Kamran Əsədov: “… namizədlərin müsahibəyə buraxılması üçün bir neçə meyar nəzərə alınır”
Son bir ildə müəllimlərin işə qəbulu ilə bağlı bir sıra yeniliklər baş verib ki, bunlar da onların xeyrinə olub. Müəllimlərin işə qəbulu sahəsində Təhsil Nazirliyi tərəfindən həyata keçirilən layihələr orta ümumtəhsil məktəblərinin savadlı müəllim kontingenti ilə təmin olunmasına müsbət şərait yaradır.
Məlum olduğu kimi, müəllimlərlə müddətsiz əmək müqaviləsinin bağlanması məqsədilə yeni müsabiqəyə start verilir. Respublikanın ümumtəhsil müəssisələrində müddətli əsaslarla çalışan müəllimlərlə müddətsiz əmək müqaviləsinin bağlanması məqsədilə yeni müsabiqə keçiriləcək.
Təhsil Nazirliyinin yaydığı məlumata görə, Təhsil İşçilərinin Peşəkar İnkişafı İnstitutunun nəzdində fəaliyyət göstərən İnsan Resursları Mərkəzi tərəfindən keçirilən müsabiqədə iştirak etmək istəyən namizədlər cari ilin 1-5 aprel tarixlərində müvafiq saytda qeydiyyatdan keçə bilərlər.
Bildirilənə görə, sözügedən müsabiqələrdə 2017-2018-ci və 2018-2019-cu tədris illəri üçün keçirilmiş müəllimlərin işə qəbulu müsabiqəsində zəruri keçid balını toplayan, pedaqoji istiqamətlər üzrə orta ixtisas və ya ali təhsilli, tutulmayan və ya yeni yaranan vakant yerlərə müddətli əmək müqaviləsi ilə işə qəbul edilmiş müəllimlər iştirak edə bilərlər.
Qeyd edək ki, həvəsləndirmə tədbirləri tətbiq olunmayan müəssisələrə fiziki tərbiyə, musiqi və təsviri incəsənət fənləri üzrə keçid balı 42, digər fənlər üzrə 48, həvəsləndirmə tədbirləri tətbiq olunan müəssisələrə isə bütün fənlər üzrə 36 bal müəyyən edilib.
Müəllimlərlə müddətsiz əmək müqaviləsinin bağlanması məqsədilə yeni müsabiqə keçirilməsi məsələsinə müsbət yanaşan tarix üzrə fəlsəfə doktoru, tanınmış təhsil eksperti Kamran Əsədov “Bakı-Xəbər”ə bildirdi ki, bu, mövcud sahədə neqativ halların qarşısını alacaq. “İlk növbədə qeyd edim ki, 2017-2018-ci və 2018-2019-cu tədris illəri üçün keçirilmiş müəllimlərin işə qəbulu müsabiqəsində zəruri keçid balını toplayan, pedaqoji istiqamətlər üzrə orta ixtisas və ya ali təhsilli, tutulmayan və ya yeni yaranan vakant yerlərə müddətli əmək müqaviləsi ilə işə qəbul edilmiş və müddətli əsaslarla çalışan müəllimlərlə müddətsiz əmək müqaviləsinin bağlanması məqsədilə artıq ikinci ildir daimiləşdirmə proseduru müsabiqə yolu ilə həyata keçirilir ki, bu da olduqca müsbət haldır. Çünki buna qədər qeyd olunan proses yerli rayon təhsil şöbələri tərəfindən həyata keçirilirdi ki, o zaman da müəyyən neqativ hallar baş verirdi. Vacib bir məqamı qeyd edim ki, həvəsləndirmə tədbirləri tətbiq olunmayan müəssisələrə fiziki tərbiyə, musiqi və təsviri incəsənət fənləri üzrə keçid balı 42, digər fənlər üzrə 48, həvəsləndirmə tədbirləri tətbiq olunan müəssisələrə isə bütün fənlər üzrə 36 bal müəyyən edilib.
Yenə də qeyd edim ki, 2 ildir tətbiq edilən yeni qaydanın əhəmiyyəti müddətli müqavilə ilə işə qəbulun mərkəzləşdirilməsidir. Əvvəllər müddətli müqavilə ilə işə qəbulu yerli təhsili idarəetmə orqanları həyata keçirirdilər. Artıq bu da mərkəzləşdirilmiş qaydada nazirlik tərəfindən həyata keçiriləcək.
Müraciət edən müəllimlərə razılıqların verilməsi və namizədlərin müsahibəyə buraxılması üçün bir neçə meyar nəzərə alınır. Birincisi, 2017 və ya 2018-ci ildə keçirilən müəllimlərin işə qəbulu üzrə müsabiqədə müvafiq keçid balını toplayan, pedaqoji istiqamət üzrə ali və ya orta ixtisas təhsili olanlar müsabiqəyə buraxılır. Ən vacib meyarlardan biri də odur ki, müəllimlərin işlədiyi və daimiləşmək istədiyi yer 2018-ci ildə keçirilən müsabiqədə vakant yerlər siyahısında olub. Yəni müsabiqə nəticəsində həmin yerləri bütün vətəndaşlar görüblər”.
K.Əsədov vurğuladı ki, düzdür, 2018-ci ildə bu meyarlardan kənara çıxılma hallar olub, bu mənada ki, burada bəzi fənlərdə istisnalar nəzərə alınıb. O qeyd etdi ki, ibtidai sinif, təsviri incəsənət, texnologiya, musiqi və fiziki tərbiyə fənlərində müsabiqəyə çıxarılmayan vakant yerlərə daimiləşdirilmə aparılıb. “Həmin fənlər üzrə namizədlərin vakant yerləri tutma faizi, demək olar ki, bütün illər üzrə digər fənlərlə müqayisədə aşağı olur. Həmin fənlər üzrə vakant yerlər qalır və hər dəfə Təhsil Nazirliyi həmin yerlərə müddətli müqavilə ilə işə qəbul etməyə məcbur olur.
Bütün hallarda, bu yeniliyi təhsilin inkişafı, əlçatanlığı üçün uğurlu hesab edirəm”- deyə K.Əsədov vurğuladı.
İradə SARIYEVA
