndi və Tərtər rayonunun Talış kəndi ətrafındakı yüksəkliklər, Seysulan kəndi, Cəbrayıl rayonunun Lələtəpə yüksəkliyi, Goranboy rayonunun Gülüstan kəndi, Tərtər rayonunun Qazaxlar və Madagiz kəndləri istiqamətində yollar düşməndən azad olundu. Qanlı döyüşlər zamanı Azərbaycan əsgər və zabitləri misilsiz cəsurluq nümayiş etdirdilər. Torpaqlarımızın azadlığı uğrunda başlanan aprel döyüşlərində zabitlərimiz və əsgərlərimiz canlarını Vətənə fəda edərək şəhidlik zirvəsinə yüksəldilər. Əlbəttə, dövlətimiz, xalqımız aprel döyüşlərində həlak olan Vətən övladlarını unutmur və onların xatirəsini əziz tuturlar.
Aprel şəhidlərinin xatirəsinə anım abidəsinin ucaldılması günümüzün zəruri məsələlərindən birinə çevrilib. Canını Vətənə qurban verən oğulların xatirəsinin əbədiləşdirilməsi üçün aprel şəhidləri abidəsinin qoyulması müsbət hal olardı.
Millət vəkili Elman Nəsirov “Bakı-Xəbər”ə bildirdi ki, aprel şəhidlərinə abidə ucaldılması olduqca vacibdir. “Bizim tarixi şanlı qələbəmizin simvolu olan aprel döyüşlərindən üç il keçir. Bu döyüşdə Azərbaycan Ordusu, əsgəri, zabiti, generalı Azərbaycanın yeni tarixini yazdı. Aprel döyüşləri ilk növbədə Ermənistan ordusunun “məğlubedilməzliyi” haqqında formalaşdırılan mifi dağıtdı. Həm də o zaman erməni ekspertləri bir qədər də qabağa gedib Ermənistan ordusunu hətta İsrail ordusu ilə müqayisə edirdilər. Azərbaycanın qəhrəman oğulları bu mifi darmadağın etdilər. Vətən oğullarımızın 4 gün ərzində apardığı döyüşlər nəticəsində xeyli ərazimiz işğaldan azad olundu və Azərbaycanın üçrəngli müqəddəs bayrağı Cəbrayılın, Füzulinin və Ağdərənin işğaldan azad edilən ərazilərində dalğalandı, ordumuzun şücaəti nəticəsində Lələtəpə və digər çox mühüm yüksəkliklər geri qaytarıldı. Hesab edirəm ki, aprel döyüşləri cənab Prezident İlham Əliyevin qeyd etdiyi kimi, Ermənistan dövlətinin bütün sütunlarını sarsıtdı. Hələ də Ermənistan özünə gələ bilməyib. Ali Baş Komandanın dediyi kimi, aprel döyüşlərində Azərbaycan Ordusu bütün malik olduğu hərbi potensialın cüzi bir hissəsindən istifadə etdi, bütün hərbi gücümüzü işə salsaydıq, Ermənistanda daş-daş üstündə qalmazdı. İlk növbədə aprel döyüşləri Azərbaycan Ordusunun peşəkarlığının, xalqımızın və dövlətimizin gücünün ifadəsi idi. Aprel döyüşləri hər bir Azərbaycan vətəndaşında, hər bir azərbaycanlıda böyük inam yaratdı ki, biz torpaqlarımızı hərbi yolla geri qaytarmaq gücünə, potensialına, əzminə, qüdrətinə malik dövlətik. Bu mühüm tarixi qələbəni tariximizə yazan Azərbaycan əsgəri oldu. Aprel döyüşlərində igidlərimiz şəhid oldu. Aprel döyüşləri bizim şanlı tariximizin çox mühüm bir səhifəsidir və aprel zəfəri bizi yeni-yeni qələbələrə ruhlandırıb. Aprel şəhidlərinin xatirəsinə abidə ucaldılması vacibdir və bunun çox böyük siyasi, eyni zamanda da vətənpərvərlik baxımından əhəmiyyəti olardı. Bu həm də hər bir Azərbaycan vətəndaşında bu inamı hasil edər ki, biz güclüyük və aprel zəfərinə imza atmışıqsa, bundan sonra bütün Dağlıq Qarabağ ərazisini, eləcə də onun ətrafında olan 7 rayonu da qaytarmaq gücünə malik dövlətik, xalqıq. Bu baxımdan, hesab edirəm ki, aprel şəhidlərinə abidə qoyulması çox yerinə düşərdi və bunun da çox böyük tarixi əhəmiyyəti, mənası olardı” - deyə E.Nəsirov bildirdi
Respublika “Xatirə kitabı” redaksiyasının baş redaktoru Nəzakət Məmmədova da hesab edir ki, aprel şəhidlərinin xatirəsinin əbədiləşdirilməsi mütləqdir. O qeyd etdi ki, aprel şəhidlərinə abidə qoyularsa, bunun çox mühüm tarixi, siyasi əhəmiyyəti olar. “Aprel şəhidlərinin ailələri “Xatirə kitabı”nın da qapısını tez-tez döyürlər. Biz onlarla ünsiyyətdə oluruq. Mən “Ağlama, şəhid qızı” şeirimi aprel şəhidlərindən birinin övladına yazmışam. Aprel şəhidlərinin xatirəsinin əbədiləşdirilməsi üçün dövlət tərəfindən işlər görülür. Bir müddət əvvəl aprel şəhidlərinin xatirəsinə böyük bir park salınıb və orada hər şəhidin adına bir ağac əkilib. Aprel müharibəsi 4 gün müddətində davam etsə də, o bizə çox böyük qələbə müjdəsi verdi. Aprel şəhidlərinin xatirəsinin əbədiləşdirilməsi üçün daha çox işlər görməliyik. Aprel şəhidlərinin xatirəsi hər zaman yad edilməlidir. Bu baxımdan, aprel şəhidlərinin xatirəsinə böyük bir abidə ucaldılmalı və bu abidə qəhrəmanlıq simvolu olaraq xalqımızın ziyarət yerinə çevrilməlidir. Onlar öz qəhrəmanlıqları ilə örnək oldular. Bir daha inandıq ki, şəhid versək də, öz şücaətimizi düşmənə göstərə bildik və torpaqlarımızın müəyyən bir hissəsini işğaldan azad etdik. Bizim mübariz oğullarımız bu qələbəni bizə yaşatdılar” - deyə N.Məmmədova bildirdi.
İradə SARIYEVA
