Əliməmməd Nuriyev: “… yeni standartlar sayəsində cinayətkarlar köhnə vərdişdən uzaqlaşıb, sənətə, peşəyə maraq göstərəcəklər”
Məlum olduğu kimi, Nazirlər Kabineti “Cəzaçəkmə müəssisələri nəzdində fəaliyyət göstərən peşə təhsili müəssisələrində və xüsusi peşə təhsili müəssisələrində tətbiq edilən dövlət peşə təhsili standartları”nı təsdiq edib. Standartlar cəzaçəkmə müəssisələri nəzdində fəaliyyət göstərən peşə təhsili müəssisələrində və xüsusi peşə təhsili müəssisələrində peşə təhsilinin məzmununu; peşə təhsilinin idarə olunmasını; maddi-texniki bazasını; infrastrukturunu; təhsilverənlərin keyfiyyət göstəricilərini; təhsilalanların bilik, bacarıq və vərdişlərinin səviyyəsini müəyyənləşdirir.
Qeyd edək ki, bu standartlar Azərbaycan ərazisində cəzaçəkmə müəssisələri nəzdində fəaliyyət göstərən bütün peşə təhsili müəssisələrinə və xüsusi peşə təhsili müəssisələrinə şamil olunur və peşə təhsili sahəsində ixtisaslar üzrə təhsil proqramlarının hazırlanmasında və tətbiqində əsas tutulur. Onu da bildirək ki, cəzaçəkmə müəssisələri nəzdində fəaliyyət göstərən peşə təhsili müəssisələrində və xüsusi peşə təhsili müəssisələrində təhsilin keyfiyyətinə dövlət nəzarəti Təhsil Nazirliyi tərəfindən həyata keçirilir.
“Cəzaçəkmə müəssisələri nəzdində fəaliyyət göstərən peşə təhsili müəssisələrində və xüsusi peşə təhsili müəssisələrində tətbiq edilən dövlət peşə təhsili standartları”nın təsdiq edilməsinin əhəmiyyəti haqqında danışan Konstitusiya Araşdırmalar Fondunun prezidenti Əliməmməd Nuriyev “Bakı-Xəbər”ə açıqlamasında qeyd etdi ki, peşə standartları ilə bağlı boşluq var idi: “Yeni standartlar yaradılmalı idi. Hər bir müstəqil dövlətin peşələrlə bağlı müasir standartları olmalıdır. Cəzaçəkmə müəssisələrində peşə standartlarının tətbiq olunması məşğulluq probleminin həllinə səbəb olacaq. Məlumat üçün bildirim ki, Prezident İlham Əliyevin məşğulluğun artırılması ilə bağlı imzaladığı sərəncamda qeyd olunur ki, məhkumlar arasında məşğulluq artırılmalıdır. Məşğulluğun artırılması ilə bağlı müəyyən peşə vərdişləri də olmalıdır. Nəzərə almaq lazımdır ki, bəzi məhkumlar cinayət edərkən hər hansı bir peşəyə malik deyildilər. Yeni tətbiq olunacaq standartlar imkan verəcək ki, daha peşəkar, ixtisaslı kadrlar hazırlansın. Məlumdur ki, cəzaçəkmə müəssisələrində müxtəlif sexlər fəaliyyət göstərir. Məhkumlar mənimsədikləri peşə sayəsində sənət öyrənəcəklər, həm də qazanc əldə edəcəklər”.
Həmsöhbətimiz onu da vurğuladı ki, cəzaçəkmə müəssisələrində tətbiq olunacaq yeni standartlar sayəsində cinayətkarlar köhnə vərdişdən uzaqlaşıb, sənətə, peşəyə maraq göstərəcəklər. Həmçinin, məhkumlar azadlığa çıxandan sonra mənimsədikləri peşə sayəsində tez bir zamanda işlə təmin olunacaqlar.
Günel CƏLİLOVA
