Elçin Rüstəmov: “Ulduzu az olan otellərin sayının artırılması həm turist axınının güclənməsinə səbəb olar, həm də ölkə iqtisadiyyatına gəlir gətirər”
Tətillərdə, həftə sonlarında, xüsusən respublikamızın rayonlarına səfər edən insanları “hansı oteldə gecələməli”sualı düşündürür. Düzdür, bu gün bölgələrdə çoxlu sayda istirahət mərkəzləri, otellər olsa da insanların bir qismi cibinə uyğun məkanda istirahət etməyi düşünür.
Bu səbəbdən də rayonlarda otel qiymətindən fərqli olaraq evlərdə qalmağa üstünlük verənlər az deyil. Ancaq səyahət sevərlər və ya iş üçün rayona getməli olanlar təhlükəsizlik baxımından evlərdə deyil, məhz oteldə qalmağa üstünlük verir. Turistlər ulduzundan asılı olmayaraq, otellərdə gecələməyə daha çox üstünlük verirlər. Reallıq isə budur ki, sosial durumu yüksək olmayan insanlar beşulduzlu otellərə yaxın düşə bilmir, bələd olmadığı, tanımadığı evlərdə isə gecələməyi riskli hesab edir. Bunun üçün təbii ki, otellərin sayının və seçiminin çox olması zərurəti yaranır. Digər tərəfdən, mövcud otellərdə də yer tapmaq problemi var. Bu səbəbdən 2-3 ulduzlu otellərin sayının artırılması təklif olunur.
Bəllidir ki, bu gün paytaxt Bakı ilə yanaşı, bölgələrdə də 4-5 ulduzlu otellərin sayı çoxluq təşkil edir.
O da məlumdur ki, ölkə turizmi son zamanlar inkişaf dövrünü yaşayır. İstirahət üçün ölkəmizə gələn xarici vətəndaşların sayı günü-gündən artır. Regionlara səfər edən turistlər yerləşmə üçün böyük xərc çəkmək istəmirlər. Onlar daha çox istirahətə və qidalanmaya meyllidirlər. Bu mənada regionlarda ekonom klass, 2-3 ulduzlu otellərin daha da artırılması zərurəti yaranır.
Hətta Prezident İlham Əliyevdə bölgələrdə iki-üç ulduzlu otellərin sayının artırılmasının vacibliyi barədə çıxış edib.
Xatırladaq ki, 2017-ci ildə ölkə başçısı İlham Əliyevin Nazirlər Kabinetinin iclasında çıxış edərək bildirib ki, Azərbaycan dünyada təhlükəsiz, sabit ölkə kimi bilinir. Prezident xüsusilə Bakıda və bölgələrdə yeni otellərin tikilməsinə böyük ehtiyac olduğunu bildirərək, sahibkarları bu işə dəstək olmağa çağırıb: "Mən sahibkarlara məsləhət görərdim ki, bu sahəyə investisiya qoysunlar. Çünki bu, gəlirli sahədir və yaxşı nəticə verəcək”. Şübhəsiz ki, ölkə başçısının fikirləri həm xaricdən, həm də regionlardan paytaxta gələn, oteldə gecələmək istəyən və ya regionlara səfər edən turistlərin yerləşmə zamanı rastlaşdıqları problemi olduğu kimi əks etdirir. Seçim imkanının olmaması insanların narazılığına səbəb olmaqla bərabər, turizmin inkişafına da mənfi təsir göstərir. Bir sıra otellər sadəcə 4-5 ulduzlu olduğu üçün insanlarda seçim imkanını çətinləşdirir. Bu tip otellərin qiymətləri isə hər kəsin cibinə uyğun olmadığından müxtəlif problemlər yaranır. 2-3 ulduzlu otellərə və hostellərə olan tələbat həm də bu tip məsələlərdən qaynaqlanır. Bu baxımdan, təkcə Bakıda deyil, turizmin inkişaf etdiyi bütün regionlarda bu tip obyektlərin tikintisinə kəskin ehtiyac yaranıb”.
Prezidentin məlum çıxışından sonra bölgələrdə iki üç ulduzlu otellər tikildi. Ancaq ekspertlər hesab edir ki, ölkədə iki üç ulduzlu otellərin sayı yetərincə deyil.
Turizm sahəsi üzrə ekspert Elçin Rüstəmov “Bakı-Xəbər”ə açıqlamasında qeyd etdi ki, regionlarda otellərin sayı artsa, bu, həmçinin daxili turizmin inkişafına səbəb olar. İnsanlar tətillərdə, yay və ya qış aylarında, o cümlədən həftə sonlarında regionlara istirahətə getmək istəyirlər: “Bunun üçün ölkədə daxili turizmi inkişaf etdirmək vacibdir. Belə ki, Avropa ölkələrində turizm gəlirlərinin 80 faizi daxili turizmin payına düşür. Bu sahənin inkişafı daxil olan vəsaitin ölkədə qalmasına səbəb olur. Qiymətlər mövcud məvacibə uyğunlaşdırılmalıdır. Vətəndaşların Gürcüstan və digər qonşu ölkələrdə yox, regionlarda dincəlməyə üstünlük vermələrinə şərait yaratmaq lazımdır. Bununla da, vəsait ölkədə qalar və regionların turizm sahəsi inkişaf edər. Amma bunun üçün lazımı infrastruktur olmalıdır ki, onlardan başlıcası da otellərdir”.
Ekspert hesab edir ki, əslində otellər vaxtında inşa olunmalı idi: "Eyni zamanda, həmin otellər müxtəlif ulduzlar almalıdırlar. Yəni tikiləcək otellər təkcə beşulduzlu olmamalıdır. Eyni zamanda, digər tipli otellərin tikintisinə ehtiyac var. Azərbaycanın sahibkarları bu sahəyə investisiya qoysalar, yaxşı nəticələr əldə etmək olar. Bölgələrdə iki-üç ulduzlu otellər var. Ancaq onların sayı çox deyil. Nəzərə almaq lazımdır ki, ulduzu az olan otellərin sayının artırılması həm turist axınının güclənməsinə səbəb olar, həm də ölkə iqtisadiyyatına gəlir gətirər.
Ümumilikdə, otel nə qədər ucuz və çox olsa, turist bir o qədər ölkədə çox qalar. Yəni otelin ucuz olması turistlərin ölkəmizdə daha çox qalmaları və daha çox pul xərcləmələrinə şərait yaradar. Bunun üçün isə şübhəsiz ki, bütün tip, ən əsası 2-3 ulduzlu otellər şəbəkəsi genişləndirilməlidir. İnvestorların bu istiqamətə yönələn investisiyaları isə ölkə başçısının dediyi kimi, gələcəkdə böyük gəlir deməkdir. Həmçinin turizmin inkişafı ölkənin regionlarının da inkişafına səbəb olar, yüzlərlə iş yerlərinin açılmasına və son nəticədə ölkənin sosial-iqtisadi inkişafına öz töhfəsini verər”.
Günel CƏLİLOVA
