Ərşad Hüseynov: “Yeni qaydalara riayət olunarsa, həm təhlükəsizlik təmin olunar, həm də daşıyıcılar keyfiyyətli iş ortaya qoyar”
Paytaxtın avtomobil nəqliyyatı ilə müntəzəm sərnişindaşıma və taksi minik avtomobilləri ilə sərnişindaşıma sahəsinə cavabdeh olan Bakı Nəqliyyat Agentliyi yarandığı gündən etibarən bu sahədə yaşanan problemləri aradan qaldırmağa çalışır.
Danılmaz faktdır ki, adıçəkilən qurum nəqliyyat infrastrukturunun yaxşılaşdırılması, sərnişindaşıma xidmətlərinin səmərəliliyinin və keyfiyyətinin artırılması üçün kifayət qədər iş görüb və görməkdə davam edir. Ümumiyyətlə, son illər Bakı Nəqliyyat Agentliyi paytaxtın nəqliyyat sahəsində yaşanan problemlərin həll olunması istiqamətində inqilabı işlər həyata keçirir. İstismara yararsız avtomobillər xətdən uzaqlaşdırılır, dayanacaqlarda xüsusi duracaqlar quraşdırılır.
Bu günlərdə Bakıda avtobuslar üçün dayanacaq məntəqələrinə və taksi minik avtomobilləri üçün duracaq yerlərinə dair tələblər müəyyən edilib. Bu məqamlar “Bakı şəhərində sərnişindaşımada istifadə olunan avtobuslara və taksi minik avtomobillərinə, onların sürücülərinə, sərnişindaşıma fəaliyyətini həyata keçirən daşıyıcılara, nəqliyyat mübadilə mərkəzlərinə, avtobuslar üçün dayanacaq məntəqələrinə və taksi minik avtomobilləri üçün duracaq yerlərinə dair tələblər”də öz əksini tapıb.
Tələblərə əsasən, avtobuslar üçün müəyyən edilən cibsiz dayanacaq məntəqəsi minimum 16 metr giriş, 24 metr dayanma və 9 metr çıxış sahəsindən, ümumilikdə, 49 metrdən ibarətdir. Cibli dayanacaq məntəqəsi sürət həddinin və nəqliyyat axınının yüksək, yolun ensiz olduğu yerlərdə təşkil edilir. Cibli dayanacaq məntəqəsi minimum 19 metr giriş, 25 metr dayanma və 25 metr çıxış sahəsindən, ümumilikdə, 69 metrdən ibarətdir.
Avtobus dayanacaq məntəqəsi eyni vaxtda iki və daha artıq avtobus üçün hesablandığı zaman qeyd edilən ölçülərdən əlavə, avtobuslar arasında ən azı 9 metr məsafə nəzərə alınmalıdır. Avtobus dayanacaq məntəqələri şəhər daxilində 400-600 metr, şəhərətrafı ərazilərdə isə 800-1000 metr intervalla yerləşdirilməlidir. Dayanacaq məntəqəsi piyada keçidindən sonra yerləşdirilməlidir. Avtobusların yanalma sahəsi ilə piyada keçidinin arasında minimum 5 metr məsafə olmalıdır.
Həmçinin, dayanacaq pavilyonu avtobusun çıxış sahəsinə yaxın quraşdırılmalı və qurularkən piyadaların hərəkəti üçün minimum 1,2 metr səki sahəsi saxlanmalıdır. Dayanacaq məntəqəsində səkinin eni 2 metrdən az olarsa və gün ərzində 20 sərnişindən az minib-düşmə həyata keçirilərsə, həmin məntəqədə pavilyonun qoyulmamasına yol verilir. Dayanacaq pavilyonu olmayan dayanacaq məntəqələrində marşrutların dayanacaq məntəqəsindən keçmə qrafiki, intervalları və xəritə lövhənin aşağı hissəsində quraşdırılmış əlavə məlumat tablosunda əks olunmalıdır. Ödəmə terminalı dayanacaq məntəqəsi pavilyonunun yaxınlığında təhlükəsiz yerdə yerləşdirilməlidir.
Onu da qeyd edək ki, yollarda sıxlığın aradan qaldırılması üçün məktəblərdə servis avtobuslarının istifadə edilməsi BNA-nın gündəliyində olan prioritet məsələlərdəndir.
Son zamanlar Bakının nəqliyyat sektorunda görülən işlər, eyni zamanda, paytaxtda avtobuslar üçün dayanacaq məntəqələrinə və taksi minik avtomobilləri üçün duracaq yerlərinə dair tələblər barədə məlumat verən nəqliyyat məsələləri üzrə ekspert Ərşad Hüseynov “Bakı-Xəbər”ə açıqlamasında qeyd etdi ki, avtobus, taksi və onların sahiblərinə, eyni zamanda, dayanacaqlarla bağlı xüsusi tələblər müəyyən olunub: “Müəyyən olunan tələblər kifayət qədər ciddidir. Dayanacaqlarla bağlı kifayət qədər problem var idi. Bəllidir ki, dayanacaqların yerləşdirilməsi sahəsi ilə bağlı narazılıqlar var. Yeni tələblərdə dayanacaqların yerləşdirilməsi məsələsinə xüsusi olaraq toxunulub. Eyni zamanda, marşrut sahibləri qarşısında sürücülərlə necə rəftar olunması məsələsi tələb olaraq qoyulub”.
Həmsöhbətimiz hesab edir ki, Bakı şəhərinin ictimai nəqliyyatı ilə bağlı problemlərin aradan qaldırılması üçün müəyyən edilən yeni qaydalara riayət olunarsa, həm təhlükəsizlik təmin olunar, həm də daşıyıcılar keyfiyyətli iş ortaya qoyar.
Ekspert onu da vurğuladı ki, bu gün ictimai nəqliyyatda bir sıra problemlər yaşanır. Daşıyıcıların bəzisi texniki baxımdan köhnədir, sürücülər xoşagəlməyən hərəkətlər edir. Müəyyən olunan yeni tələblərin bu kimi halların qarşısının alınmasında rolu olacaq.
Günel CƏLİLOVA
