Naqif Həmzəyev: “Bu da 80 min nəfərdən ibarət müharibə veteranlarına dövlət dəstəyinin əhəmiyyətli şəkildə artırıldığından xəbər verir”
Prezident İlham Əliyevin 25 fevral 2019-cu il tarixli Sərəncam ilə müharibə veteranlarına 80 manat məbləğində aylıq təqaüd təyin olunub. Müharibə veteranlarının sosial rifah halının yüksəlməsində, onların kommunal xərclərinin qarşılanmasında mühüm rol oynayacaq təqaüdü bu qəbildən olan bütün insanlar ala biləcək.
Millət vəkili Naqif Həmzəyev “Bakı-Xəbər”ə açıqlamasında bildirdi ki, ölkəmizdə sosial siyasət davamlı xarakter alıb. Onun sözlərinə görə, Azərbaycan Prezidenti İlham Əliyevin rəhbərliyi ilə ölkəmizdə uğurla davam etdirilən sosial siyasət həyatımızın bütün sahələrinə öz müsbət təsirini göstərməkdədir. “Hər bir ölkə vətəndaşına qayğı, onların yaşayış səviyyəsinin yüksəldilməsi üçün həyata keçirilən tədbirlər respublikada əhalinin sosial vəziyyətinin getdikcə yaxşılaşması üçün əsaslı zəmin yaradıb. Ölkə Prezidenti İlham Əliyev dəfələrlə bəyan edib ki, dövlətin yürütdüyü siyasətin mərkəzində Azərbaycan vətəndaşı dayanır. Bu gün tam əminliklə demək olar ki, Azərbaycanın modern dövlət quruculuğunda sosial siyasətin önəmli istiqamətlərindən biri şəhid ailələrinin, müharibə veteranlarının və əlillərinin sosial müdafiəsidir. Azərbaycanın ərazi bütövlüyünün müdafiəsi zamanı döyüşlərdə şəhid olanların ailə üzvləri, fiziki sağlamlığını itirmiş vətəndaşlar, həmçinin, Böyük Vətən Müharibəsi əlilləri, hərbi xidmət vəzifəsini yerinə yetirərkən əlil olmuş şəxslər, 20 Yanvar və Çernobıl əlillərinin mənzil-məişət şəraitləri yaxşılaşdırılır, onlara Prezident təqaüdü verilir. Artıq ölkəmizdə məcburi köçkünlər çadır şəhərciklərində deyil, onlar üçün salınan müasir standartlara uyğun evlərdə yaşayırlar”.
N.Həmzəyev qeyd etdi ki, fiziki sağlamlığını itirən müharibə əlilləri üçün hər cür lazımi şərait yaradılır. Millət vəkilinin bildirdiyinə görə, şəhid ailələri və əlillərə mütəmadi olaraq yeni mənzillər, müharibə əlillərinə avtomobillər verilir, hər iki statusa malik olanların övladları ali təhsil müəssisələrində dövlət hesabına təhsil alırlar, onların müalicəsi üçün reabilitasiya mərkəzləri açılır və lazım gələndə müalicə olunmaq üçün xarici ölkələrə göndərilirlər. “Lakin bu son deyil. Dövlətin bu təbəqəyə göstərdiyi diqqətin davamı olaraq ölkə Prezidentinin 25 fevral 2019-cu il tarixdə imzaladığı Sərəncama əsasən, aprel ayının əvvəlindən müharibə veteranlarına Prezidentin aylıq təqaüdü veriləcək. Sərəncama uyğun olaraq, müharibə veteranlarına kommunal, nəqliyyat və digər xidmətlərə görə sosial müavinət (55 manat) əvəzinə, habelə döyüşən ordunun tərkibində xidmət etmiş müharibə iştirakçılarının əmək pensiyasının sığorta hissəsinə əlavə (11 manat) əvəzinə Prezidentin 80 manat məbləğində aylıq təqaüdü veriləcək. Bu da 80 min nəfərdən ibarət müharibə veteranlarına dövlət dəstəyinin əhəmiyyətli şəkildə artırıldığından xəbər verir. Ümumiyyətlə, Azərbaycanda müharibə veteranlarına və əlillərinə yüksək dövlət qayğısı dövlətin bu istiqamətdə həyata keçirdiyi tədbirlərin ardıcıl olduğunu sübut edir. Novruz bayramı ərəfəsində belə bir sərəncamın dövlət başçısı tərəfindən imzalanması isə bütün müharibə veteranları, onların ailələri üçün əsl bayram hədiyyəsi oldu” - deyə millət vəkili bildirdi.
İradə SARIYEVA
