Kamran Əsədov: “Tələbə təqaüdlərinin artırılması təhsilin əhatə dairəsinin genişlənməsinə və inkişafına səbəb olacaq”
Son aylar ölkədə sosial sahədə uğurlu siyasət aparılır. Əhalinin müxtəlif təbəqələrinə aid sosial müavinətlərin həcmi artır. Növbəti belə bir addım bu günlərdə tələbələrlə bağlı atıldı. Prezident İlham Əliyev tələbə təqaüdlərinin məbləğini artırıb. Bu artımlar martın 1-dən qüvvədədir.
Qeyd edək ki, fevralın 14-də Prezident İlham Əliyev “Doktorantlara, ali təhsil, orta ixtisas və peşə təhsili müəssisələrində, həmçinin, Azərbaycan Milli Elmlər Akademiyasının magistratura səviyyəsində təhsil alan tələbələrə təqaüdlərin verilməsi haqqında” Sərəncam imzalayıb. Sərəncama əsasən, dövlət büdcəsinin vəsaiti hesabına doktorantlara, ali təhsil, orta ixtisas və peşə təhsili müəssisələrində, həmçinin, Azərbaycan Milli Elmlər Akademiyasının magistratura səviyyəsində təhsil alan tələbələrə təqaüdlər aşağıdakı məbləğlərdə müəyyən edilib:
magistratura səviyyəsi üzrə:
akademik göstəriciləri 91-100 bal olan tələbələrə – 145 manat
akademik göstəriciləri 71-100 bal olan tələbələrə – 120 manat
akademik göstəriciləri 51-100 bal olan tələbələrə – 80 manat
bakalavriat səviyyəsi üzrə:
akademik göstəriciləri 91-100 bal olan tələbələrə – 130 manat
akademik göstəriciləri 71-100 bal olan tələbələrə – 110 manat
akademik göstəriciləri 51-100 bal olan tələbələrə – 75 manat
orta ixtisas təhsili müəssisələrində:
akademik göstəriciləri 91-100 bal olan tələbələrə – 75 manat
akademik göstəriciləri 71-100 bal olan tələbələrə – 60 manat
akademik göstəriciləri 51-100 bal olan tələbələrə – 50 manat
Peşə təhsili müəssisələrinin tələbələrinə – 50 manat.
Sərəncamda o da qeyd olunub ki, təqaüdlərin ödənilməsi, doktorantura pilləsində, orta ixtisas və peşə təhsili müəssisələrində, həmçinin, Azərbaycan Milli Elmlər Akademiyasının magistratura səviyyəsində dövlət sifarişi və dövlət hesabına təhsil alanların sayı saxlanmaqla, dövlət büdcəsindən təqaüd üçün ayrılan vəsait həddində həyata keçirilir.
Qeyd edək ki, dövlət başçısının tələbələrin təqaüdünün artırılması ilə bağlı sərəncamı 110 minə yaxın tələbəyə şamil olunacaq. Dövlət büdcəsinin vəsaiti hesabına təqaüdlər orta hesabla 20%-ə yaxın artıb. Həmçinin, təqaüd yerlərinin sayı 16000 vahid artırılıb və təqaüd alan tələbələrin sayının tələbələrin ümumi sayına nisbəti hazırkı 31 faizdən 45 faizə çatdırılıb.
Tələbə təqaüdlərinin məbləğinin artırılmasının əhəmiyyəti barəsində danışan təhsil eksperti Kamran Əsədov “Bakı-Xəbər”ə açıqlamasında qeyd etdi ki, 2010-cu ildən etibarən ölkədə ali təhsil müəssisələrində adambaşına maliyyələşmə mexanizmi sistemi həyata keçirilir. Bu o deməkdir ki, dövlət təhsil müəssisələrində dövlət sifarişli ixtisasa qəbul olunan tələbələrin tək təqaüdünü deyil, eyni zamanda, onların təhsil haqqını da ödəyir. Bununla bərabər, 2016-cı ilə qədər ali təhsil müssisələrinin ödənişli ixtisasına qəbul olunan tələbələr kəsr olmadığı təqdirdə təqaüd alırdılar. Həmin ildə qanunvericiliyə dəyişiklik edildi. Yalnız akademik göstəriciləri yüksək olan şəxslər təqaüd almaq imkanına malik idi: “Ölkə Prezidentinin apardığı siyasət bütün sahələrdə müsbət dəyişiklik yaratdı. Cari il ərzində dövlət başçısı tərəfindən ciddi islahatlar həyata keçirildi. Bu islahatlardan biri də tələbə təqaüdünün artırılması idi. İslahatlar nəticəsində tələbələrin təqaüdü əksər dünya ölkələri ilə müqayisədə yüksəkdir. Məlumdur ki, ölkədə təqaüd bir neçə hissədən ibarətdir. Prezident təqaüdü 210 manatdır və bu rəqəm kifayət qədər yüksək məbləğdir. Eyni zamanda, magistratura, bakalavr, doktorantura, peşə, orta ixtisas və kolleclərdə təhsil alanların təqaüdü 12 faizdən 25 faizə qədər artırıldı. Hazırda ölkədə dövlət tərəfindən ən yüksək təqaüdün məbləği 300 manatdır. Bu məbləğ də doktorantura səviyyəsində təhsil alanlara aiddir. Ən aşağı məbləği isə peşə təhsili müəssisələrində oxuyanlar alır”.
Həmsöhbətimiz onu da bildirdi ki, Prezidentin imzaladığı məlum sərəncam sayəsində təqaüd yerlərinin sayı 16000 vahid artırılıb.
Ekspertin fikrincə, tələbə təqaüdünün artırılması təhsilin əhatə dairəsinin genişlənməsinə və inkişafına səbəb olacaq.
Günel CƏLİLOVA
