Rüfət Quliyev: “Azərbaycan dövləti istənilən qəza səbəbilə çarəsiz vəziyyətdə qalan sahibkar və ya sadə vətəndaşa hər zaman dəstək olur”
Bakının Nizami rayonundakı ticarət mərkəzində baş vermiş yanğınla əlaqədar Prezident İlham Əliyevin rəhbərliyi ilə müşavirə keçirilib. Müşavirədə “Diqlas” ticarət mərkəzində baş vermiş yanğınla bağlı bir sıra məsələlərə toxunulub. O cümlədən, malları yanaraq kül olan sahibkarların üzləşdikləri maddi sıxıntıdan qurtulmaq üçün onlara dövlət tərəfindən dəstək olunacağı da bildirilib.
Prezident İlham Əliyev qeyd edib ki, sahibkarlara maliyyə dəstəyinin göstərilməsi operativ qaydada təşkil edilməlidir və bu barədə müvafiq göstəriş verilib: “Eyni zamanda, burada da qeyd olunduğu kimi, onlara güzəştli şərtlərlə kreditlər verilməlidir, dəymiş ziyan dəqiq hesablanmalıdır. Onların bu gün fəaliyyətdə olan digər ticarət mərkəzlərində yerləşdirilməsi ilə bağlı tədbirlər görülməlidir ki, işsiz qalmasınlar”.
Azərbaycan Prezidenti İlham Əliyevin sədrliyi ilə keçirilən müşavirədə iqtisadiyyat naziri Şahin Mustafayev də çıxış edərək bildirib ki, dövlət başçısının tapşırıqlarına uyğun olaraq, bir sıra addımlar atılacaq: “Sahibkarlara bir neçə istiqamətdə ilkin dövlət dəstəyi göstəriləcək. Müəyyən halda güzəştli kreditlərdən istifadə ilə bağlı mexanizm üzərində də işlənilir”.
“Diqlas” ticarət mərkəzində malları yanan sahibkarlara maddi və mənəvi dəstək olmaq üçün onlara güzəştli şərtlərlə kredit verilməsinin vacibliyi barəsində danışan millət vəkili Rüfət Quliyev “Bakı-Xəbər”ə açıqlamasında qeyd etdi ki, Azərbaycan dövləti əhalinin rifahını yüksəltmək məqsədilə ardıcıl və məqsədyönlü tədbirlər görür: “Bir neçə gün öncə Nizami rayonu ərazisində fəaliyyət göstərən ticarət mərkəzində baş verən güclü yanğın nəticəsində sahibkarların malları yanaraq kül oldu. Bu hadisə sahibkarlara maddi sıxıntı yaşatdı. Ancaq sevindirici haldır ki, Azərbaycan Prezidenti, hər zaman olduğu kimi, yenə də xalqın yanında oldu. Malları yanan sahibkarlara Prezident dəstək olacağını bildirdi. Bunun özü böyük jestdir.
Ölkə rəhbərinin tövsiyəsi ilə sahibkarlara güzəştli şərtlərlə kredit veriləcək. Eyni zamanda, Nizami Rayon İcra Hakimiyyəti tərəfindən onların başqa ticarət mərkəzində müvəqqəti işlə təmin edilməsinə də şərait yaradılacaq.
Millət vəkili vurğuladı ki, müşavirədə Prezident İlham Əliyev “Diqlas” ticarət mərkəzində çalışan sahibkarlara dövlət tərəfindən güzəştli şərtlərlə kredit verilməsinin vacibliyini bildirib: "Zənnimcə, İqtisadiyyat Nazirliyi və banklar bu həssas məsələdə bir araya gəlib sahibkarlara dəstək olacaqlar. Onlara yardım etmək üçün güzəştli şərtlərlə və uzunmüddətli kredit verilməlidir. Azərbaycan dövləti istənilən qəza səbəbilə çarəsiz vəziyyətdə qalan sahibkar və ya sadə vətəndaşa hər zaman dəstək olur”.
Günel CƏLİLOVA
