“Bu rayonda Bakının tarixi, mədəniyyəti, keçmişi, adət-ənənəsi, etnoqrafiyası qorunub saxlanacaq”
Bakının tarixi mərkəzinin yaradılması reallaşır. Azərbaycan Memarlar İttifaqının sədri Elbəy Qasımzadənin verdiyi məlumata görə, Prezident İlham Əliyev Bakının tarixi mərkəzinin ayrıca rayon kimi təşkili ilə bağlı müvafiq göstərişlərini verib.
O bildirib ki, bu gün ölkədə quruculuq sahəsində, yaradıcılıq sahəsində çox böyük işlər görülür: “Mən Prezident İlham Əliyevin və birinci xanım Mehriban Əliyevanın mədəniyyət və incəsənət xadimləri ilə görüşündə belə bir təkliflə çıxış etdim ki, Bakının tarixi mərkəzinin sərhədləri müəyyənləşsin və onu Bakı Şəhər İcra Hakimiyyəti tərkibində ayrıca mərkəzi rayon kimi qəbul etsinlər. Yekun çıxışında cənab Prezident bu təklifə daha çox vaxt sərf etdi, artıq müvafiq göstərişlərini də verib”-deyə E.Qasımzadə bildirib. O, həmçinin vurğulayıb ki, hazırda bu məsələnin üzərində çox fəal iş aparılır:”Ötən beş gün ərzində mənim, demək olar, bir saniyə sərbəst vaxtım olmayıb, çünki bu işlə məşğul olan bütün dövlət təşkilatları, nazirliklər, o cümlədən Mədəniyyət Nazirliyi, Dövlət Şəhərsalma və Arxitektura Komitəsi, Bakı Şəhər İcra Hakimiyyəti, Əmlak Məsələləri Dövlət Komitəsi hər gün mənimlə əlaqə saxlayırlar və bu işin reallaşmasına doğru təkliflər və müzakirələr aparırlar. Məncə, bu gün bu məsələ belə yüksək səviyyədə müzakirə olunursa, yəqin ki, qısa müddətdə bu barədə qərar qəbul olunacaq”.
Azərbaycan Milli Elmlər Akademiyasının (AMEA) Tarix İnstitutunun əməkdaşı, tarix üzrə fəlsəfə doktoru Vaqif Abışov “Bakı-Xəbər”ə bildirdi ki, Bakının tarixi mərkəzinin yaradılmasına çoxdan ehtiyac var idi. Onun sözlərinə görə, Bakının tarixi mərkəzinin ayrıca bir rayon kimi təşkil edilməsi bir sıra baxımdan faydalıdır. Bunun böyük tarixi əhəmiyyətə malik olacağını qeyd edən tarixçinin bildirdiyinə görə, Prezidentin bu barədə verdiyi tapşırıqların tezliklə icra ediləcəyinə inanır və hesab edir ki, əlaqədar qurumlar bu istiqamətdə daha ciddi fəaliyyət göstərməlidir. “Prezidentin Bakının tarixi mərkəzinin ayrıca bir rayon kimi təşkil edilməsi ilə bağlı göstəriş verməsi həqiqətən də, çox mühüm bir məsələdir. Deyim ki, bu gün dünyanın bütün qədim şəhərlərinin ərazilərində bu cür rayonlar təşkil edilib və həmin rayonlara turistlər kütləvi maraq göstərir. Həm Romada, həm İngiltərədə, həm də digər ölkə və şəhərlərdə belə mərkəzlər yaradılıb. Bakının da tarixi mərkəzinin bir rayon kimi təşkil edilməsinin əhəmiyyəti böyük olar. Bu rayonda Bakının tarixi, mədəniyyəti, keçmişi, adət-ənənəsi, etnoqrafiyası qorunub saxlanılacaq. Bilirsiz ki, son illər Bakının mərkəzi yerlərində tikintilər aparıldı, hətta bunun nəticəsində bizim bir çox tarix-mədəniyyət abidələrimizə zərər dəydi. Burada belə xoşagəlməz hallar baş verdi. Cənab Prezident tərəfindən belə bir göstərişin verilməsi həm İçəri Şəhər də, həm də bayır şəhərdə yerləşən abidələrin mühafizəsində də mühüm rol oynayacaq. Bakıda və Bakıətrafında elə abidələr var ki, onlar ciddi şəkildə qorunmalıdır. Şəhərimizə gələn turistlərin də bu abidələrlə ətraflı tanış olması üçün belə bir mərkəzi rayonun yaradılmasına zərurət vardı”.
V.Abışov həmçinin qeyd etdi ki, Bakının mərkəzində ayrıca bir rayonun təşkil edilməsinin yalnız müsbət tərəfi ola bilər. “Bakı siti yaratmaq olar. Özü də bu rayona xüsusi yanaşılacaq və burada olan bütün abidələr qorunacaq. Hesab edirəm ki, yerli memarların dəstəyi ilə əlaqədar qurumlar tezliklə bu rayonun sərhədlərini müəyyən etməli və burada işə başlamalıdır”-deyə müsahibimiz bildirdi. O eyni zamanda bildirdi ki, bu rayon təşkil edildikdən sonra ora ayrıca bir turist məkanı kimi özünə dünyada böyük şöhrət tapacaq.
İradə SARIYEVA
