Azər Həsrət: “Yanaşma və prinsiplərə riayət etməklə bəzi şəxsi informasiyaları paylaşmaq olar”
Nəqliyyat, rabitə və yüksək texnologiyalar nazirinin müavini Elmir Vəlizadə sosial şəbəkələrin törədə biləcəyi fəsadlarla bağlı maraqlı açıqlama verib. O bildirib ki, insanların şəxsi məlumatlarını sosial şəbəkələrdə yerləşdirməsi düzgün deyil, çünki heç kim onlardan sonra necə istifadə ediləcəyini bilmir.
“Məsələn, kimsə harasa səyahət edirsə, bu barədə sosial şəbəkələrdə məlumat yaymaq düzgün deyil. Bu məlumatdan sizi tanıyanlar və tanımayanlar xoşagəlməz məqsədlər üçün istifadə edə bilərlər. Hər kəs bu məlumatları yayarkən sabahını düşünməlidir. Nazirlik olaraq sosial şəbəkələrdəki məlumatların ötürülməsi hallarına müdaxilə etmək imkanımız yoxdur. Çünki onlar ölkədən kənarda yerləşirlər. Sosial şəbəkələrin qaydalarının tənzimlənməsində hansısa ölkələrin və yaxud qurumların heç bir rolu yoxdur. Müəyyən təkliflər irəli sürsək də, onlara baxılmır".
Rəsmi şəxsin əhalini maarifləndirmə istiqamətində açıqladığı fikirlər maraq doğurur və bir qədər də ətrafında dəqiqləşdirmə aparmağa ehtiyac var. Daha hansı kateqoriya şəxsi məlumatların sosial şəbəkələrdə paylaşılması risqli sayıla bilər?
Media eksperti Azər Həsrət qəzetimizə açıqlamasında bildirdi ki, sosial şəbəkələr vasitəsilə paylaşılan informasiyalar kateqoriyalara bölünür və onların heç də hamısının paylaşılması risq yaratmır: “Amma elə məlumatlar var ki, onları qəti paylaşmaq olmaz. Məsələn, kredit kartlar, şəxsiyyət vəsiqəsinin pin kodu risq yarada biləcəklər sırasındadır. Amma sosial şəbəkələrdən qeydiyyatdan keçərkən biz özümüzün əlçatanlığını təmin etmək üçün bəzi məlumatlarımızı ora yerləşdiririk. Tutaq ki, mən şəxsən öz mobil telefon nömrəmi orada açıq şəkildə yerləşdirmişəm. Hansı vəzifəni daşıdığım və ya hansı fəaliyyətlərlə məşğul olduğum haqda da ətraflı məlumatları qeyd etmişəm. Getdiyim səfərlər, iştirak etdiyim tədbirlərlə bağlı olan informasiyalarım da açıqdır. Amma şəxsimə aid elə məlumatlar var ki, onların paylaşılması doğrudan da zəruri sayılmır. Əslində, Elmir Vəlizadə də məhz həmin kateqoriyadan olan informasiyaları nəzərdə tutur. Məsələn, o deyir ki, harasa səfərə gedəcəyiniz barədə əvvəlcədən məlumatın verilməsi ciddi fəsadlar yarada bilər. O qısa məlumat verib. İnternet texnologiyaları ilə uzun müddətdir yaxından təmasda olan bir şəxs kimi bunun geniş izahını vermək istərdim. Tutaq ki, ailənizlə birgə hansısa uzaq məsafəyə dincəlməyə gedirsiniz. Evinizin qabağında bir şəkil çəkdirib sosial mediada paylaşırsınız və qeyd edirsiniz ki, “getdik filan yerə, bir də 10 gündən sonra gələcəyik”. Bu, ev oğruları və ya qarətçilər üçün yaxşı informasiyadır. Çünki onlar görürlər ki, ailəniz bütünlüklə mənzili tərk edir və həmin evə girmək üçün ideal şərait yetişib. Bax, bu tip informasiyanı bölüşməyiniz sizə ciddi zərər gətirə bilər”
Azər Həsrətin sözlərinə görə, yaxşı olar ki, ailə ilə edilən səfər barədə oradan qayıtdıqdan sonra bol-bol şəkil paylaşılsın: “Yanaşma və prinsiplərə riayət etməklə bəzi şəxsi informasiyaları paylaşmaq olar. Amma dediyim istiqamətlərdə bir az ehtiyatı gözləməliyik”.
Məhəmmədəli QƏRİBLİ
