“Xəbər yayımı məsələsində də Azərbaycan Televiziyası heç bir telekanala uduzmur” “Müşahidə edirəm ki, hər gün Azərbaycan Televiziyasına baxan insanların sayı bir qədər də artır”
Televiziya, sözün həqiqi mənasında, cəmiyyətin güzgüsünə çevrilməlidir. Lakin çox az sayda televiziya kanalı bu missiyanı yerinə yetirə bilir, qalanları isə ucuz və bayağı şouların əsirinə çevriliblər. Təəssüf ki, bu gün saxta reytinq cədvəllərində ön cərgəyə çıxarılan telekanallar var və o kanallar ictimaiyyətin bədii-estetik zövqünün, ictimai şüurunun formalaşmasında heç bir rola malik deyil.
Ancaq elə televiziyalar da var ki, onlar birbaşa tamaşaçının bədii-estetik düşüncəsinin, zövqünün formalaşmasında, tariximizin, milli dövlətçilik ideologiyamızın təbliğində əhəmiyyətli proqramlar hazırlayır. Ölkəmizin ilk telekanalı olan və uzun illər rəqibsiz fəaliyyət göstərən Azərbaycan Televiziyası bu mənada diqqəti çəkir. Doğrudur, bəzən bu televiziyanı tənqid edənlər, hətta bəzən onun başqa telekanallardan geri qaldığı iddiasında bulunanlar da tapılır. Lakin buna baxmayaraq, Azərbaycan Televiziyası öz simasını qoruya bilir. Bu televiziyanın həyatında baş verən dəyişikliklər televiziyanı yenidən gündəmə gətirib və onunla bağlı yeni müzakirələr açılması üçün şərait yaradıb.
Azərbaycan Televiziyasının bugünkü vəziyyətini necə qiymətləndirirsiniz?
Tanınmış politoloq Qabil Hüseynli “Bakı-Xəbər”ə bildirdi ki, hazırda Azərbaycan Televiziyası yerli telekanallar arasında liderdir və öz liderliyini həyata keçirdiyi uğurlu yaradıcılıq layihələri ilə hər zaman təsdiqləyir. “Mən uzun illər Azərbaycan Televiziyasında siyasi proqramlar üzrə aparıcı olmuşam, bir politoloq, siyasi icmalçı kimi 25 ilə yaxın verilişlər aparmışam. O dövrdə Azərbaycan Televiziyasının maddi-texniki bazası çox zəif idi. Bu gün isə Azərbaycan Televiziyasının maddi-texniki bazası köklü surətdə yenilənib. Üstəlik, AzTV ölkəmizdə ilk televiziya olduğundan, Azərbaycanın ən peşəkar televiziya kadrları da orada cəmlənib. Bu televiziya dövlət büdcəsi xətti ilə maliyyələşdirildiyindən, o qədər də reklam arxasınca qaçmır və zənnimcə, əsas diqqəti hazırlanan verilişlərin keyfiyyətinə yönəldir. Açığnı deyək, bir neçə il bundan əvvəl AzTV-nin reytinqi yüksək deyildi, aşağı idi. Ancaq bu gün AzTV-nin özündə və nəzdində fəaliyyət göstərən “İdman Azərbaycan”, eləcə də “Mədəniyyət” kanalında rəngarəng verilişlər hazırlanır. Hesab edirəm ki, hazırda mənim yaşda olan insanlar Azərbaycan Televiziyasını daha çox xoşlamağa başlayıblar”-deyə bildirən Q.Hüseynli qeyd etdi ki, bunun da bir neçə səbəbi var.
Q.Hüseynlinin fikrincə, bunun birinci səbəbi bu televiziyanın güclü maddi-texniki bazasının olmasıdır və bununla da müasir tələblərə uyğun verilişlər hazırlamaq mümkün olur. Lakin bunun həlledici səbəb olmadığını deyən Q.Hüseynlinin sözlərinə görə, həlledici səbəb orada toplanmış güclü kadr potensialıdır. “Burada işləyənlər televiziya işini yaxşı bilən intellektual adamlardır. Bu səbəbdən də, açığını deyək, Azərbaycan Televiziyasında qeyri-ciddi, zövqümüzü korlayan, reytinq arxasınca qaçan verilişlər yox dərəcəsindədir. Əksinə, burada ciddi verilişlər, xalqımızın tarixi keçmişi, bu günü ilə bağlı maarifləndirici, insanların tərbiyəsinə, dünyagörüşünə müsbət təsir edən proqramlar hazırlanır. Müşahidə edirəm ki, hər gün Azərbaycan Televiziyasına baxan insanların sayı bir qədər də artır. Bu gün kimlərsə saxta reytinq düzəldib hansısa televiziyaları önə çəkə bilərlər. Ancaq mənim qənaətimə görə, Azərbaycan Televiziyası televiziya məkanında özünün liderliyini qoruyub saxlayır və artırmaqda da davam edir. Hesab edirəm ki, AzTV rəhbərliyinə son təyinat da işlərin müsbət istiqamətdə getməsinə təsir göstərir”.
Q.Hüseynli Azərbaycan Televiziyasının xəbər sahəsində gördüyü işlərə də münasibət bildirdi. O qeyd etdi ki, ola bilsin, AzTV bu sahədə elə də operativlik nümayiş etdirməsin, lakin televiziyada gedən səhih xəbərlər onun xəbər işinə peşəkar yanaşmasından xəbər verir. “Ola bilər ki, burada xəbərin ötürülməsində operativlik o qədər də yüksək deyil. Ancaq rəngarənglik və çeşidli xəbərlərin verilməsi baxımından Azərbaycan Televiziyası yenə də bütün telekanalları üstələyir. Bu da televiziyanın əlinin altında olan çox geniş mənbələr hesabına baş verir. Üstəlik də, dediyim kimi, yaradıcılıq və televiziya ustalığı yüksək olan mütəxəssislərin hesabına bu həyata keçirilir. Dünyada televiziyalar xəbəri birinci ötürməklə diqqəti çəkir. Məncə, xəbəri birinci ötürmək yox, xəbəri daha məzmunlu, daha düşündürücü etmək xəbərin səviyyəsini artıran məsələlərdəndir. Ona görə də xəbər yayımı məsələsində də Azərbaycan Televiziyası heç bir telekanala uduzmur” - deyə müsahibimiz bildirdi.
İradə SARIYEVA
