Eyyub Hüseynov: “Prezidentin xəbərdarlığına əməl etməyən, nazirliyin göstərişinə əhəmiyyət verməyən şadlıq evlərinin adları tam şəkildə ictimaiyyətə açıqlansın”
Hamıya bəllidir ki, ictimai iaşə obyektlərinin yerləşdiyi ərazilərdə, xüsusən şənbə və bazar günlərində qoxu ilə müşayiət olunan tüstü insanlarda diskomfort yaradır, vətəndaşların çoxsaylı şikayət və narazılığına səbəb olur. Bakı şəhərinin müxtəlif rayonlarında fəaliyyət göstərən ictimai iaşə obyektləri, restoran, kafe, şadlıq sarayları tərəfindən atmosferi tullantılarla çirkləndirmə, yerləşdikləri ərazilərdə, xüsusilə sakinlərin kütləvi istarahət yerlərində ətraf mühitə ziyan vurmaları vətəndaşları narahat edir.
Məlum olduğu kimi, bir müddət öncə Ekologiya və Təbii Sərvətlər Nazirliyi Bakıda havanın çirklənməsində rol oynayan restoran və kafe sahiblərinə ciddi xəbərdarlıq edərək, bu obyektlərdən çıxan tüstünün zərərsizləşdirilməsi üçün xüsusi avadanlıqların quraşdırılması ilə bağlı tapşırıq verdi. Eləcə də xəbərdarlıqda bu qaydalara əməl etməyən şadlıq sarayları və restoranların cərimələnməsi də ciddi vurğulanırdı.
Hətta Prezident İlham Əliyev də havanı çirkləndirən şadlıq evlərinə ciddi xəbərdarlıq etmişdi. Məlumat üçün bildirək ki, oktyabrın 10-da Nazirlər Kabinetinin 2018-ci ilin 9 ayı ərzində sosial-iqtisadi inkişafın yekunlarına həsr olunmuş iclasında Prezident İlham Əliyev deyib ki, havanı çirkləndirən məişət obyektlərinə ciddi xəbərdarlıq edilib: "Axsam saatlarında Bakı şəhərini tüstü bürüyür. Şadlıq evlərində tüstü təmizlənmədən havaya sovrulur. Ona görə çox ciddi xəbərdarlıq edilib, kim əməl etməyəcəksə, o şadlıq evinin, məişət obyektinin qapısı bağlanacaq. Mən tapşırmışam ki, bunun üçün hüquqi əsaslar hazırlansın. Bildiyimə görə, birinci xəbərdarlıqdan sonra bir çox məişət obyektləri təmizləyici qurğuları quraşdırmağa başlayıblar. Onların hamısına məsləhətim ondan ibarətdir ki, bu işi tezləşdirsinlər. Çünki ikinci xəbərdarlıq olmayacaq, bir də görəcəklər ki, əldən çıxdı. Ona görə tezliklə bütün böyük-kiçik məişət obyektlərində havanı çirkləndirən, havaya tüstü, kanserogen buraxan obyektlərdə təmizləyici qurğular quraşdırılmalıdır, müvafiq qurumlar monitorinq aparmalıdır. Mən Bakı Şəhər İcra Hakimiyyətinə, Ekologiya və Təbii Sərvətlər Nazirliyinə göstəriş verdim ki, mənə dərhal məlumat verilsin və dərhal ölçü götürüləcək".
Prezidentin məlum tapşırığından sonra Ekologiya və Təbii Sərvətlər Nazirliyi şadlıq evləri ilə bağlı monitorinq həyata keçirdi. Hansı restoran və ya şadlıq evində hava təmizləyən qurğu yox idisə, onlara bu avadanlığın quraşdırılmasının vacibliyi bildirilmişdi. Buna əməl etməyən şadlıq evlərinin bağlanacağı nəzərə çatdırılmışdı. Tapşırıqdan bir müddət sonra bəzi restoran, şadlıq evi və ya iaşə obyektləri məkana hava təmizləyici qurğu aldılar, bəziləri isə Prezidentin tapşırığına məhəl belə qoymadı. Restoranlar olan küçədən keçərkən ətrafı tüstü qoxusu yenə də bürüyür. Şadlıq saraylarından çıxan tüstü ətrafda yaşayan sakinləri narahat edir. Bu mənzərə daha çox şadlıq evlərinin sıx yerləşdiyi Nizami, Xətai və Binəqədi rayonlarında hökm sürür.
Qeyd edək ki, eyni mənzərə hər axşam Nizami rayonu Bəkir Çobanzadə küçəsində, eləcə də Binəqədi rayonunun şadlıq evləri cəmləşən küçələrində də yaşanır.
Şadlıq evlərinin sahibləri iddia edirlər ki, onlar obyektdə müasir standartlara uyğun olan təmizləmə cihazları quraşdırıblar. Müəyyən zaman keçdikdən sonra həmin avadanlıqların filtri yenilənmədiyi üçün, tüstü normadan artıq çıxır. Restoran sahibləri qeyd edirlər ki, yeni filtrlər quraşdırılandan sonra ətrafda yaşayan vətəndaşlar heç bir tüstü müşahidə etməyəcəklər.
Ancaq ekspertlər isə iddia edirlər ki, şadlıq evlərinin, demək olar ki, əksəriyyətində hava təmizləyici qurğu quraşdırılmayıb. Onlar monitorinq zamanı adıçəkilən qurğunun dəyişdirilmək üçün çıxarıldığını bildirirlər. Ancaq, əslində, qurğu quraşdırılmayıb.
Ekologiya və Təbii Sərvətlər Nazirliyinin nümayəndəsi isə media nümayəndələrinə açıqlamasında qeyd edib ki, paytaxtın müxtəlif yerlərində son 10 gündə avadanlıq quraşdırılsa da, normadan artıq tüstü xaric edən 10-dan çox şadlıq sarayı müəyyən edilib və onlara vəziyyəti dəyişmək üçün 24 saat müddətinə məcburi göstəriş verilib. Elə "Təbrik" restoranı da xəbərdarlıq edilən obyektlərin arasındadır: “Bakı, Abşeron və Sumqayıtda 600-dən çox şadlıq evi var və onların hamısını bir gündə monitorinq etmək fiziki olaraq mümkün deyil”.
Maraqlıdır, qoyulan tələblərə əməl etməyən çoxlu sayda şadlıq evi olduğu halda, niyə məhz “Təbrik” restoranının adı çəkilir. Yaxşı olar ki, hava təmizləyici qurğu quraşdırmayan digər restoranların da adı ictimaiyyətə tam şəkildə açıqlansın. Beləliklə, əhali həmin məkanlara getməkdən imtina edər.
Azad İstehlakçılar Birliyinin (AİB) sədri Eyyub Hüseynov bizimlə söhbətində qeyd etdi ki, restoranlar və şadlıq sarayları ekologiyaya ziyan vururlar. Bu sahədə yaşanan problemi həll etmək üçün dövlət orqanları müəyyən işlər görürlər.
Onun sözlərinə görə, görüləcək tədbirlər ətraf mühitin çirklənməsinin qarşısının alınmasına və insanları narahat edən halların aradan qaldırılmasına təsir edəcək: “Bu işdə əhalinin fəallığı lazımdır. Əgər əhali elə yerləri boykot etsə, dövlət orqanlarının qərarları asanlıqla yerinə yetirilər. AİB ETSN-nin cərimələdiyi və xəbərdarlıq etdiyi şadlıq evi və restoranlardan əhalinin imtina etməsi üçün iş aparacaq”.
Birlik sədri qeyd etdi ki, havanı çirkləndirən iaşə obyektlərinə qarşı maliyyə sanksiyası tətbiq oluna bilər: “Yaxşı olar ki, atmosferi çirkləndirən restoran və ya şadlıq evlərinin adı tam şəkildə ictimaiyyətə açıqlansın. Bir-iki restoranın adı deyil, Prezidentin xəbərdarlığına əməl etməyən, nazirliyin göstərişinə əhəmiyyət verməyən şadlıq evlərinin adları tam şəkildə ictimaiyyətə açıqlansın. Eyni zamanda, əhali həmin məkanlarda hər hansı bir məclis təşkil etməsin. İctimai qınaq olarsa, bu sahədə vəziyyət müsbətə doğru dəyişər”.
Həmsöhbətimiz onu da vurğuladı ki, ekologiyaya zərər yetirən, havanı çirkləndirən şadlıq evləri bağlanmalıdır. Çünki o şadlıq evləri ətrafda yaşayan sakinlərin sağlamlığına təsir edirlər. Müasir standartlara cavab verməyən, təmizləyici qurğuları olmayan ictimai iaşə obyektləri bağlanmalıdır: “Çünki o obyektlərə dəfələrlə qeyd olunan qurğunun quraşdırılması ilə bağlı xəbərdarlıq olunub. Ancaq onlar xəbərdarlığa əhəmiyyət verməyiblər. O üzdən, bu tip məkanların fəaliyyəti dayandırılmalıdır”.
Günel CƏLİLOVA
