Məhkəmələrdə iş yükünü azaltmaq, eyni zamanda qarşılıqlı mübahisələrin daha sürətli həllinə nail olmaq üçün Azərbaycanda yeni Mediasiya Şurası yaradılacaq. Qeyd edək ki, bu məsələ yeni hazırlanan “Mediasiya haqqında” qanunda öz əksini tapıb.
Qanun layihəsinin tətbiqi dairəsinə mülki işlər və iqtisadi mübahisələr (xarici elementli mübahisələr də daxil olmaqla), ailə, əmək və inzibati hüquq münasibətlərindən irəli gələn, eləcə də cinayət işlərindən və inzibati xətalar haqqında işlərdən irəli gələn mübahisələr daxildir.
Qanun layihəsində mediator olmaq istəyən fiziki şəxslər və təşkilatlar üçün tələblər də müəyyən edilib.
Layihəyə görə, mediasiya sahəsində tənzimlənmənin və nəzarətin həyata keçirilməsi məqsədilə mediasiya təşkilatlarının, mediatorların və mediasiya təlimi qurumlarının üzv olaraq daxil olduğu Mediasiya Şurası yaradılır.
Onu da bildirək ki, qanun layihəsi Prezident İlham Əliyev tərəfindən Milli Məclisə təqdim edilib. Layihə Milli Məclisin martın 29-da keçiriləcək plenar iclasında müzakirəyə çıxarılacaq.
“Mediasiya haqqında” qanunun əhəmiyyəti barəsində məlumat verən vəkil Xəyal Bəşirov bildirdi ki, yeni yaradılacaq Mediasiya Şurası hazırda məhkəmələrdə qalaqlanan çoxsaylı məhkəmə işlərinin sayına təsir edəcək. Adıçəkilən Şura sayəsində məhkəmə işlərinin sayı azalacaq: “Mediasiya Şurasının məşğul olacağı işlərin siyahısı isə kifayət qədər böyükdür. Qanun layihəsinin tətbiqi dairəsinə mülki işlər və iqtisadi mübahisələr, ailə, əmək və inzibati hüquq münasibətlərindən irəli gələn, eləcə də cinayət işlərindən və inzibati xətalar haqqında işlərdən irəli gələn mübahisələr daxildir.
Mediasiya Şurası hüquqi şəxs statusunda olacaq. Şura mediatorların intizam məsuliyyətinə cəlb olunması barədə qərarları da qəbul etmək səlahiyyətində olacaq. Bundan başqa, bəzi işlərin Mediasiya Şurasında baxılması isə məcburi ola bilər”.
Həmsöhbətimiz onu da bildirdi ki, mediasiya prosesinin ümumi müddəti 30 gün müəyyən edilib. Yəni proses 30 gün ərzində yekunlaşmalıdır: “Mübahisənin mürəkkəbliyi nəzərə alınaraq tərəflərin razılaşması ilə prosesin müddəti daha 30 gün müddətinə uzadıla bilər. Mediasiya prosesi nəticəsində əldə edilən barışıq sazişi yazılı formada bağlanmalıdır. Mediasiya prosesinin həyata keçirilməsi üçün tərəflər qarşılıqlı razılaşma əsasında bir və ya bir neçə mediator seçə bilərlər. Mediator tərəflərdən birini üstün mövqedə qoyan və ya hüquq və azadlıqlarını məhdudlaşdıran hərəkətlərə yol verə bilməz. Kifayət qədər vəsaiti olmayan hər hansı tərəfin mediasiya xərcləri dövlət büdcəsi vəsaiti hesabına ödənilir”.
X.Bəşirovun sözlərinə görə, yeni yaradılacaq Mediasiya Şurası ilə ölkədə iş yerlərinin sayı da artacaq.
Günel CƏLİLOVA
