Aytəkin Kamranqızı: “… təhsilin keyfiyyətinə müsbət təsir göstərməklə bərabər, həm də nizam-intizamın yaxşılaşmasına gətirib çıxarır”
Azərbaycanda ümumtəhsil müəssisəsində təhsilalanlar üçün müvafiq icra hakimiyyəti orqanı tərəfindən müəyyən olunmuş vahid geyim forması tətbiq edilə bilər. Məsələ Milli Məclisin plenar iclasında müzakirəyə çıxarılan yeni hazırlanmış “Ümumi təhsil haqqında” qanun layihəsində öz əksini tapıb.
Məlumat üçün bildirək ki, ölkəmizin ümumtəhsil məktəblərində şagirdlər üçün vahid formada məktəbli geyiminin tətbiqi prosesi 2009-cu dərs ilində yekunlaşıb. Artıq, demək olar ki, bütün məktəblilərin qarderobunda məktəbli forması var və bu geyimin tərzi, duruşu məsələsi şagirdlərin, onların valideynlərinin qayğılarından birinə çevrilib.
Bəllidir ki, bu gün məktəblilər üçün vahid geyim əsasən paytaxt məktəblərində tətbiq olunur. Özəl məktəblərin isə özünün fərdi məktəbli forması olur. Ancaq bölgə məktəblərində təhsil alanlar vahid məktəbli geyimində deyil, sərbəst şəkildə dərsə gedirdilər. Yeni qəbul olunacaq qanun layihəsində tək paytaxt məktəbləri deyil, bütün ölkə üzrə vahid məktəbli forması tətbiq olunacaq. Beləliklə, həm valideynlər ağ köynək, qara şalvar və ya ətək almaq sıxıntısından azad olunacaq, eyni zamanda, məktəblərdə də şagirdlər arasında fərqlilik yaşanmayacaq.
Məsələ ilə bağlı fikir bildirən sosioloq Aytəkin Kamranqızı bizimlə söhbətində qeyd etdi ki, respublikada vahid məktəbli forması tətbiq olunarsa yaxşı olar: “Bəllidir ki, bu gün əsasən paytaxt və digər şəhərlərdə vahid məktəbli forması geyinilir. Ancaq bölgələrdə, ucqar kəndlərdə isə valideyn hər tədris ilinin başlanğıcında övladı üçün geyim almaq sıxıntısı ilə üz-üzə qalır. Belə olan halda, məktəblilər arasında ayrıseçkilik yaşanır. Bu kimi xoşagəlməz vəziyyətin yaşanmaması üçün vahid məktəbli formasının tətbiq olunması vacibdir”.
Həmsöhbətimiz onu da vurğuladı ki, respublika üzrə vahid məktəbli geyiminin tətbiq olunması valideynlərlə yanaşı, müəllim heyətinin də rahatlığına səbəb olacaq: “Etiraf etməliyəm ki, bu, təhsilin keyfiyyətinə müsbət təsir göstərməklə bərabər, həm də nizam-intizamın yaxşılaşmasına gətirib çıxarır. Bir məqamı xüsusi qeyd edim ki, hər bir məktəbin pedaqoji şurası öncədən müəyyən olunan dizayn və məktəbli formalarının etiketlərini məktəb kollektivi ilə müzakirəyə çıxarır. Məktəb üçün uyğun hesab olunan dizaynda qəbul edilən məktəbli forması həmin tədris ili üçün vahid forma kimi qəbul edilir.
Onu da deyim ki, hazırda bəzi məktəblərin özünün geyim forması var. Hətta yolda şagirdlərə rast gələndə geyimlərinə görə ayrı-ayrı məktəblərdən olduqları bilinir. Təbii ki, məktəbli forması vacibdir. Çünki bu, məktəblinin iş formasıdır. Necə ki, həkimlərin xüsusi geyimi olur, eyni zamanda, şagirdlərin də xüsusi forması olmalıdır”.
Günel CƏLİLOVA
