Davud Rəhimli: “Əlilliyi olan şəxslərin sosial təminatının gücləndirilməsinə ölkə başçısı tərəfindən xüsusi qayğı göstərilir”
Azərbaycan müstəqillik qazanandan sonra ölkədə cəmiyyətin bir hissəsi olan əlillərə dövlət qayğısı dəfələrlə yüksəlib. Bu sahədə bir çox qanunlar qəbul olunub, vaxtaşırı əlillərə mənzil, maşın və sair kimi vasitələr hədiyyə edilir, ildən-ilə onlara verilən pensiya və təqaüdlər artırılır.
Ölkə Prezidentinin 2006-cı il 28 dekabr tarixli Sərəncamı ilə təsdiq edilmiş Azərbaycan Respublikasında İnsan Hüquqlarının Müdafiəsi üzrə Milli Fəaliyyət Planında (MFP), eyni zamanda, 27 dekabr 2011-ci il tarixli Sərəncamı ilə təsdiq edilmiş Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramında əlilliyi olan şəxslərlə bağlı müddəaların olması dövlətimizin bu qəbildən olan təbəqəsinin hüquqlarının təmin edilməsini daim diqqət mərkəzində saxladığını göstərir.
Qeyd etdiyimiz kimi, əlillərin rahatlığının təmin olunması üçün hər il ölkə başçısı tərəfindən onlara avtomobil hədiyyə edilib.
Onu da bildirək ki, Prezident İlham Əliyevin 18 mart 2019-cu il tarixli “Azərbaycan Respublikasının ərazi bütövlüyü, müstəqilliyi və konstitusiya quruluşunun müdafiəsi, 1990-cı ilin 20 Yanvar hadisələri ilə əlaqədar əlilliyi olmuş, Çernobıl AES-də qəza nəticələrini aradan qaldırmaqda iştirak edib əlilliyi olmuş şəxslərin, II Dünya Müharibəsi əlillərinin və onlara bərabər tutulanların xüsusi nəqliyyat almaq üçün tibbi göstərişlər üzrə avtomobillə təmin edilməsi sahəsində əlavə tədbirlər haqqında” Sərəncamı əhalinin, xüsusilə həssas qrupların rifah halının yüksədilməsi istiqamətində növbəti mühüm addımdır.
Sərəncamda müvafiq kateqoriyalardan olan vətəndaşların xüsusi nəqliyyat almaq üçün tibbi göstərişlər üzrə avtomobillərlə təminatının gücləndirilməsi məqsədilə Azərbaycan Respublikasının 2019-cu il dövlət büdcəsində nəzərdə tutulan Azərbaycan Respublikası Prezidentinin ehtiyat fondundan 5 (beş) milyon manat ayrılması tapşırılıb. Bu da 2019-cu ildə həmin insanlara verilməsi üçün əlavə olaraq 400-dən artıq avtomobilin alınmasına imkan verəcək.
Beləliklə, cari ildə Əmək və Əhalinin Sosial Müdafiəsi Nazirliyi tərəfindən müharibə əlillərinə və onlara bərabər tutulanlara nəzərdə tutulduğundan (180 avtomobil) 3 dəfədən çox olmaqla 600-dək avtomobil təqdim olunacaq.
Məlumat üçün bildirək ki, bu günə kimi əlillərə təqdim olunan minik avtomobillərinin sayı 6 144-ə çatıb. Hazırda dövlət büdcəsi hesabına minik avtomobili ilə təmin olunmaq üçün növbədə dayanmış əlilliyi olan vətəndaşların sayı 997 nəfərdir ki, cari il ərzində onlardan da artıq 600-ə yaxın şəxsin avtomobillə təminatı həyata keçiriləcək.
Qeyd edək ki, 2009-cu ildə müharibə əlillərinə 500, 2010-cu ildə 350, 2011-ci ildə isə 304 avtomobil paylanıb. 2012-ci ildə müharibə əlillərinə 325 minik avtomobili təqdim olunub. 2013-cü ildə isə Qarabağ müharibəsi əlillərinə 280 ədəd minik avtomobili verilib. Nazirlik tərəfindən 2014-2015-ci illərdə 1933 nəfər müharibə əlili və onlara bərabər tutulan şəxsə “Naz-LİFAN” markalı avtomobili verilib. 2016-cı ildə 130 müharibə əlilinə avtomobil hədiyyə olunub. 2017-ci ildə isə əlilliyi olan 160 nəfərə avtomobil verilib. Qeyd etdiyimiz qəbildən olan şəxslərə 2018-ci ildə 265 avtomobil verilib.
Bu illər ərzində əlillərin sosial müdafiəsinin gücləndirilməsi istiqamətində atılan hər bir addım ölkə ictimaiyyəti tərəfindən müsbət qarşılanır.
Əlil Təşkilatları İttifaqının (ƏTİ) prezidenti Davud Rəhimli “Bakı-Xəbər”ə açıqlamasında qeyd etdi ki, Qarabağ müharibəsi, 1990-cı ilin 20 Yanvar hadisələri ilə əlaqədar əlilliyi olmuş, Çernobıl AES-də qəza nəticələrini aradan qaldırmaqda iştirak edib əlilliyi olan şəxslərin, eyni zamanda, II Dünya Müharibəsində əlil olan şəxslərə dövlət tərəfindən xüsusi qayğı və diqqət göstərilir: “Qeyd olunan qəbildən olan şəxslər hər il dövlət tərəfindən həm mənzil, həm də nəqliyyat vasitəsilə təmin olunurlar. Dövlət Proqramı əsasında əlilliyi olan şəxslərə xüsusi qayğı göstərilir. Bu ildə cənab Prezidentin sərəncamı ilə vəsait ayrılıb. Həmin şəxslərin avtomobillərlə təmin olunmasını, hər zaman olduğu kimi, Əmək və Əhalinin Sosial Müdafiəsi Nazirliyi təmin edəcək”.
Həmsöhbətimizin sözlərinə görə, əlilliyi olan şəxslərə avtomobil və digər hədiyyələrin verilməsi böyük sosial proqramdır. Bu proqram həm maddiyyat, həm də əhatə dairəsinə görə böyükdür: “Qeyd edim ki, bu illər ərzindən 6000-dən çox vətəndaş avtomobillə təmin olunub. Məlumat üçün bildirim ki, illər öncə verilən nəqliyyat vasitəsilə son zamanlar hədiyyə olunan avtomobillər arasında fərq var. Son illər verilən nəqliyyat vasitələri daha müasir və rahatdır. Sevindirici haldır ki, əlilliyi olan şəxslərə verilən avtomobillər ölkədə istehsal olunur”.
Günel CƏLİLOVA
