“Sosial şəbəkələrdə mənfi reaksiya doğuran halın qarşısının alınması üçün…” “Nə üçün katibə rəhbərinin kabinetində selfi çəkdirməlidir?”
Sosial şəbəkələr cəmiyyətin, bir növ, aynasına çevrilib desək yanılmarıq. Kimi axtarırsan, burada tapırsan, kimin necə olduğunu bilmək üçün bircə dəfə sosial şəbəkələrə baş vurmaq yetərlidir.
Biz tez-tez müxtəlif sosial şəbəkələrdə bəzi icra başçılarının xidməti kabinetinin selfi məkanına çevrildiyinin şahidi oluruq. İcra başçılarının katibələri və sürücüləri vaxtaşırı olaraq rəhbərlərinin kabinetlərində çəkdirdikləri selfiləri, şəkilləri sosial şəbəkələrdə yayırlar. Bizlər də katibələrin selfiləri ilə nəinki icra başçılarının kabinetləri ilə tanış oluruq, hətta onların dünyagörüşünün hansı səviyyədə olduğunu müşahidə edirik. Bəzi icra başçılarının kabinetlərinin selfi məkanına çevrilməsi sosial şəbəkələrdə birmənalı qarşılanmır. Bu fakt ciddi tənqid edilir.
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, katibələrinin və sürücülərinin onların kabinetlərində şəkil çəkdirməsindən icra başçılarının xəbəri var. Onlar bilərəkdən bu selfilərin sosial şəbəkələrdə yayılmasına göz yumurlar. Bu hala yol verən icra başçısının, eləcə də katibə və sürücülərin səhv addım atdıqlarını deyən Ş.Ağayev hesab edir ki, bu halın qarşısı alınmalıdır. “Bu məsələdə günah həm icra başçısında, həm də katibələrdədir. Nə üçün katibə rəhbərinin kabinetində selfi çəkdirməlidir? Ümumiyyətlə, bu heç bir əxlaq çərçivəsinə sığmır. O katibələr, o sürücülər icra başçısının kabinetində selfi çəkdirməklə kimlərə nəyi sübut etmək istəyirlər? Yəni demək istəyirlər ki, filan icra başçısına yaxınam? Katibənin, sürücünün, ümumiyyətlə, hansısa bir işçinin icra başçısının kabinetində selfi çəkdirməsi qəbuledilməzdir. Yəqin bu selfiləri çəkdirib yaymaqla onlar hansısa bir qaranlıq işlərini həyata keçirmək istəyirlər. Təkcə onlar deyil, bir də görürsən ki, kimsə ata-anasının qəbri üstə şəkil çəkdirib sosial şəbəkələrdə yayır. Bu da mənfi haldır. Şəxsi məqamlar insanın özünə aiddir və bu yayılmamalıdır. Əgər milli maraqlara, dövlətçiliyə xidmət edən bir tədbirdə şəkil çəkdirib onu yayırlarsa, bu normaldır. Onu biz də edirik. Çox təəssüf ki, Azərbaycanda sosial şəbəkələrdə ən çox şəxsi məsələlərlə bağlı paylaşımlara üstünlük verilir”.
“Bəs icra başçıları özləri niyə yol verirlər ki, katibələri, yaxud sürücüləri onların kabinetində şəkil çəkdirsin” - deyə Ş.Ağayevdən soruşduqda, o bildirdi ki, onlar özləri qəsdən buna yol verir və səhv edirlər. İcra başçılarının buna hansı məqsədlərlə yol verdiyinin səbəblərinin aydın olmadığını deyən Ş.Ağayev “icra başçıları özləri yəqin ki, sosial şəbəkələrdə olmaz. Ancaq mütləq onun adamları var ki, onlar sosial şəbəkələri izləyir və icra başçılarına bu barədə məlumat verirlər. İcra başçıları özləri katibələrinə və sürücülərinə onlara məxsus kabinetlərdə selfi çəkdirməsi üçün şərait yaradırlar. Yəni buna özləri yol verirlər. Hesab edirəm ki, icra başçıları sosial şəbəkələrdə mənfi reaksiya doğuran bu kimi halın qarşısının alınması üçün tədbirlər görməlidirlər” - deyə bildirdi.
İradə SARIYEVA
