Eyyub Hüseynov: “Murdar olmuş heyvanların ətinin satılması ciddi xəstəliklərin yayılmasına səbəb ola bilər”
Ölkədə qida təhlükəsizliyinin təmin edilməsi vacib məsələlərdən biridir. Sözügedən məsələ zaman-zaman müzakirə mövzusu olub. Bu arada sosial şəbəkələrdə yayılan məlumata görə, hər səhər, təxminən saat 5.00-dan 8.00 qədər Bazarda ölü ətinin kilosunu 1 manatdan satırlar. İddialara görə, restoran və dönərxana sahibləri bu qara nöqtənin əsas müştərilərindəndir.
O da məlimdur ki, bənzər məlumatlar dəfələrlə gündəmdə olub və bu bir sıra məsələlərdən qaynaqlandığı üçün müəyyən şübhələrə yol açır. Məsələ ondadır ki, bəzən bazarlarda satılan kolbasanın qiyməti, ətin qiymətindən ucuz olur. Məsələn, bu gün bazarlarda dana ətinin bir kilosunun qiyməti 10 manatdan aşağı deyil. Ancaq görürsən ki, bazarda kilosu 5-6 manata olan kolbasa satılır. Belə olan halda həmin kolbasanın hazırlanmasında istifadə olunan ətin mənşəyi qaranlıq görünür. Çünki mümkün olan iş deyil ki, ət baha olsun, amma kolbasa ucuz. Düzdür, kolbasanın tərkibi təkcə ətdən ibarət olmur. Ancaq bu amil belə, kolbasanın ucuz satılmasına əsas vermir. Digər tərəfdən, ucuz ətin realizə olunduğu yerlərdən biri də dönərxanalar hesab olinur. Elə dönərxanalar var ki, orada satılan dönərlərin qiyməti digərləri ilə müqayisədə çox ucuz olur. Bu da istər-istəməz orada istifadə olunan ətin mənşəyi ilə bağlı şübhə yaradır. Nəzərə almaq lazımdır ki, mənşəyi bəlli olmayan ət məhsullarının satışı böyük təhlükədir. Xüsusən də ölmüş heyvanların ətinin satılması. Bu kütləvi zəhərləmələrə və digər qorxunc fəsadlara səbəb ola bilər.
Məlumatın nə dərəcədə doğru olub-olmadığını öyrənmək üçün Qida Təhlükəsizliyi Agentliyinə sorğu ilə müraciət etdik. Təəssüflər olsun ki, gün ərzində sorğumuz qurum tərəfindən cavablandırılmadı. Həmçinin, qurumun mətbuat xidmətinin rəhbəri Aysel Fərziyeva ilə əlaqə saxladıq. O isə bununla bağlı qurumun rəsmi açıqlamasının olmadığını dedi. Rəsmi açıqlamanın olacağı halda, məlumat verəcəklərini dedi.
Məsələ ilə əlaqədar Azad İstehlakçılar Birliyinin rəhbəri Eyyub Hüseynov “Bakı-Xəbər”ə açıqlamasında bildirdi ki, bu kimi məlumatların müəyyən əsası var: “İllər öncə monitorinq aparmışam. Gecə saat üçdə gedib görmüşəm ki, leş əti satılır. Bu illlər öncə olub. Dəfələrlə biz sözügedən məsələ ilə bağlı müvafiq orqanlar qarşısında məsələ qaldırmışıq. Bu sahədə ən uğurlu işi Daxili İşlər Nazirliyi aparıb. Ancaq digər qurumların fəaliyyəti qənaətbəxş olmayıb. Lakin bütün işlər aparılsa da leş mafiyasının qarşısını almaq mümkün olmayıb. Bir dəfə Kənd Təsərrüfatı Nazirliyinin idarə rəisi efirdə bəyan etdi ki, hər cür əti satmaq olar. Ancaq bu o demək deyil ki, hər şeyi satmaq olar. Xüsusən də ölmüş heyvanın ətini satmaq yolverilməzdir. Murdar olmuş heyvanların ətinin satılması ciddi xəstəliklərin yayılmasına səbəb ola bilər. Hesab edirəm ki, ölmüş heyvan ətinin satılması ilə bağlı informasiyaların əsası var. Kəndlərdə ölmüş heyvanlarla bağlı leşyığanlara zəng vururlar və onlar da gəlib bu işi görürlər. Yəni bu proses gedir. Leş ətinin hara gətirildiyi bilinmir. Kənd Təsərrüfatının baytarlıq idarələri belə hallar aşkar edəndə bu işlə məşğul olanları cərimələyir. Daxili İşlər Nazirliyi isə belə faktlar aşkar edəndə cinayət işi açır, ekspertiza aparır. Çox təəssüflər olsun ki, belə ətlərin son sifarişçisi tapılmır. Ona görə də bu kimi informasiyaların əsası var və bununla bağlı tədbirlər görülməlidir. Biz sözügedən məsələlərlə bağlı Qida Təhlükəsizliyi Agentliyi ilə əməkdaşlıq etmək istəsək də onlar bizimlə əməkdaşlıq etmək istəmir. Onlar AİB-i savadsızlıqda günahlandırırlar. Əslində isə belə məsələlərdə ictimai təşkilatlarla əməkdaşlıq olmalıdır”.
Vidadi ORDAHALLI
