Bir neçə gündür ki, sosial şəbəkələrdə yayılan “Kazbekə şey basım fırranım” adlı mahnı ətrafında ciddi müzakirələr aparılır. Araşdırdıqda məlum olub ki, həmin mahnı heç də yaxşı tanınmayan bir gənc tərəfindən xeyli müddət əvvəl ifa edilib və “youtube” portalına yerləşdirilib. Azərbaycanda keçirilən hansısa toyda xanımların məhz bu mahnının sədaları altında şıdırğı rəqs etməsi ilə bağlı görüntülər sosial mediada yayılandan sonra bu mövzu ətrafında ictimai müzakirələr daha da qızışdı. Artıq vəziyyət o həddə çatıb ki, bəzi millət vəkilləri bununla bağlı hüquq-mühafizə orqanlarına şikayət etmək məcburiyyətində qalıblar.
Milli Məclisin üzvü Fazil Mustafa öz Facebook hesabında yazıb ki, bununla bağlı daxili İşlər naziri, general-polkovnik Ramil Usubova müraciət edib. Deputatın müraciətini olduğu kimi təqdim edirik:
“Hörmətli Ramil müəllim!
Son günlər sosial şəbəkələrdə “Kazbekə şey basım fırranım” adı ilə vidioçəkiliş formasında paylaşılan “mahnı” yayılmaqdadır. İfa edilən “mahnı”nın sözlərində bəşəriyyətin ən böyük bəlası olan narkomaniyaya açıq şəkildə çağırış edilir, onun yayılması təbliğ olunur. Bu çağırışın əsas hədəfi olaraq Azərbaycan auditoriyasının seçilməsi hansısa qüvvələrin ölkəmizdə bu bəlanın yayılmasında ciddi maraqlarından xəbər verir. Bu üzdəniraq "mahnı" artıq orta və ali məktəblərdə, çox sayda gənclərin arasında məqsədyönlü şəkildə sürətlə yayılmaqdadır. "Mahnı" adı ilə bu biabırçılıq və rüsvayçılığı yazdıranlar, ifa edənlər, videoya çəkilənlər və onu yayanlar kütləvi şəkildə cinayət əməli törətməklə cəmiyyətin, xüsusilə də gənc nəslin təlim-tərbiyəsinə və sağlamlığına sarsıdıcı zərbə vururlar. Bu çəkilişlərə azyaşlı uşaqların və gənc qızların cəlb olunması isə cəmiyyətdə xüsusi narahatçılıq doğurur.
Ümid edirəm ki, narkomaniyaya qarşı mübarizəyə hər zaman yüksək diqqət yetirən bir səlahiyyətli dövlət xadimi kimi tərəfinizdən qanunlara və əxlaqi dəyərlərə açıq şəkildə meydan oxuyan və onu heçə sayaraq bu zərərli təbliğatla məşğul olanların şəxsiyyətlərini araşdırmaq istiqamətində təcili tədbirlər görüləcək və bu zərərli təbliğatı gerçəkləşdirən şəxslərin Azərbaycan Respublikasının qanunvericiliyinə uyğun şəkildə məsuliyyətə cəlb olunması təmin ediləcəkdir. Görüləcək tədbirlərin tərbiyəvi əhəmiyyətini nəzərə alaraq nəticəsi barədə geniş ictimaiyyətə məlumat verilməsini də Sizdən xahiş edirəm”.
Digər millət vəkli Qənirə Paşayeva da həmkarına dəstək verib. Xanım deputat öz səhifəsində bunları yazıb:
“Bu nə dəhşətdi İlahi? Bu adamlar gerçəkdən nə oxuduqlarının, nəyə oynadıqlarının, bu hərəkətləri ilə nəyi təbliğ etdiklərinin fərqində deyillərmi? Həmkarım Fazil Mustafanın Daxili işlər naziri və Baş prokurora bu mahnı, bu videolarla bağlı müraciətini tamamilə dəstəkləyirəm və qoşuluram. Mən də bununla bağlı rəsmi qurumlara müraciət edəcəm. Bu videoların uşaqlar və yeniyetmələr üçün nə qədər zərərli bir təbliğat olmasının görəsən bu videolara çəkilən, çəkən və yayan adamlar, onların ailəsi, yaxınları gerçəkdən fərqində deyillərmi? Çox düşündürücü və narahatedici bir məsələdir. Çox üzüldüm, üzüntü və ciddi narahatlıqla izlədim. Təəssüf... Amma bu cür videolara, narkomaniyanı təbliğ edənlərə qarşı ciddi addımlar atılmalıdır. Tədbirlər görülməlidir. Çox təəssüf... Böyüyən uşaqlarımızı düşünün bu addımı atmazdan əvvəl. Üzüntüvericidir. Tezliklə yığışdırılması lazımdır bu videoların”.
Göründyü kimi, məlum videonun geniş yayılması hətta norkomaniyanın təbliği kimi yozulur. Azərbaycan qanunvericiliyi belə mahnının qarşısını almağa imkan verirmi?
Hüquqşunas Meham Muradlı qəzetimizə bildirdi ki, Azərbaycan Respublikası Cinayət Məcəlləsinin 236-cı maddəsinin dispoziyasında narkotik vasitələrinin istehlakına təhrik etmə cinayət hesab edilir. Əgər son dövrlər məlum mahnının sözlərini nəzərə alsaq, burada təhrikdən söhbət gedə bilməz. Bu mahnının sözlərini narkotik vasitələrinin reklamı hesab etmək olar. Təhrik etmə deyəndə konkret subyekt olmalıdı. Amma bildiyim qədəri ilə bununla bağlı zərərçəkmiş qismində kiminsə hüquq-mühafizə orqanlarına müraciəti olmayıb.
Mahnını ifa edən şəxslərlə profilaktik söhbət etmək olar, amma onların məsuliyyətə cəlb edilməsinə qanunvericilik imkan vermir. Həmin iafaçı barəsində sərt hüquqi ölçülərin götürülməsinə beynəlxalq reaksiya da mənfi ola bilər. Bu cür məsələlər bir qədər həssas yanaşma tələb edir. Bir daha qeyd edirəm ki, ifaçının əməlində cinayət tərkibi də yoxdu. Onu sadəcə, ictimai qınağa məruz qoymaq olar”.
Yazı hazırlanarkən məlum oldu ki, sözügedən mahnının ifaçısı polis tərəfindən saxlanıb. Daxili İşlər Nazirliyindən verilən məlumata görə, nazirliyin rəhbərliyinin tapşırığına əsasən bununla əlaqədar müvafiq tədbirlər həyata keçirilib:” Nəticədə dediyi meyxana ilə narkotiki təbliğ edənin Sumqayıt şəhər sakini "Vüqar Səda” ləqəbli Vüqar Abdullayev olması müəyyən edilib və o, Sumqayıt ŞPİ-nin əməkdaşları tərəfindən saxlanıb.
Onun üzərində aparılmış şəxsi axtarış zamanı "Belamorkanal” papirosuna doldurulmuş və istifadə edilməsi üçün hazırlanmış marixuana aşkar edilib.
Müəyyən olunub ki, V.Abdullayev narkotik istifadəçisidir. İlkin dindirmə zamanı o, həmin videonun bir neçə il əvvəl çəkildiyini, bu hərəkətlərinə görə peşman olduğunu və bir daha belə hallara yol verməyəcəyini bildirib.
Faktla əlaqədar toplanmış materiallar hüquqi qiymət verilməsi üçün şəhər məhkəməsinə göndəriləcək”.
Məhəmmədəli QƏRİBLİ
