Vaqif Abışov: “Siyasi simvol və rəmzlərin öyrənilməsi sahəsində mütəxəssislərin yetişdirilməsinə ciddi ehtiyac var”
Siyasi simvollar və rəmzlər həmişə maraq doğurur. Hər kəs istəyir ki, onların alt mənalarına varsın, bu rəmzlərdə, simvollarda gizlənən mahiyyəti öyrənsin. Azərbaycanda tarixən mövcud olan qəbilələrin, dövlətlərin, sultanlıqların, xanlıqların hər birinin öz simvolları olub. Bu simvollar əsasən bayraqların üzərində əks olunub.
Tarixi simvol və damğaların öyrənilməsi istiqamətində işlər aparılsa da, təəssüf ki, müasir dövrdə siyasi simvol və rəmzlər barədə araşdırmalar aparılmayıb. Bu gün Azərbaycanda, demək olar ki, siyasi simvol və rəmzləri araşdıran mütəxəssislər yoxdur. Doğrudur, ayrı-ayrı tarixçilərin bu istiqamətdə araşdırmaları var, lakin bu tədqiqatlar birbaşa bu sahənin mütəxəssisləri tərəfindən aparılmadığı üçün, bu istiqamətdə dərin boşluqlar var.
Heç şübhəsiz ki, hər bir ölkənin tarixi və dövlətçilik ənənələri onun rəmzlərində, atributlarında, simvollarında öz əksini tapır. Bayraq, gerb və himn hər bir dövlətin müstəqilliyini təcəssüm etdirən müqəddəs rəmzlərdir. Bundan başqa, ölkələrdə fəaliyyət göstərən ictimai-siyasi qurumların, partiyaların da özlərinin ayrıca rəmzləri, simvolları var. Həmçinin də bizim ölkəmizdə. Təəssüf ki, Azərbaycanda mövcud olan bu qurumların siyasi simvol və rəmzlərinin öyrənilməsi yönündə heç bir iş görülməyib. Bu da ölkəmizdə mövcud sahə üzrə mütəxəssislərin yetişdirilməməsi ilə əlaqədardır.
Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun əməkdaşı, tarix üzrə fəlsəfə doktoru Vaqif Abışov “Bakı-Xəbər”ə bildirdi ki, siyasi simvolları və rəmzləri öyrənən mütəxəssislər nəsli yetişdirilməsinə ciddi ehtiyac var. V.Abışovun sözlərinə görə, hələ qədim zamanlardan başlayaraq bütün dövlətlərin özünəməxsus fərqləndirici əlamətləri – simvol və rəmzləri olub. “Doğrudan da çox vacib bir məsələni gündəmə gətirmisiniz. Bu sahə, demək olar ki, heç kəsin yadına düşmür. Bəzən belə ciddi məsələlərə nədənsə “kiçik məsələdir” deyib əhəmiyyət vermirik. Deyim ki, mən siyasi simvol və rəmzlərlə bağlı hər hansı bir kitaba, mütəxəssisə rast gəlməmişəm. Ola bilsin, nə zamansa, Sovet dövrünün simvol və rəmzlərini araşdıran tədqiqatçılar olub. Bu sahədə müəyyən tədqiqatlar var, ancaq geniş mənada bu istiqamətdə araşdırmalar aparılmayıb. Fikrimcə, siyasi simvol və rəmzlərin öyrənilməsi sahəsində mütəxəssislərin yetişdirilməsinə ciddi ehtiyac var. Ümumiyyətlə, nəinki müasir siyasi simvol və rəmzlərin öyrənilməsi, hətta qədim dövrlərdə mövcud olan Azərbaycan dövlətlərinin, xanlıqların da simvol və rəmzlərini tədqiq edən mütəxəssislər olmaldır. Əlbəttə, qədim tayfalardan, qəbilələrdən üzü bəri simvollar, rəmzlər olub. Həmin o qəbilələr və tayfalar öz simvolları, rəmzləri ilə tanınıb, bir-birindən fəqrləniblər. Sonrakı mərhələdə isə tayfalar birləşib və onların simvolları vahid bayraqda öz əksini tapıb. Bu gün həm siyasi partiyaların, həm ictimai qurumların, həm də digər təşkilatların simvol və rəmzlərinin ciddi öyrənilməsinə zərurət var. Bu da mütəxəssislərin hazırlanması ilə mümkün olan məsələdir” - deyə bildirən V.Abışov hesab edir ki, aidiyyəti elmi-tədqiqat institutlarında, eləcə də ali məktəblərdə bu sahədə mütəxəssis hazırlanmalıdır. Onun sözlərinə görə, bu mütəxəssis həm tarixi, həm mifologiyanı, həm də digər sahələri dərindən bilməlidir ki, bu istiqamətdə araşdırmalar apara bilsin.
İradə SARIYEVA
