İlqar Hüseynli: “Nəzərə almaq lazımdır ki, əlilliyi olan uşaqlarla bağlı məlum yeni qərar onların sosial baxımdan xeyrinə olacaq”
Məlum olduğu kimi, Prezident İlham Əliyevin imzaladığı "Əhalinin sosial müdafiəsinin gücləndirilməsi sahəsində əlavə tədbirlər haqqında" sərəncam uyğun olaraq, sosial müavinət məbləğlərində artımlar həyata keçiriləcək.
Bütün bunlarla yanaşı, diqqətçəkən məqamlardan biri də odur ki, yeni müavinət növləri yaradılıb. Qeyd edək ki, son sərəncamla fiziki imkanları məhdud olan uşaqlara 150 manat sosial müavinət veriləcək. Əvvəllər bu rəqəm 82 manat idi. Bununla yanaşı, hər bir uşağa 18 yaşınadək baxılmasına görə əlavə 50 manat ödəniş təyin edilib. Yəni fiziki imkanları məhdud olan hər bir uşaq üçün ödəniləcək aylıq məbləğ 150 manat deyil, baxım xərci ilə birlikdə 200 manat olacaq. Əvvəllər bu yox idi. Yəni əlilliyi olan uşağa baxılmasına görə müavinət verilmirdi. Digər məqam isə odur ki, minimum pensiya artımları artıq martın 1-dən, sosial müavinətlər üzrə artımlar isə aprelin 1-dən hesablanacaq. Birinci qrup əlilliyi olan şəxslərə baxmağa görə qəyyuma 50 manat məbləğində müavinət də yeni təsisatlar sırasındadır.
Onu da qeyd edək ki, "Əmək pensiyaları haqqında" Qanuna əsasən, əlilliyə görə əmək pensiyası I qrup əlillərə ümumilikdə sığorta stajı 5 ildən az olmamaq şərtilə, əmək qabiliyyətli yaş dövrünün hər tam ili üçün 4 ay sığorta stajı olduqda təyin edilir. II və III qrup əlillərə əlilliyə görə əmək pensiyası fərdi hesabın sığorta hissəsində qeydə alınmış pensiya kapitalı əmək pensiyasının minimum məbləğindən az olmayan pensiya təminatına imkan verməsi şərtilə, bu maddədə göstərilən sığorta stajı olduqda təyin edilir.
Bütün bunlarla yanaşı, əlilliyi olan şəxslərlə bağlı yeni müavinət növlərinin yaradılmasına ekspertlər necə yanaşırlar?
Məsələyə münasibət bildirən ekspert İlqar Hüseynli yeni sosial müavinət növlərinin yaradılmasına müsbət prizmadan yanaşdı: “Yeni sərəncamda bununla bağlı çoxsaylı müsbət məqam var. Əvvəla əlilliyi olan şəxslərə verilən sosial müavinətlərin həcmi əhəmiyyətli dərəcədə artıb. Əvvəllər bunların məbləği çox aşağı idi. İstənilən halda, sosial ehtiyacların ödənilməsinə yönəlik bütün yeni tətbiq olunan güzəştlər, sosial müavinət növləri vətəndaşların sosial rifahının yaxşılaşmasına xidmət edir. O baxımdan, ölkə başçısının verdiyi son qərar vətəndaşlar tərəfindən maraqla qarşılandı. Təsadüfi deyil ki, bütün bunlar müsbət addım kimi qəbul olunur. Bu səpkidə proseslərin davam etməsi aztəminatlı insanların sosial vəziyyətinin yaxşılaşmasına xidmət edir. Xüsusən də sosial müavinətlərin məbləğinin artırılması, yeni-yeni müavinət növlərinin tətbiqi çox müsbət haldır. Nəzərə almaq lazımdır ki, əlilliyi olan uşaqlarla bağlı məlum yeni qərar onların sosial baxımdan xeyrinə olacaq. Bu imkan verəcək ki, həmin uşaqların ehtiyacları normal səviyyədə ödənilsin. Bununla yanaşı, uşağın doğulmasına görə verilən birdəfəlik müavinətin həcmi artıb. Həmçinin, uşaqpulunun bərpa olunması gündəmə gəlib. Hesab edirəm ki, bu kimi tədbirlərin hamısı müsbət məqamlardır. Bütün bunların davamlı olması vətəndaş-dövlət münasibətlərinin daha da möhkəmlənməsinə xidmət edir”.
Vidadi ORDAHALLI
