“Oxu günü” tədbirləri çərçivəsində biz çox böyük nəticə əldə edə bilərik” “Bunun davamlı xarakter alması üçün orta ümumtəhsil məktəblərinin də bu təşəbbüsə qoşulması çox vacibdir”
Gizlin deyil ki, bu gün Azərbaycanda uşaq və gənclərdə mütaliəyə maraq elə də yüksək səviyyədə deyil. İnsanın formalaşmasında xüsusi əhəmiyyət kəsb edən mütaliədən uşaqlarımızın uzaq düşməsi hər birimizi ciddi narahat edir. Uşaqlarda oxu mədəniyyətinin formalaşdırılması üçün dövlət tərəfindən addımlar atılır.
Artıq Təhsil Nazirliyi bu sahədə addımlar atmağa başlayıb. Belə ki, təhsil naziri Ceyhun Bayramov “Oxu günü” tədbirinin keçirilməsi haqqında əmr imzalayıb. Təhsil Nazirliyindən mətbuata verilən məlumata görə, əmrdə bildirilir ki, UNESCO-nun qərarına əsasən, hər il aprelin 23-ü beynəlxalq səviyyədə “Ümumdünya Kitab və Müəlliflik Hüququ Günü” kimi qeyd edilir. Sənəddə qeyd edilir ki, son illər Heydər Əliyev Fondunun təşkilatçılığı və Bakı Şəhəri üzrə Təhsil İdarəsinin tabeliyindəki ümumtəhsil müəssisələrinin iştirakı ilə “Oxu günü” tədbirinin keçirilməsi də artıq ictimai maraq doğuran ənənə halını alıb.
Əmrə əsasən, Bakı Şəhəri üzrə Təhsil İdarəsinin bu sahədə müsbət təcrübəsini nəzərə alaraq, “Oxu günü” tədbirinin miqyasını genişləndirmək və kütləvi xarakter daşımasını təmin etmək məqsədilə hər il aprelin 23-də “Ümumdünya Kitab və Müəlliflik Hüququ Günü” münasibətilə respublikanın rayon və şəhərlərində ümumtəhsil məktəblərinin iştirakı təmin olunmaqla kütləvi “Oxu günü” tədbiri keçiriləcək.
Azərbaycan Yazıçılar Birliyinin üzvü, ədəbiyyatşünas Leyla Məmmədəliyeva bizimlə söhbətində bildirdi ki, təhsil nazirinin bu qərarı bir ziyalı kimi onun ürəyincədir. Onun sözlərinə görə, təhsil nazirinin əmrilə “Oxu günü”nün keçirilməsinin böyük əhəmiyyəti olacaq. “Hesab edirəm ki, bu qərar uşaqların və gənclərin ədəbiyyata marağını artıracaq. Bu imkan verəcək ki, uşaqlar arasında mütaliə mədəniyyəti formalaşsın. Çünki buna çox böyük ehtiyac var. Doğrudur, məktəblərdə “Sinifdən xaric oxu” tədris edilir, ancaq bu, oxu mədəniyyətinin formalaşmasında elə də güclü rol oynaya bilmir. Amma “Oxu günü” tədbirləri çərçivəsində biz çox böyük nəticə əldə edə bilərik. Bu layihə uşaq və gənclərdə kütləvi olaraq oxu mədəniyyəti formalaşdıracaq. Bu həm də imkan verəcək ki, klassik və müasir Azərbaycan şairlərinin, yazıçılarının əsərləri, kitabları təbliğ edilsin. Bunun davamlı xarakter alması üçün orta ümumtəhsil məktəblərinin də bu təşəbbüsə qoşulması çox vacibdir. Çünki burada məktəblərin də rolu çox böyükdür”.
L.Məmmədəliyevanın bildirdiyinə görə, mütailə, oxu mədəniyyəti uşaqların dünyagörüşünün, intellektinin, düşüncəsinin formalaşmasında da mühüm rol oynayır. Ədəbiyyatşünas hesab edir ki, “Oxu günü” çərçivəsində kitabxanalar, kitab mağazaları da aktivlik göstərməlidirlər.
İradə SARIYEVA
