Anar Nəcəfli: “Yaxın zamanlarda eskalatorların ehtiyat hissələri dəyişdirilərək işlək vəziyyətə gətiriləcək” Azər Allahverənov: “Əlilliyi olan və ya yaşlı insanlar işləməyən eskalatorlarla hündür pillələri qalxıb düşərkən çətinlik çəkirlər”
Paytaxtda piyadaların yolu rahat və təhlükəsiz keçməsi üçün yeraltı və yerüstü keçidlərin yaradıldığının hamımız şahidiyik. Amma əksər vaxtda Bakının bərbəzəkli, gözqamaşdıran yeraltı və yerüstü keçidlərinin bir çoxunda eskalatorlar işləmir.
Keçidlərdəki eskalatorların yararsız vəziyyətə düşməsi xüsusilə də yaşlı, əlilliyi, səhhətində problemi olan insanların bu keçidlərdən istifadəsini çətinləşdirir və onları yolun təhkükəli, qadağan olunmuş hissəsindən keçməyə təhrik edir. Eskalatorlar işləmədiyi üçün insanlar məcburən keçidlərdən ayaqla enib-qalxırlar. Bu hal şəhərin bir sıra ərazilərində müşahidə olunur. Əsasən Mərkəzi Bankla üzbəüz parkdakı keçid, eyni zamanda, Atatürk prospekti ərazisində yeraltı keçiddə üzüyuxarı və üzüaşağı işləməli olan iki eskalator var. Ancaq qeyd etdiyimiz ünvanlarda olan keçidlərdə eskalatorların heç biri işləmir. Belə olan vəziyyətdə sakinlər ayaqla təngnəfəs yolun o biri üzünə çıxmalı olur.
Mövzu ilə bağlı “Azəravtoyol”un mətbuat xidmətinin rəhbəri Anar Nəcəfliyə müraciət etdik. O, “Bakı-Xəbər”ə açıqlamasında qeyd etdi ki, Bakının bəzi ərazilərində yeraltı keçidlərdə eskalatorların işlək olmaması barədə məlumatlıdırlar: “Təəssüf ki, eskalatorlar Azərbaycanda istehsal olunmadığı üçün, xaricdən sifariş verməli oluruq. Eskalatorların təmir olunması üçün ehtiyat hissələri sifariş verilib. Ehtiyat hissələr əsasən Almaniya, Çin və Türkiyədən gətirilir. Yaxın zamanlarda ehtiyat hissələr dəyişdirilərək işlək vəziyyətə gətiriləcək”.
Yol təhlükəsizliyi və yol hərəkəti qaydaları üzrə ekspert Azər Allahverənov qəzetimizə açıqlamasında qeyd etdi ki, yerüstü və yeraltı keçidlərdə eskalatorların işləməməsi insanlara əlavə problemlər açır: "Biz hər yerdə deyirik, bəyan edirik ki, insanlar yeraltı və yerüstü keçidlərdən istifadə etməlidirlər. Çünki yollardan birbaşa keçərkən öz həyatlarını təhlükə altına ata bilərlər. Bəllidir ki, eskalatorun işləməməsi insanı çətin duruma salır. Əlilliyi olan və ya yaşlı insanlar işləməyən eskalatorlarla hündür pillələri qalxıb düşərkən çətinlik çəkirlər. Bu isə onlara çox çətin başa gəlir. Obyektiv səbəbdən işləməyən eskalatorlardan istifadə etməyərək, birbaşa yolu qadağan olan hissədən keçərək həyatlarını təhlükə altına atırlar. Nəticə etibarilə bir tərəfdən həyatları təhlükə altına düşür, digər tərəfdən qəza şəraitinin yaranmasına səbəb olurlar".
Həmsöhbətimizin sözlərinə görə, yeraltı və yerüstü keçidlərdə insanların rahatlığının təmin olunması üçün eskalatorların işlək olmasını aidiyyəti qurumlar mütəmadi nəzarətdə saxlamalıdırlar. Dövlət qurumları ilə yanaşı, vətəndaşlar da bu məsələdə fəal olmalıdırlar. Hansı keçiddə eskalator işləmirsə, vətəndaş dərhal bu barədə aidiyyəti qurumu məlumatlandırmalıdır.
Ekspert onu da vurğuladı ki, Bakı şəhərinin bəzi yeraltı və yerüstü keçidlərində ciddi problemlər var: "Bəzi keçidlərə yağış yağarkən su dolur. Bu da drenaj sisteminin olmaması ilə bağlıdır. Həmin keçidlər istifadə üçün yararsız olur, piyadalar oradan keçə bilmirlər".
Günel CƏLİLOVA
